بالانىڭ بولاشاعىنا ىقپال ەتەتىن ءۇش ادام - شەتەلدەگى قازاق ءتىلدى ب ا ق- قا شولۋ

نۇر- سۇلتان. قازاقپارات - «قازاقپارات» ح ا ا شەت مەملەكەتتەردە قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.

بالانىڭ جارقىن بولاشاعىنا ىقپال ەتەتىن ءۇش ادام بار - قىتايدىڭ «ورتالىق حالىق راديوسى» (CNR)

بالالار قانداي اداممەن ەتەنە بايلانىستا بولسا، ومىرلىك ساپارىن ءدال سول تۇلعا سياقتى باستايدى. بالاعا ەڭ جاقىن ءۇش ادام بالانىڭ ءومىر جولىنا باعدار سىلتەيدى، دەپ جازادى kazakcnr.com سايتى.

«بالانىڭ كىم بولۋىن بەلگىلەيتىن ءۇش ادام» اتتى تانىمدىق ماقالادا پەرزەنت تاربيەسىندەگى وزەكتى ماسەلەلەر تۋرالى وي قوزعالعان. وندا بالا بولاشاعىنىڭ جارقىن بولۋىنا تىكەلەي ىقپال ەتەتىن - اتا- اناسى مەن ۇستازى ەكەنى ايتىلعان. تومەندە وسى ماقالانىڭ ىقشامدالعان وزەكتى دەگەن تۇسى بەرىلىپ وتىر.

***

«اكە ـ اسقار تاۋ» دەيدى حالقىمىز. مىنە، وسىدان- اق اكەنىڭ بالا ءۇشىن كىم ەكەنىن تۇسىنە قويامىز. اكە ـ پەرزەنت ءومىرىنىڭ جارقىن بولاشاعىنا نەگىز قالايتىن تۇلعا. وتباسىندا اكە بالانىڭ - ەڭ جاقسى ۇلگىسى، تاماشا ۇستازى. ادەتتە، بالالار اكە بويىنداعى تاڭداۋلى قاسيەتتى وزىنە ماقتان تۇتادى جانە وزىنە دە وسى ولشەممەن تالاپ قويادى. اكەسى ۇنەمى سەرىك بولاتىن، اكە قامقورلىعىنا بارىنشا بولەنگەن بالا كۇندەلىكتى ومىردە باتىل، ءوز- وزىنە سەنىمدى، باسقالارمەن ارالاسقاندا جاسقانشاقتاماي، تۋرا سويلەپ، ءوزىن ەركىن ۇستايدى. امەريكانىڭ يەل ۋنيۆەرسيتەتىنىڭ زەرتتەۋىنشە، ەر ادامعا ىلەسىپ ەسەيگەن بالالاردىڭ اقىل- وي ورەسى جاقسى دامىپ، مەكتەپتەگى ۇيرەنۋ ناتيجەسى دە ۇزدىك بولادى ەكەن. ولار قوعامعا شىققان سوڭ جۇمىسىن تابىستى ىستەي الادى. سوندىقتان، پەرزەنتىم ۇزدىك بولسىن دەسەك، اكەلەردىڭ وي ءورىسى كەڭ بولۋى، كوبىرەك ۋاقىت ءبولىپ، بالالارمەن بىرگە بولۋى قاجەت. اكەنىڭ ۇزدىك بولۋى - بالا ءۇشىن تاپتىرماس تاربيە!

انا كۇللى عالامعا ءۇن- ءتۇنسىز عانا تىرشىلىك ءنارىن سىيلاپ، ءومىر بەرىپ تۇرعان سۋعا ۇقسايدى. ول وتباسىنا جىلۋلىق سىيلايدى، بالاعا سۇيىسپەنشىلىك نۇرىن سەۋىپ، نازىكتىكتى، بيازىلىقتى ۇيرەتەدى. بالانىڭ كىسىلىگى، مەيىرىمدى، مەرەيلى بولۋى اناسىنان كەلەدى. سابيلەر ادەتتە ەڭ كوپ ۋاقىتتى اناسىمەن بىرگە وتكىزەدى. انالار الەمنىڭ جارىعىن سىيلاعاننان باستاپ- اق، بالالار نەگىزىنەن وعان يەك ارتۋمەن بولادى. ايەلدىڭ مىنەز- قۇلقى جايدارى، جانۇيانى شاتتىققا بولەي السا، بالالاردىڭ كوڭىل- كۇيى ورنىقتى، ورتاق شاڭىراق ورداسى ءتاتۋ- ءتاتتى كەلەدى. ال، كەرىسىنشە، مىنەزى ناشار، ۇنەمى داۋىس كوتەرە سويلەپ، باسقالارعا اشۋ شاقىرا جونەلەتىن ادەتى بولسا، بالا دا كەرى ىقپالعا ۇشىرايدى. ونداي ورتادا وسكەن بالاڭىز تىم جاسىق، قورعانشاق، ۋايىمشىل نە وتە ىزاقور، اشۋشاڭ بولىپ ەرجەتەدى.

