سەمەيدە كوروناۆيرۋس جۇقتىرعانداردىڭ سانى وسۋدە

سەمەي. قازاقپارات - سەمەيدە كوروناۆيرۋس ينفەكتسياسىن جۇقتىرعان ناۋقاستار سانى ارتىپ كەلەدى، دەپ حابارلايدى قازاقپارات ءتىلشىسى.

بۇل تۋرالى قالالىق جەدەل شتاب مۇشەسى، مەديتسينالىق ماسەلەلەر جونىندەگى ۇيلەستىرۋشى نايليا المەنيەۆا مالىمدەدى.

«وتكەن تاۋلىكتە وبلىستا كوروناۆيرۋستىڭ 18 جاڭا جاعدايى تىركەلدى، ولاردىڭ 9 ى سەمەيدە انىقتالدى. جۇقتىرعانداردىڭ ىشىندە 8 ەرەسەك جانە 4 جاسار ءبىر بالا بار. ناقتىلاي كەتسەك، سولاردىڭ ەكەۋى پوليتسيا قىزمەتكەرى، 2 ءى مەدبيكە، 3 ءى جەكە جانە مەملەكەتتىك كاسىپورىنداردىڭ قىزمەتكەرلەرى، بىرەۋى جۇمىسسىز. اتالعان 9 جاعداي بويىنشا 16 ينفەكتسيا وشاعى بەلگىلەنىپ، بايلانىستا بولعان 100 گە جۋىق تۇرعىندار انىقتالدى»، - دەيدى ول.

ۆيرۋس جۇقتىرعانداردىڭ جارتىسى تۇراقتى تۇردە قوعامدىق كولىككە وتىرىپ، ءجيى ساۋدا ورىندارى مەن سۋپەرماركەتتەرگە بارىپ جۇرگەن. قالالىق جەدەل شتابتىڭ مالىمەتى بويىنشا بۇگىنگى تاڭدا سەمەي قالاسىندا كوروناۆيرۋس ينفەكتسياسىنا شالدىعۋدىڭ 164 جاعدايى تىركەلگەن.

بلوكبەكەتتەر الىنعاننان باستاپ جۇقتىرعانداردىڭ سانى كۇن سايىن ورتا ەسەپپەن 8 جاعدايعا ارتىپ كەلەدى. تىركەلگەن 100 وشاقتا ءبىر جارىم مىڭ كوروناۆيرۋس جۇقتىرعان ادامدارمەن بايلانىستا بولعاندار باقىلاۋعا الىنعان. قوسىمشا سيمپتومسىز رەتىندە 105 جۇقتىرعان ادام تىركەلدى. قازىرگى ۋاقىتتا التى ادام اۋىر حالدە جانە ەكەۋى رەانيماتسيا پالاتاسىندا جاتىر. وكىنىشكە قاراي، كورونوۆيرۋسپەن قاتار قوسالقى اۋرۋى انىقتالعان 4 ادام قايتىس بولدى.

«قۇرمەتتى جەرلەستەر، الەمدىك عىلىم بۇل ۆيرۋسقا قارسى ۆاكتسينانى ءالى تاپپادى. ازىرگە ەڭ ءتيىمدى قورعانىس - قاراپايىم قاۋىپسىزدىك ەرەجەلەرىن ساقتاۋ. الەۋمەتتىك قاشىقتىق، جەكە گيگيەنا، جانە بەتپەردە كيۋ سەكىلدى ساقتىق شارالارى اۋرۋدىڭ الدىن الۋعا سەپتىگىن تيگىزەدى. جەدەل شتاب تاراپىنان ىندەتتى الدىن الۋ ءۇشىن ءتيىستى جۇمىستار جۇرگىزىلگەنىمەن جەكە باس قاۋىپسىزدىگى ءارقايسىمىزدىڭ جاۋاپكەرشىلىگىمىز ەكەندىگىن ۇمىتپاعانىمىز ءجون. قالامىزدا كورونوۆيرۋستىڭ تارالۋىن توقتاتۋ ماقساتىندا، بارلىق سەمەيلىكتەردى بەكىتىلگەن ەرەجەلەردى ساقتاۋعا شاقىرامىن!»، - دەيدى نايليا المەنيەۆا.