قىتايدىڭ اقساي اۋدانىندا كيىز ءۇي پاركى اشىلدى - شەتەلدەگى قازاقءتىلدى ب ا ق- قا شولۋ

نۇر- سۇلتان. قازاقپارات- «قازاقپارات» ح ا ا ادەتتەگىدەي شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.

قىتايدا قازاقتىڭ كيىز ءۇي مادەنيەتىن دامىتۋ پاركى قۇرىلدى - CNR

قىتايداعى اقساي قازاق اۆتونوميالى اۋدانى ساياحات كاسىبىن ۇلتتىق مادەنيەتپەن بىرگە دامىتۋدىڭ ءتيىمدى ەكەنىن بىلگەن. سول ءۇشىن ولار تۋريزمدى مىقتاپ ىلگەرىلەتۋ ءۇشىن قازاقتىڭ كيىز ءۇي مادەنيەتىن پايدالانۋ كەرەك دەپ شەشتى، دەپ حابارلايدى kazakcnr.com سايتى.

اقساي اۋدانىنىڭ قازاق كيىز ءۇيى مەن بيزنەستى قاتار دامىتۋدى ماقسات ەتكەن پاركتە كوڭىل اشۋ الاڭى، جاساندى تاۋ، شاعىن كول سياقتى كورىنىس اۋداندارى سالىنعان. سونداي- اق 13 قازاق كيىز ۇيىنەن دايىندالعان قوناقجاي ازىرلەندى.

اتالعان ورىن جاۋاپتىسىنىڭ ايتۋىنشا، دەمالىس پاركى بيىل مامىردىڭ باسىندا جۇمىس ىستەي باستاعان. كيىز ءۇيدىڭ ءىشى قازاق ۇلتىنىڭ مادەنيەتى بويىنشا بەزەندىرىلىپ، ۇلتتىق ەرەكشەلىككە، داستۇرگە ساي قوناق قابىلدايدى. اقسايعا كەلگەن تۋريستەر قازاقتىڭ كيىز ۇيىنەن جاسالعان ۇلتتىق ەرەكشەلىككە يە قوناق ۇيلەر كوڭىلدەرىنەن شىققانىن ايتادى.

«وزگەشە ۇلتتىق ەرەكشەلىككە يە، تازالىق شارت- جاعدايى جاقسى، جۋىنۋعا دا قولايلى، قاي جاعىنان بولسادا زاماندىق تالاپقا ساي ەكەن. باسقا قوناقۇيلەرمەن سالىستىرعاندا ادامعا ۇلتتىق مادەنيەتتىڭ وزگەشەلىگىمەن تاڭداندىرادى» دەيدى تۋريستەردىڭ ءبىرى.

«اتالعان دەمالىس پاركىنە قوناقتاردىڭ بەرگەن جاقسى پىكىرلەرىنەن كەيىن جەرگىلىكتى ۇكىمەتتە ولاردى قولداي باستادى»، دەپ تۇيىندەيدى قىتايلىق ب ا ق.

تاشكەنت ەڭ ارزان قالا دەپ تانىلدى – ءو ز ا

حالىقارالىق «Mercer» كونسالتينگتى كومپانياسىنىڭ ماماندارى وتكىزگەن زەرتتەۋلەرگە وراي تاشكەنت قالاسى شەتەلدىكتەر ءۇشىن ءومىر سۇرۋگە ەڭ قولايلى قالا ەكەنى ايتىلادى، دەپ جازادى ءو ز ا مەملەكەتتىك اقپارات اگەنتتىگى.

اتالعان اقپارات كوزىنىڭ دەرەگىنە سۇيەنسەك، كومپانيا ساراپشىلارى جۇرگىزگەن زەرتتەۋدە گونكونگ - ءومىر سۇرۋگە ەڭ قىمبات قالا دەپ تانىلعان. قىزىقتى تۇسى - شەتەلدىك ماماندار ءومىر ءسۇرۋدىڭ قىمبات قالالار اراسىندا ەكىنشى ورىنعا تۇركىمەنستان استاناسى اشحاباد قالاسى جايعاسقان. كەيىنگى ورىنداردا توكيو، سيۋريح، سينگاپۋر، سەۋل جانە شاڭحاي سىندى الىپ شاھارلار ورىن العان. ال تاشكەنت قالاسى بۇل رەيتينگتە ەڭ ارزان قالالار تىزىمىنە ەنگەن.