بەلگىلى عالىم ۋيليام دەيمون «ماقساتقا اپارار جول» اتتى كىتابىندا «بالانىڭ ەسەيۋىندە وتباسىنان بولەك ماڭىزدى ءرول اتقاراتىن ەرەكشە ادام - ۇستاز» دەيدى. «ءبىر كۇندىك ۇستاز ـ مىڭ كۇندىك اكە» دەگەن ەكەن بۇرىنعىلار. وسىدان- اق، ۇستازدىق ەتۋشى كىسىنىڭ بالاعا بولاتىن ىقپالى قانشالىق ەكەنىن بىلە بەرىڭىز. كۇندەلىكتى ساباق بارىسىندا وقۋشى ءبىر پەداگوگتى ۇناتپاي قالسا، ونىڭ سول ءمۇعالىم بەرەتىن ساباقتى ۇيرەنۋگە ىقىلاسى ازايادى. ال كەرىسىنشە، وقۋشى ۇستازدى جاقسى كورەتىن بولسا، ونىڭ ءپانىن ۇيرەنۋدەن ەش جالىقپايدى.

«ۇستازى جاقسىنىڭ - ۇستامى جاقسى» دەيتىن اتالى ءسوز بار. وقىتۋشى بالانىڭ ءبىلىم الۋ كوزقاراسىنا اسەر ەتە الادى. ۇستاز بالاعا ۇيرەنۋدىڭ ۇزدىك ناتيجەسىن سىيلاي الماسا دا، ولاردى ءبىلىم الۋدى سۇيەتىن، ىنتالى ەتىپ تاربيەلەي الادى. مۇنداي وقىتۋشىنىڭ قولىنان شىققان بالا ۇيرەنۋدەن مەزى بولمايدى، قاشقالاقتامايدى. تاربيەنىڭ ارتىقشىلىعى مىنە، وسىندا. وقىتۋشىنىڭ كىشكەنتاي عانا ءىس- ارەكەتى وسىنشاما كەرەمەت ناتيجە جاراتا الادى.

موڭعوليا رەسەيگە گۋمانيتارلىق كومەك كورسەتەدى – KAZNEWS

موڭعوليا رەسەي فەدەراتسياسىنا كوروناۆيرۋس ىندەتىن جەڭۋگە كومەكتەسۋ ءۇشىن 76 ميلليون رۋبل، ياعني 1 ميلليون ا ق ش دوللارىنا تەڭ كەلەتىن ەت، ەت ونىمدەرىن جىبەرەتىن بولادى، دەپ جازادى موڭعوليالىق KAZNEWS اقپاراتتىق پورتالى.

«ۇكىمەتتىڭ باسپا ءسوز قىزمەتىنىڭ مالىمەتىنشە، موڭعوليا پرەمەر- ءمينيسترى ۋ. حۇرەلسۇح رەسەي فەدەراتسياسىنىڭ موڭعولياداعى توتەنشە جانە وكىلەتتى ەلشىسى ي. ك. ازيزوۆتى قابىلداپ، رەسەي ۇكىمەتى مەن حالقىنا كورسەتكەن گۋمانيتارلىق كومەكتىڭ كۋالىگىن تابىس ەتتى. موڭعوليا مەن رەسەي اراسىنداعى تولىققاندى ستراتەگيالىق ىنتىماقتاستىقتىڭ ودان ءارى دامۋىنا اتالمىش گۋمانيتارلىق كومەك ءوز ۇلەسىن قوساتىن بولادى»، - دەلىنگەن اقپاراتتا.

ەرتە زامانعى قولا شاينەكتىڭ ىشىنەن بەيمالىم سۇيىقتىق تابىلدى - قىتايدىڭ «ورتالىق حالىق راديوسى» (CNR)

قىتايدىڭ حىنان پروۆينتسياسىنداعى ارحەولوگيالىق قازبا جۇمىستار كەزىندە ءپىشىنى ەرەكشە جاسالعان باسى قازعا ۇقساعان قولا شاينەك تابىلدى، دەپ جازادى kazakcnr.com سايتى.

دەرەك كوزىنىڭ مالىمەتىنشە، ەجەلگى قورىمنان تابىلعان وتە ادەمى پىشىندەگى قاز باستى قولا شاينەكتىڭ ىشىندە 3000 ميلليليتردەن استام بەيمالىم سۇيىقتىق ساقتالعان ەكەن.

«ماماندار اتالعان ەجەلگى قابىردى شين پاتشالىعىنىڭ سوڭى مەن حان پاتشالىعىنىڭ باستاپقى كەزەڭىنە تيەسەلى تاريحي قورىم دەپ تۇجىرىمداعان (ءبىزدىڭ زامانىمىزدان بۇرىنعى 206 -جىل) . قابىرگە سول كەزدە دارەجەسى تومەن بولعان ۇلىق جەرلەنگەن دەگەن پايىم بار. بۇل جەردەن قاز باستى قولا شاينەكتەن باسقا، قولا تەگەنە، تەمىر سەمسەر، قاس تاسىنان جاسالعان سەمسەر سەكىلدى بۇيىمدار تابىلدى. ال قاز باستى شاينەكتىڭ ىشىندە ساقتالعان بەيمالىم سارعىش قوڭىر ءتۇستى سۇيىق زاتتىڭ ناقتى قۇرامى مامانداردىڭ زەرتتەۋىنە ۇسىنىلدى»، - دەلىنگەن ماقالادا.

