«وسماننىڭ قۇرىلۋى» اتتى تۇرىك سەريالىندا قوبىز تارتقان ەرجانمەن سۇحبات
تۇرىكتىڭ ايگىلى اكتەرى بۋراك ءوزجيۆيت باستى ءرولدى سومدايتىن سەريالدا قوبىز تارتىپ وتىرعان جىگىت - جاڭاقورعاندىق ەرجان ارقاباي ەكەن. تۇركيادا جۇرگەن وتانداسىمىزبەن بايلانىسقا شىعىپ، وسمان يمپەرياسىنىڭ قۇرىلۋ تاريحىن باياندايتىن سەريالدىڭ جوباسىنا قالاي كەلگەنىن ءبىلىپ كورگەن ەدىك. ەرجان ارقاباي تۇركياعا 2014 -جىلى ماگيستراتۋرادا وقۋ ءۇشىن بارعان. ءبىر جىل وتكەننەن كەيىن كونياداعى نەدجيمەتتين ەرباكان ۋنيۆەرسيتەتىنە ءتۇسىپ، «حالىق مۋزىكاسى» ءبولىمىن بىلتىر بىتىرگەن. ەلورداداعى قازاق ۇلتتىق ونەر ۋنيۆەرسيتەتىنىڭ تۇلەگى.
ەرجان تۇركيادا جۇرگەن كەزدە ارسلانبەك سۇلتانبەكوۆ اتتى نوعاي ازاماتىمەن تانىسادى. ارسلانبەكتىڭ ول تۇستا «دومبىرا» اتتى ولەڭى تۇركيادا ءبىرشاما تانىمالدىققا يە بولىپ تۇرعان كەز. «دومبىرا» ءانىن ساياسي پارتيالاردىڭ وكىلدەرى، ءتىپتى «فەنەرباحچە» فۋتبول كلۋبى دا الاڭعا شىرقاپ شىعىپ جۇرگەن شاق. كوپ وتپەي ەرجان دا قازاقتىڭ تاريحي كۇيلەرىنەن قۇرالعان Dijital البومىن جارىققا شىعارىپتى. ال ارسلانبەك پەن ەرجاندى تاريحي سەريالعا تۇسۋگە «Bozdağ Film» كينوستۋدياسى شاقىرعان ەكەن. 2019 -جىلى اتالعان كينوستۋديانىڭ تاپسىرىسىمەن 12 اننەن تۇراتىن البوم جازىلعان. البومعا سۇگىردىڭ تەرمەسى دە ەنگىزىلگەن.
«بيىل قازاقستاندا بولعان ەدىم. ارسلانبەك اعامىز قايتادان تۇركياعا شاقىرىپ الدى. ەندى قازىر بىرلەسە جازعان البومنىڭ كليپتەرىن ءتۇسىرىپ جاتىرمىز. وتكەندە ءجۇنىس امىرەنىڭ «جالعان دۇنيە» اتتى ولەڭىنە، ودان كەيىن ىستانبۇلدىڭ الىنۋىنا بايلانىستى كليپتى دە جارىققا شىعاردىق. تەلەسەريال جۇمىسىنا وسىلاي بىرتە- بىرتە كەلدىك. البومدا «وسمان بەي» اتتى ءان بار. نەگىزى ول ءاننىڭ ءتۇپنۇسقاسى اسەكەڭنىڭ ءوز تۋىندىسى «قوساي» دەپ ورىنداپ جۇرگەن بولاتىن. اقىرى وسى ولەڭ تەلەسەريالعا ەنگىزىلدى. ولەڭ قوبىز جانە دومبىرامەن، سونداي- اق ۇرمالى اسپاپتارمەن ورىندالدى»، - دەيدى ەرجان ارقاباي.
«وسماننىڭ قۇرىلۋى» سەريالىنداعى باستى ءرولدى (وسمان بەي) تۇرىكتىڭ تانىمال اكتەرى بۋراك ءوزجيۆيت سومدايدى. كينوگەرلەر ەرجان مەن ارسلانبەكتىڭ دومبىرا مەن قوبىزدىڭ ءۇنىن ۇيلەستىرىپ، تۇركيا كورەرمەنىن تاڭ- تاماشا قىلىپ جاتقانىن كورىپ، بۇل مۋزىكالىق سينتەزدى الداعى ۋاقىتتا تاريحي سەريالداردىڭ ساۋنترەگىنە جاراتۋ كەرەكتىگىن ايتىپ جاتقان كورىنەدى.
