اتىراۋ وبلىسىنىڭ اكىمى تۇلەكتەرگە «ابايدىڭ قارا سوزدەرى» تۋىندىسىن تارتۋ ەتتى

None
None
اتىراۋ. قازاقپارات - اتىراۋ وبلىسىنىڭ اكىمى ماحامبەت دوسمۇحامبەتوۆ مەكتەپ بىتىرگەن تۇلەكتەردىڭ ءبىر توبىمەن كەزدەسىپ، ولارعا «ابايدىڭ قارا سوزدەرى» كىتابىن تارتۋ ەتتى، دەپ حابارلايدى قازاقپارات.

كەزدەسۋگە اتىراۋ قالاسىندا، اۋداندار مەن اۋىلداردا تۇراتىن 20 دان استام تۇلەك قاتىستى. ولاردىڭ كەيبىرى كەزدەسۋگە ونلاين رەجيمدە قوسىلدى. تۇلەكتەردىڭ كوپشىلىگى - الەۋمەتتىك جاعىنان از قامتىلعان، سونىمەن قاتار، كوپ بالالى وتباسىنان شىققان، جەتىم نەمەسە جارتىلاي جەتىم تۇلەكتەر. بارلىعى دا ءار سالادا جەتىستىككە جەتىپ، وبلىستىق، رەسپۋبليكالىق، سونداي-اق، حالىقارالىق وليمپيادالار مەن ءتۇرلى بايقاۋلاردا جۇلدەلى ورىننان كورىنگەن جاس دارىندار.

وبلىس اكىمى ماحامبەت دوسمۇحامبەتوۆ تۇلەكتەرمەن ەمەن- جارقىن اڭگىمەلەسىپ، ارمان- ماقساتتارىن، ۇسىنىس- پىكىرلەرىن تىڭدادى. ماماندىق تاڭداۋ مەن جوعارى ءبىلىم الۋدىڭ ماڭىزىنا قاتىستى اقىل- كەڭەسىن بەردى. تۇلەكتەر الداعى ۇ ب ت- عا دايىندىعى، تاڭداعان ماماندىقتارى تۋرالى اڭگىمەلەپ، قازىرگى قوعامداعى ماسەلەلەرگە وراي پىكىرلەرىن ءبىلدىردى. اتىراۋ قالاسىندا ورنالاسقان ءا. جانگەلدين اتىنداعى ورتا مەكتەبىنىڭ تۇلەگى ەلدار قۇرماشەۆ - موبيلدى قوسىمشا جاساپ، «جاس ونەر تاپقىش» اتانعان دارىندى جاس. ەندى ول بولاشاعىن اقپاراتتىق تەحنولوگيامەن بايلانىستىرعىسى كەلەدى.

«قازىر الەمدە IT سالاسى قارقىندى دامۋدا. بىردە-ءبىر سالانى وسى تەحنولوگياسىز ەلەستەتۋ مۇمكىن ەمەس. جاھاندىق پاندەميا تسيفرلاندىرۋدىڭ ماڭىزىن تاعى دا دالەلدەپ بەردى. ەلىمىزدە اتالعان سالاعا ايرىقشا كوڭىل ءبولىنىپ وتىر. سوندىقتان، قازىردەن باستاپ جاڭا تەحنولوگيانى مەڭگەرۋدىڭ ماڭىزىن ەسكەرۋ كەرەك. بۇگىن موبيلدى قوسىمشا جاساساڭ، ەرتەڭ IT سالاسىندا ادامزاتتىڭ يگىلىگىنە اينالاتىن جاھاندىق دەڭگەيدەگى جاڭالىق اشارىڭا سەنەمىن. ارمانىڭا جەت، ەلدار»، - دەدى وبلىس اكىمى ماحامبەت دوسمۇحامبەتوۆ.

اكىم مەكتەپ ءبىتىرۋشى تۇلەكتەرگە اق جول تىلەپ، ولاردىڭ ۇستازدارىنا العىسىن ءبىلدىردى. كەزدەسۋدى اتىراۋ قالاسىنىڭ امانگەلدى اتىنداعى ورتا مەكتەبىنىڭ تۇلەگى ايبەك كارىموۆ ابايدىڭ «كوزىمنىڭ قاراسى» انىمەن تۇيىندەدى.

جۇزدەسۋگە قاتىسقان تۇلەكتەر مەن ءبىلىمدى شاكىرتتەر تاربيەلەپ، كاسىبي باعىتتاعى جەتىستىكتەرىمەن تانىلعان پەداگوگتارعا «ابايدىڭ قارا سوزدەرى» كىتابى تابىس ەتىلدى. ال، شاراعا ونلاين رەجيمدە قاتىسقان تۇلەكتەرگە بۇل سىيلىق جەتكىزىلىپ بەرىلەدى.

ەسكە سالا كەتەلىك، بۇعان دەيىن اتىراۋلىق وقۋشى whatsapp مەسسەندجەرىنىڭ بالاماسىن جاساپ شىعارعانىن جازعان ەدىك.

سوڭعى جاڭالىقتار