وزبەكستاندا وتاندىق مۋلتفيلمدەردى جاساۋعا 4,4 ميلليارد سۋمنان استام قارجى ءبولىندى - « ءو ز ا» اقپارات اگەنتتىگى

2019 -جىل وزبەكستاندا 12 مۋلتفيلمنىڭ ەكرانعا شىعۋى ءۇشىن بيۋدجەتتەن 4 ميلليارد 458 ميلليون سۋم كولەمىندە قارجى بولىنگەن، دەپ حابارلايدى وزبەكستاننىڭ «ءو ز ا» مەملەكەتتىك اقپارات اگەنتتىگى.

«وزبەككينو» ۇلتتىق اگەنتتىگىنىڭ مالىمەتىنشە، 2019 -جىلدا بيۋدجەتتەن بولىنگەن بۇل قارجىنىڭ 3,4 ميلليارد سۋمى مۋلتيپليكاتسيالىق 9 فيلمنىڭ ەكراندالۋى ءۇشىن مەملەكەتتىك مۋلتيمەديالى ستۋدياعا بەرىلگەن. قالعان 1 ميلليارد 58 ميلليون سۋم 3 انيماتسيالىق تۋىندىنى تاسپالاۋعا جەكە ستۋدياعا اۋدارىلدى. ال بيىلدان باستاپ «وزبەككينو» ۇلتتىق اگەنتتىگى انيماتسيالىق تۋىندىلاردى ەكرانداۋعا ارنالعان مەملەكەتتىك قارجىنى تەك تەندەر ارقىلى بەرۋ جۇيەسىنە كوشكەنىن ايتادى. وندا 3 انيماتسيالىق تۋىندى ءۇشىن تەندەردەن جەڭىسكە جەتكەن ەكى جەكە ستۋديا مەن 1 مەملەكەتتىك شىعارماشىلىق توپ تاپسىرىسپەن جۇمىس باستاعان» ، - دەپ حابارلايدى «ءو ز ا» اقپاراتتىق اگەنتتىگى.

تۇرىك ءتىلىن ۇيرەنۋ بويىنشا حالىقارالىق ونلاين- كۋرس جالعاسۋدا – TRT

ازەربايجان جانە قازاقستاندا جالعاسقان تۇرىك ءتىلىنىڭ ونلاين كۋرستارىنا ەندى تۇرىكمەنستان، وزبەكستان جانە قىرعىزستان قوسىلدى، دەپ جازادى تۇركيا راديو تەليەۆيزيا پورتالى.

«يۋنۋس ەمرە ينستيتۋتىنىڭ تۇركى الەمىنىڭ ستۋدەنتتەرىنە تسيفرلىق تۇرىك ءتىلى كۋرس جۇمىستارى جالعاسۋدا. الپىسقا جاقىن ەلدە قىزمەت اتقاراتىن يۋنۋس ەمرە ينستيتۋتتىڭ باكۋ وكىلدىگى «تۇركيانى جاقىننان تانۋعا قالاي قارايسىڭ؟» دەگەن ۇرانمەن باستاعان ونلاين تۇرىك ءتىلى كۋرسىنا ازەربايجان، قازاقستان، وزبەكستان، قىرعىزستان جانە تۇرىكمەنستاننان 750 ستۋدەنت ءوتىنىش بەردى. تۇرىك ءتىلى كۋرستارى ءبىر جىل بويى جالعاسادى» ، - دەپ جازادى TRT.

يران عىلىم سالاسى بويىنشا الەمدە 15-ورىندا - «فارس» اقپارات اگەنتتىگى

يران يسلام رەسپۋبليكاسىنىڭ پرەزيدەنتى حاسان رۋحاني كوروناۆيرۋسپەن كۇرەس ۇلتتىق شتابىنىڭ وتىرىسىندا يران عىلىم سالاسى بويىنشا الەمدە 15-ورىندا تۇرعانىن ايتتى، دەپ جازادى «فارس» اقپارات اگەنتتىگى.

حاسان رۋحاني كوروناۆيرۋسپەن كۇرەس ۇلتتىق شتابىنىڭ وتىرىسىندا سويلەگەن سوزىندە: «يران عىلىم سالاسىندا الەم بويىنشا - ون بەسىنشى، باتىس ازيا ايماعى مەن يسلام الەمىندە ءبىرىنشى ورىندا»، - دەدى. رۋحاني ءسوزىنىڭ جالعاسىندا ەلدەگى كوروناۆيرۋسپەن كۇرەس سالاسىنداعى مەديتسينالىق پەرسونالدىڭ عىلىمي- زەرتتەۋ جەتىستىكتەرىن قۋاتتاپ: «يراننىڭ مەديتسينا سالاسىنىڭ قىزمەتكەرلەرى ءارقاشان ماقتان تۇتۋعا لايىق بولدى»، - دەپ مالىمدەگەن.

اۆتور: باقىتجول كاكەش