تۇركيا تۋريستەر ءۇشىن شەكاراسىن اشتى

انكارا. انادولى- قازاقپارات - بەيسەنبى كۇنى تۇركيا تۇرىك جانە شەتەل ازاماتتارىنىڭ ەلگە كىرىپ- شىعۋىنا رۇقسات بەردى.

بۇل تۋرالى قازاقپارات انادولى اگەنتتىگىنە سىلتەمە جاساپ حابارلايدى. مۇنداي شەشىم ەل پرەزيدەنتى رەدجەپ تايىپ ەردوعان باسشىلىعىمەن وتكەن مينيسترلەر كابينەتى وتىرىسىنان كەيىن قابىلداندى. اۋە تاسىمالى دەنساۋلىق ساقتاۋ، سىرتقى ىستەر جانە كولىك مينيسترلىكتەرىمەن بىرلەسىپ ۇيلەستىرىلەدى. تۇركياعا كەلگەن تۇرىك جانە شەتەل ازاماتتارى مەديتسينالىق تەكسەرىستەن وتەدى. جاڭا جارلىق ەلدىڭ بارلىق پروۆينتسيالارىنا جىبەرىلدى.

ەسكە سالا كەتەيىك، 11-ماۋسىمداعى جاعداي بويىنشا تۇركيادا كوروناۆيرۋس ينفەكسياسىنىڭ 987 جاڭا دەرەگى تىركەلگەن. 1021 ناۋقاس ساۋىعىپ شىقسا، 17 سى ۆيرۋستان كوز جۇمعان. امەريكالىق جونس حوپكينس ۋنيۆەرسيتەتىنىڭ مالىمەتىنشە، الەمدە 459500 دەن استام ادام كوروناۆيرۋس پاندەمياسىنان قايتىس بولعان. كوروناۆيرۋستىڭ راستالعان جاعدايلارىنىڭ سانى - 7,72 ميلليون.