قىزىلوردادا كونە قالادان ۇلكەن كەسەنەنىڭ ورنى تابىلدى
بۇل جۇمىستار قىزىلوردا وبلىستىق تاريحي جانە مادەني ەسكەرتكىشتەردى قورعاۋ مەكەمەسى تاراپىنان قولعا الىنىپ وتىر.
قازبا جۇمىستارى التىن وردانىڭ 750 جىلدىعى اياسىندا جۇزەگە اسىرىلۋدا. يگىلىكتى ءىس وبلىستىق بيۋدجەت ەسەبىنەن جۇرگىزىلەدى.
«بيىل ەلىمىزگە بەلىگىلى ارحەولوگ ماديار ەلەۋوۆ جەتەكشىلىك جاسايتىن ارحەولوگيالىق ەكسپەديتسيا كەڭ كولەمدى ارحەولوگيالىق زەرتتەۋ شارالارىنا نازار اۋدارىپ وتىر. جۇمىس بارىسىندا كونسەرۆاتسيالىق شارالار اتقارىلادى دەپ جوسپارلانىپ وتىر. قازىرگى ۋاقىتتا قالاشىقتىڭ شەتىندە ورنالاسقان كەسەنىنىڭ ورنى تولىق ارشىلۋدا. قازبانىڭ ناتيجەسىمەن كەسەنەنىڭ كولەمى ۇلكەن ەكەندىگى انىقتالدى. ول تولىق قىشتان تۇرعىزىلعان. سونىمەن قاتار، بيىل وتكەن جىلعى قازبا بارىسىندا انىقتالعان قۇرىلىس نىساندارىنا جانە قىش كۇيدىرەتىن پەش ورىندارىنا قازبا جۇرگىزىلەدى»، - دەپ ءمالىم ەتتى قىزىلوردا وبلىستىق تاريحي جانە مادەني ەسكەرتكىشتەردى قورعاۋ مەكەمەسىنىڭ ماماندارى.
ەكسپەديتسياعا ارحەولوگتەر، جاس عالىمدار جانە جەرگىلىكتى اۋىل تۇرعىندارى تارتىلعان.
ايتا كەتەتىن جايت، قىشقالاداعى ارحەولوگيالىق زەرتتەۋلەر 2018-جىلدان بەرى تۇراقتى تۇردە جۇرگىزىلىپ كەلەدى.