يراندا كوروناۆيرۋستى انىقتاۋ ءۇشىن 72 ميلليون ادامعا سكرينينگ جاسالدى - Parstoday.com

يراندا كوروناۆيرۋسپەن كۇرەسۋ ۇلتتىق جوباسى بويىنشا 72 ميلليون ادامعا سكرينينگ جاسالدى، دەپ جازادى فارس اقپارات اگەنتتىگى.

اتالعان ب ا ق- تىڭ دەرەگىنشە، يرانداعى كوروناۆيرۋسپەن كۇرەس ۇلتتىق شتابىنىڭ ۇيلەستىرۋشى ديرەكتورى كوروناۆيرۋسقا قارسى ۇلتتىق جوباسى بويىنشا ەلدە 72 ميلليون ادامعا سكرينينگ جاسالعانى حابارلانعان.

«فارس» اقپارات اگەنتتىگىنىڭ مالىمەتىنشە، ناسروللا فاتاحيان بەيسەنبى كۇنى يراننىڭ دەنساۋلىق ساقتاۋ مينيسترلىگىنىڭ دەنساۋلىق ساقتاۋ ورتالىقتارى مەن قارۋلى كۇشتەردىڭ كومەگىمەن 2 ايدىڭ ىشىندە 72 ميلليون يراندىققا سكرينينگ جاسالعانىنا توقتالعان. «بۇل جۇمىستى دۇنيەجۇزىلىك دەنساۋلىق ساقتاۋ ۇيىمىنىڭ ەرەكشە اتاپ ءوتتى»، - دەگەن ول.

موڭعولياعا قازاقستاننان بارعان 3 ادامنان كوروناۆيرۋس تابىلدى – Kaznews

موڭعوليا دەنساۋلىق ساقتاۋ مينيسترلىگىنىڭ 12 - ماۋسىم كۇنگى باسپا ءسوز ماسليحاتىندا جۇقپالى اۋرۋلاردى زەرتتەۋ جونىندەگى ۇلتتىق ورتالىعىنىڭ ديرەكتورى د. نيامحۇۇ مالىمەت بەردى، دەپ حابارلايدى موڭعوليالىق Kaznews اقپارات پورتالى.

موڭعوليالىق ب ا ق كەلتىرگەن دەرەككە سۇيەنسەك، د. نيامحۇۇ مىرزانىڭ ايتۋىنشا، ءبىر تاۋلىكتە ەل بويىنشا 241 ادامنان سىناما الىنعان. ونىڭ 238-ىنەن كوروناۆيرۋس انىقتالماعان. 10- ماۋسىم كۇنى نۇر- سۇلتان- ۇلانباتىر باعىتى بويىنشا ۇشاقپەن كەلگەن 184 ازاماتتىڭ ۇشەۋىن جۇقپالى اۋرۋلاردى زەرتتەۋ جونىندەگى ۇلتتىق ورتالىعىنا وقشاۋلاعان.

ولاردان كوروناۆيرۋس انىقتالماعان. ءبىراق قالعان 181 ازاماتتىڭ زەرتتەۋ قورىتىندىسىنان 3 ادام كوروناۆيرۋس ىندەتىمەن اۋىرعانى بەلگىلى بولعان. «جالپى ەل بويىنشا اۋىرعاندار سانى - 197-گە جەتىپ، ونىڭ 95- ءى جۇقپالى ىندەتتەن ايىعىپ شىققان. ەم قابىلداپ جاتقاندار سانى 102. ەل كولەمىندە كوروناۆيرۋس انىقتايتىن التى لابوراتوريا جۇمىس جاساۋدا. باتىس ولكەدە حوبدا قالاسىندا، شىعىس ولكەدە دورنودتا، دارحان قالاسىندا جانە ۇلانباتىردا ءۇش لابوراتوريا جۇمىس ىستەپ تۇر» دەپ جازادى موڭعوليالىق ب ا ق.