«وسىعان دەيىن «ەرتۇعىرىل» سەريالى ءتۇسىرىلىپ، ول الەم ەلدەرىمەن بىرگە قازاقستاندا دا حالىقتىڭ نازارىنا ىلىنگەنىن بىلەسىزدەر. ەندى تۇركيادا جاڭا جوبا قولعا الىندى. وسمان يمپەرياسىن قۇرعان ەرتۇعىرىلدىڭ ۇلى وسمان بەي جايىندا قازىر سەريال ءتۇسىرىلىپ جاتىر. «وسماننىڭ قۇرىلۋى» تەلەسەريالى سول كەزەڭدەگى تۇرىك حالقىنىڭ باسىنان وتكەن قيىندىقتار مەن جاۋگەرشىلىك زاماندى سيپاتتايدى. بۋراك وزجيۆيتپەن قاتتى بايلانىسقا تۇسە قويمادىق. كوروناۆيرۋس ىندەتىنە بايلانىستى ءتۇسىرىلىم بارىسىندا دا الەۋمەتتىك قاشىقتىقتى ساقتاپ ءجۇرمىز. سەريال وسىدان ءبىر اپتا بۇرىن ءتۇسىرىلىپ، كوپ وتپەي كورسەتىلىمگە بەرىلدى. ءتۇسىرىلىم توبىندا ءبىرشاما اكتەرمەن تانىسىپ ۇلگەردىك. مىسالى، اياز دەگەن ءرولدى سومدايتىن اتيلا گيۋزال گرەك- ريم كۇرەسىنىڭ بالۋانى بولعان ەكەن. گرەك- ريم كۇرەسى بويىنشا حالىقارالىق جارىستاردىڭ جۇلدەگەرى ءارى دوسىم نۇرماحان تىنالييەۆ چەمپيوناتتاردىڭ بىرىندە اتيلامەن كۇرەسكەن ەكەن. مىنە، وسىلايشا، ورتاق دوسىمىزدى دا تاۋىپ الدىق»، - دەگەن ەرجان سەريالدىڭ قاي بولىگىندە وينايتىنىن دا ايتىپ بەردى.
ەرجان مەن ارسلانبەك «وسماننىڭ قۇرىلۋى» سەريالىنا وسمان بەيدى ۇلىقتاۋ تويىنا ارنايى شاقىرىلعان جىراۋ رەتىندە قاتىسادى.
«قوبىز ادامنىڭ ىشكى جان- دۇنيەسىندەگى سەزىمىن بەرە السا، دومبىرانىڭ ەكپىنى رۋحتى اسقاقتاتادى. كەشە Facebook-تەگىپاراقشاما ءبىر كىسى «تۇرىكتىڭ سەريالىندا دومبىرا نەعىپ ءجۇر» دەپ سىني پىكىر قالدىرىپتى. ايتسە دە، مەن بۇل پىكىردى قۇپتاي المايمىن. نەگە دەسەڭىز، دومبىرا - ەكى مىڭ جىلدان استام تاريحى بار اسپاپ. اكادەميك احمەت جۇبانوۆ باستاعان اعالارىمىزعا جانە وسى ۋاقىتقا دەيىن قازاقتىڭ 5 مىڭعا تارتا كۇيىن ساقتاپ قالعان حالىق كومپوزيتورلارىنا، ورىنداۋشىلارىنا مىڭ دا ءبىر راحمەت. ماسەلەن، باسقا ءتۇبى ءبىر تۇرىك حالقىنىڭ ىشىندە مۇنداي مۇراسىن قازاقتاي عاسىردان عاسىرعا جەتكىزگەندەرى نەكەن- ساياق. دومبىرانى ءبىزدىڭ ەل قوڭىر كۇيىمەن، ءداستۇرلى انىمەن بۇگىنگى عاسىرعا دەيىن الىپ كەلدى. ەندى ۇلتتىق اسپابىمىز ءتۇبى ءبىر تۋىستاس ەلدەردىڭ ورتاق قۇندىلىعىنا اينالىپ كەلە جاتىر. قۋانۋ كەرەك دەپ ويلايمىن. تۇرىكتەرگە دومبىرا جات ەمەس. مۇندا ۇلتتىق اسپابىمىزدى باعلامانىڭ اتاسى دەپ بىلەدى. مىسالى ەۋروپا جۇرتى دومبىرانى تۇرىكتەردەي قابىلداي الماسى انىق. ونىڭ سەبەبى - تەكتە» ، - دەيدى ول.
ەرجان ارقاباي تۇركياداعى قانداستارىمىزبەن جاقسى قارىم- قاتىناستا. مۇستافا وزتۇرىك اعامىزدىڭ شاكىرتتەرىمەن تىعىز بايلانىستا ەكەن. ونداعى قازاق باۋىرلارىمىز ەرجاندى تويعا شاقىرىپ كۇي تارتقىزىپ، دومبىرانىڭ اسەم انىمەن سۋسىندايتىن كورىنەدى. وتانداسىمىز ولاردىڭ ۇيىنە قوناققا دا ءجيى بارىپ، قانداستارمەن بايلانىستى ۇزبەۋگە تىرىسادى.
