مينيستر قارجى پيراميدالارىنىڭ ءۇش بەلگىسىن اتادى

نۇر- سۇلتان. قازاقپارات - قارجى ءمينيسترى ەرۇلان جاماۋبايەۆ قارجى پيراميدالارىنىڭ ءۇش ەرەكشەلىگىن اتاپ، حالىقتى ساق بولۋعا شاقىردى، دەپ حابارلايدى قازاقپارات ءتىلشىسى.

«كەيبىر پيعىلدى ادامدار باسقا ازاماتتاردىڭ ومىرلىك قيىن كەزەڭىن، حالىقتىڭ قارجىلىق ساۋاتسىزدىعىن پايدالانىپ، قارجى پيراميدالارىن قۇرادى. ولاردىڭ ماقساتى - حالىقتىڭ قاراجاتىن قالتاعا باسۋ. مۇنداي زاڭسىز ۇيىمداردىڭ جولىن كەسۋ جۇمىستارىن ەكونوميكالىق تەرگەۋ قىزمەتى مەن ءى ءى م جۇرگىزەدى. بيىلدىڭ وزىندە ەكونوميكالىق تەرگەۋ قىزمەتى بۇل باعىتتا 21 قىلمىستىق ءىس قوزعاعان. سونىمەن بىرگە پسيەۆدولوتورەيا ماسەلەسى دە بار. مۇنداي ىسپەن اينالىسقان ادامدار الماتىدا انىقتالعان بولاتىن. اۆتوكولىك ويناتىپ، ارتىنشا سەنىپ قالعان ازاماتتاردىڭ قاراجاتىن جىمقىرعان»، - دەدى ەرۇلان جاماۋبايەۆ حالىق ونلاين ەسەپ بەرۋدەن كەيىن و ك ق- دا ۇيىمداستىرىلعان باسپا ءسوز ءماسليحاتىندا.

ءمينيستردىڭ ايتۋىنشا، قارجى پيراميداسىنا قاتىستى الماتىداعى ءىس بويىنشا 200 ميلليون تەڭگە شىعىن كەلتىرىلگەن. ارىزدانۋشىلاردىڭ سانى 2 مىڭنان اسىپ كەتكەن. قازىر ول ءىس بويىنشا ەكى ادام قىلمىستىق ىسكە تارتىلۋدا.

«مۇنداي قىلمىستاردىڭ الدىن الۋ ءۇشىن قانداي جۇمىستاردى قولعا الىپ جاتىرمىز؟ ەڭ ءبىرىنشى كەزەكتە، ب ا ق ارقىلى ءتۇسىندىرۋ جۇمىستارىن جۇرگىزەمىز. ازاماتتاردى ساق بولۋعا شاقىرامىز. الەۋمەتتىك جەلىلەرگە مونيتورينگ جاسايمىز. سونىمەن بىرگە ءبىزدىڭ قارجىلىق بارلاۋ قىزمەتى ەكىنشى دەڭگەيلى بانكتەرگە قارجى پيراميدالارىنىڭ تيپولوگياسىن جولدايدى»، - دەدى ول.

ەرۇلان جاماۋبايەۆ قارجى پيراميدالاردىڭ ءبىرىنشى قاتىسۋشىلارى كىرىسكە كەنەلگەنىمەن، ودان كەيىنگى تارتىلعاندارى وپىق جەيتىنىن جەتكىزدى.

«قارجى پيراميدالارىنىڭ ءبىر بەلگىسى - ۇيىمداستىرۋشىلار بانك دەپوزيتتەرىنەن كوپ تابىسقا كەنەلەتىڭىزگە ۋادە بەرەدى. ەكىنشىدەن، كىرىسكە قانداي جاعدايدا بولماسىن كەنەلەتىنىڭىزگە سەندىرەدى. ۇشىنشىدەن، مۇنداي ۇيىمدار قارجىلىق جاعىنان اشىق بولمايدى. سونىمەن قاتار ولار جارناما ءۇشىن الەۋمەتتىك جەلىنى ەرەكشە پايدالانادى. مۇنداي بەلگىلەردى سەزىپ، كورىپ قالساڭىز، ساق بولعانىڭىز ءجون»، - دەدى ول.

اۆتور: ايان بەكەن ۇلى