ايتا كەتۋ كەرەك، قازاقستان رەسپۋبليكاسىنىڭ موڭعولياداعى ەلشىلىگىنىڭ ۇسىنىسىمەن موڭعول تاراپىنىڭ قولداۋىمەن 2020 -جىلعى 10 - ماۋسىمدا تاڭعى ساعات 8.00-دە ۇلانباتىر - نۇر- سۇلتان باعىتى بويىنشا «MIAT» موڭعوليانىڭ مەملەكەتتىك اۋە كومپانياسىنىڭ ارنايى چارتەرلىك رەيسى ۇيىمداستىرىلدى. وسى ۇشاقپەن قازاقستان رەسپۋبليكاسىنىڭ 96 ازاماتى وتانىنا قايتارىلدى.

تۇركيا كوروناۆيرۋسقا قارسى ءدارى جاسادى- TRT

Favipiravir اتتى ءدارىنىڭ وتاندىق سينتەزى ليتسەنزيا الۋ ساتىسىنا جەتتى. وسىعان بايلانىستى تۇركيا رەسپۋبليكاسى ونەركاسىپ جانە تەحنولوگيا ءمينيسترى مۇستافا ۆارانك كوروناۆيرۋسقا قارسى وتاندىق ءدارى جاسالعانىن ايتتى، دەپ حابارلايدى تۇركيا راديوتەلەۆيزيا پورتالى.

تۇرىك ءدارىسىن 32 ادامدىق كوماندا 40 كۇندە ءوندىرىپ شىققان. ءدارىنى جەتىلدىرگەن ىستانبۇل مەديپول ۋنيۆەرسيتەتى وقىتۋشىسى مۇستافا گۇزەل جانە ءدارىنى يندۋستريا دەڭگەيىنە جەتكىزگەن اتاباي حيميا ونەركاسىبى فيرماسىنىڭ باسشىسى مەن TÜBİTAK ءتوراعاسى پروفەسسور حاسان ماندا تاراپىنان مينيستر ۆارانكقا تاپسىردى.

«تۇرىك دارىگەرلەرى كوروناۆيرۋستا كوپ قولدانعان ءدارىنىڭ وتاندىق سينتەزىن عالىمدارىمىز ىستانبۇل مەديپول ۋنيۆەرسيتەتىندە جاساپ شىقتى. اتاباي ءدارى فيرماسى دا وسى ءونىمنىڭ كوممەرتسيالىق ينفراقۇرىلىمىن دايىندادى. وتاندىق سينتەزبەن جەتىلدىرىلگەن ماڭىزدى ءدارى وندىردىك»، - دەدى ت ر ونەركاسىپ جانە تەحنولوگيا ءمينيسترى مۇستافا ۆارانك.

« Covid-19تۇركيا پلاتفورماسى شاڭىراعى استىندا قازىر 17 جوبا ءجۇرىپ جاتىر. بۇلاردىڭ كەيبىرى ۆاكسيناعا بايلانىستى، كەيبىرى ءدارى جەتىلدىرۋگە بايلانىستى جۇمىس ىستەيدى» دەپ تۇيىندەيدى TRT.

اۋىلدا وتكەن اقىندار ايتىسى - CNR

قىتايدىڭ قوبىقسارى اۋدانى باينوبا اۋىلىنىڭ «توتو» سازدىق باقشاسى دۋمانعا بولەندى. ادام شوعىرى مولايىپ، جاعىمدى مۋزىكا مەن كورەرمەننىڭ قۋانىشتى ۇنىنە تولدى. سەبەبى، بۇل ارادا ءداستۇرلى ەرەكشەلىككە يە مادەنيەت جانە ۇلتتىق سپورت ويىندارى ءوتىپ جاتقان ەدى، دەپ حابارلايدى kazakcnr.com اقپارات پورتالى.

