قىزىلوردانىڭ قامىسى گەرمانياعا ەكسپورتتالا باستادى

None
None
قىزىلوردا. قازاقپارات - قىزىلوردا وبلىسىندا جەرگىلىكتى ايماقتا وسەتىن قامىس بيىل گەرمانياعا ەكسپورتقا شىعارىلا باستادى، دەپ حابارلايدى قازاقپارات ءتىلشىسى.

وبلىستىق اۋىل شارۋاشىلىعى باسقارماسىنىڭ حابارلاۋىنشا، اتالعان مەملەكەتتە قامىس ۇيلەردىڭ شاتىرىنا ارنالعان توقىما سەبەتىن جاساۋعا پايدالانىلادى. بۇل ءونىم بيىل العاش رەت ەكسپورتقا شىعارىلعان.

بۇگىنگى كۇنگە دەيىن 122,1 توننا قامىس گەرمانياعا جىبەرىلگەن. استىق تۇقىمداسىنا جاتاتىن كوپجىلدىق شوپتەسىن وسىمدىك - قامىس جەر شارىندا كەڭىنەن تارالعان. تەك اركتيكا مەن انتاركتيدادا كەزدەسپەيدى.

قازاقستاندا جەراستى سۋى جەر بەتىنە جاقىن جاتقان شالعىندى، قۇمدى، سورتاڭ جەرلەردە وسەتىن 2 ءتۇرى بار. ەڭ ءجيى كەزدەسەتىنى - كادىمگى قامىس نەمەسە قۇراق. قامىستان سەبەت توقىلادى، قۇرىلىستا قولدانىلادى.

ودان حيميالىق وڭدەۋ جولىمەن شايىر، مەتيل سپيرتى، سىركە قىشقىلى، قاعاز الىنادى.

«قىزىلوردا وبلىسىنان جىل باسىنان بەرى 13,9 ميلليون دوللاردى قۇرايتىن 38,9 مىڭ توننا اۋىل شارۋاشىلىعى ونىمدەرى ەكسپورتتالدى. ول بىلتىرعى جىلدىڭ وسى كەزەڭىمەن سالىستىرعاندا 116,7 پايىزعا ارتتى. شەتەلدەن بالىق، كۇرىش، ءبيداي قالدىعى، قامىس ونىمدەرىنە سۇرانىس جاسالدى. وبلىستا وندىرىلەتىن ونىمدەر رەسەي، قىرعىزستان، بەلارۋس، ازەربايجان، موڭعوليا، تاجىكستان، ۋكراينا، تۇرىكمەنستان، وزبەكستان، گرۋزيا، قىتاي، پولشا، گەرمانيا، ليتۆا جانە يراك مەملەكەتتەرىنە جونەلتىلۋدە»، - دەپ ءمالىم ەتتى قىزىلوردا وبلىستىق اۋىل شارۋاشىلىعى باسقارماسى.

بۇدان بۇرىن سىر وڭىرىندەگى «ءار وتباسى مۇشەسى ءۇشىن ءۇش تالدان ەگۋ» اكتسياسى ناتيجەسىن بەرىپ جاتقانىن حابارلاعان ەدىك.

سوڭعى جاڭالىقتار