الەم ەلدەرىندە ناسىلشىلدىككە قارسى شەرۋلەر جالعاسۋدا
بريتانيادا دەمونستراتسيالار لوندون، مانچەستەر، كارديففە مەن وزگە دە قالالاردا ءوتتى. لوندوندا دەمونسترانتتار تىزە بۇگىپ: «ادىلدىك جوق، بەيبىتشىلىك جوق!» دەپ ايعايلاۋدا. كوروناۆيرۋس جۇقتىرۋ قاۋپىنە بايلانىستى ۇكىمەت حالىققا توپ بولىپ جينالماۋعا كەڭەس بەردى. ءبىراق ادامدار بۇعان قاراماستان، دەمونستراتسيالارعا شىعىپ جاتىر. شەرۋلەردىڭ بارلىعى دەرلىك بەيبىت ءوتتى. الايدا، كەشكە داۋنينگ- ستريتتەگى پرەمەر- مينيستر رەزيدەنتسياسىنىڭ جانىندا نارازىلىققا قاتىسۋشىلار مەن پوليتسيانىڭ اراسىندا قاقتىعىستار بولدى. سوڭعى مالىمەتتەر بويىنشا، اكتسيالار كەزىندە كەم دەگەندە 23 پوليتسيا قىزمەتكەرى جاپا شەككەن. نارازىلىق بىلدىرۋشىلەر بيلىكتىڭ بۇقارالىق شارالارعا جينالماۋ تۋرالى ءوتىنىشىن ەلەمەدى.
لوندوندا دەمونسترانتتاردىڭ كوبى ماسكا مەن قولعاپ كيىپ شىقتى. كەيبىرەۋلەر «COVID-19-دان دا جامان ۆيرۋس بار، ول - ناسىلشىلدىك» دەگەن جازۋى بار پلاكاتتار كوتەرىپ ءجۇردى. سولتۇستىك يرلانديادا پوليتسيا كوپتەگەن ادامعا ايىپپۇل سالدى. سەبەبى حالىقتىڭ توپتاسىپ جينالۋىنا ءالى دە تىيىم سالىنعان. ۆاشينگتوندا دا مىڭداعان ادام ناسىلشىلدىك پەن پوليتسيانىڭ زورلىق- زومبىلىعىنا نارازىلىق ءبىلدىرىپ، تاعى دا كوشەگە شىقتى. دەمونستراتسيالار كاپيتوليي توبەشىگىندە جانە اقۇيدىڭ جانىندا ءوتتى. ا ق ش- تاعى اكتسيالار 12 كۇننەن بەرى جالعاسىپ جاتىر. سەنبىدە كانادانىڭ تورونتو قالاسىندا بىرنەشە مىڭ ادام كوشەگە شىقتى. جەرگىلىكتى پوليتسيا بارلىق دەمونستراتسيالار بەيبىت تۇردە ءوتىپ جاتىر دەپ حابارلادى. شەرۋگە قاتىسۋشىلار «ادىلدىك جوق، بەيبىتشىلىك جوق» دەگەن ترانسپارانتتار جازىپ العان.
فرانتسياداعى ناسىلشىلدىك پەن پوليتسيانىڭ زورلىق- زومبىلىعىنا قارسى اكتسيالارعا 20 مىڭنان استام دەمونسترانت قاتىستى. ليلل قالاسىنىڭ پوليتسياسى سەنبىدە نارازىلىق بىلدىرۋشىلەردى توقتاتۋ ءۇشىن كوزدەن جاس اعىزاتىن گازدى قولدانعان. گەرمانيا استاناسى بەرليندە ناسىلشىلدىككە قارسى شەرۋگە 15 مىڭعا جۋىق ادام قاتىسقان. جەرگىلىكتى ب ا ق- تىڭ حابارلاۋىنشا، الەكساندەرپلاتستىڭ ورتالىق الاڭىنداعى «ءۇنسىز نارازىلىق» اكتسياسى بەيبىت جانە پوليتسيامەن ەش قاقتىعىسسىز ءوتتى. اكتسياعا كوپشىلىگى قارا ءتۇستى كيىنىپ، اسفالتتا 8 مينۋت 46 سەكۋند ءۇنسىز وتىردى. ءدال وسىنشا ۋاقىت بويى پوليتسيا قىزمەتكەرى قازا بولعان افروامەريكالىق دجوردج فلويدقا تۇنشىقتىرۋ ءادىسىن قولدانعان ەدى.
بەرليندەگى شەرۋ بەيبىت ءوتتى. ءبىراق قاشىقتىقتى ساقتاۋ تالابى ساقتالمادى. الەم بويىنشا نارازىلىق ينتەرنەتتە پوليتسەي تۇنشىقتىرعان دجوردج فلويدتىڭ ميننەاپوليستە قاماۋعا الىنعانى كورسەتىلگەن ۆيدەوجازبا جاريالانعاننان كەيىن باستالدى. فلويد قارۋسىز بولعان. پوليتسەي ونى جەرگە جاتقىزىپ، تىزەسىمەن موينىنان توعىز مينۋت باسىپ تۇرعان. پوليتسيا قىزمەتكەرىنە كىسى ءولتىردى دەگەن، ال ونىڭ ءۇش ارىپتەسى بۇل وقيعاعا قاتىسى بار دەپ ايىپتالدى.