«اۋىل اقىندارى ايتىس ونەرى ارقىلى كورەرمەننىڭ ىستىق ىقىلاسىنا بولەندى. ولار ءازىل- قالجىڭ ارالاس تارتىمدى ولەڭدەرى ارقىلى قازاق حالقىنىڭ مادەنيەت جاۋھارىن، ەڭبەك ەتىپ جاتقان قاراپايىم تۇرمىسىن، مادەنيەتتى قاستەرلەيتىن، بولاشاق ومىرگە دەگەن ارمانعا تولى سەنىمدەرىن جىرعا قوستى. اقىنداردىڭ تارتىمدى ايتىسى، كۇيشىلەردىڭ قۇلاق قۇرىشىن قاندىرا شەرتكەن كۇيلەرى، انشىلەردىڭ تامىلجىتا سالعان ءانى كورەرمەندەردىڭ قۇلاق قۇرىشىن قاندىردى» دەپ جازادى قىتايدىڭ «ورتالىق حالىق راديوسى».

اۋىلدا وتكەن «اقىندار ايتىسى» دەپ اتالعان مادەني شارانىڭ سوڭىندا ۇلتتىق ات سپورتىنىڭ ويىندارى وتكەن. شاباندوزدار شەبەر ات ونەرىمەن كورەرمەندى تاڭداندىرىپ، سپورت الاڭىن دۋمانعا بولەگەن. بۇل جولعى مادەني شارا قازاق ۇلتىنىڭ تاريحي مادەنيەتى مەن مول مازمۇندى ۇلتتىق سالت- سانا، عۇرىپ- ادەتىن تولىق ايگىلەپ بەردى. سونىمەن بىرگە جەرگىلىكتى حالىق پەن تۋريستەردى قازاق حالقىنىڭ ەشكىمگە ۇقسامايتىن مادەني ويىن تۇرلەرىمەن سۋسىنداتتى.

ايتا كەتۋ كەرەك، قوبىقسارى اۋدانىندا «اقىندار ايتىسى» دەپ اتالاتىن كەڭ كولەمدەگى مۇنداي مادەني شارا جىل سايىن ءار اۋىلدا ءوتىپ وتىرادى ەكەن.

مەشحەد - يراننىڭ ەرەكشە قولونەر ورتالىعى – فارس

مەشحەد قالاسى - قولونەر تۇرلەرىنىڭ الۋاندىعىنا، تۇراقتى جۇمىس ورنىن اشۋىنا، تۋريست پەن ينۆەستيتسيا تارتۋىنا بايلانىستى يراننىڭ مۇنايدان تىس ونىمدەرىن ەكسپورتتاۋ جانە قولونەر كاسىبىنىڭ ورتالىعى سانالادى، دەپ حابارلايدى parstoday.com.

«تاس قاشاۋ، كوگىلدىر اقىقتان بۇيىم جاساۋ، مىس ىدىستاردىڭ بەتىنە ورنەك سالۋ، قىش جانە كەراميكالىق، بىلعارى بۇيىمدار جاساۋ، اعاشتان ويىپ ورنەك سالۋ مەشحەدتەگى قولونەر تۇرلەرىنىڭ قاتارىنا جاتادى. تاس قاشاۋ - حوراسانعا ءتان قولونەر ءتۇرى. ونىڭ 5 مىڭ جىلدىق تاريحى بار. مەشحەد - باعزى زاماننان بەرى نيشاپۋر اقىعىن وڭدەيتىن جەر. الەمدەگى ەڭ ساپالى ءارى باعالى اقىق نيشاپۋردا وندىرىلەدى. حوراسان- ەرازاۆي وبلىسىندا 22-گە جۋىق قىمبات جانە جارتىلاي قىمبات تاس انىقتالعان» دەپ جازادى parstoday.com.

وسىنداي ەرەكشەلىگى ءۇشىن مەشحەد قالاسى 2016 -جىلى دۇنيەجۇزىلىك قولونەر كەڭەسى تاراپىنان قىمبات تاس وڭدەۋ ونەرىنىڭ دۇنيەجۇزىلىك قالاسى دەپ تانىلدى.

اۆتور: بەيسەن سۇلتان