اسقار مامين ەكونوميكانى جاڭعىرتۋ جونىندەگى مەملەكەتتىك كوميسسيانىڭ وتىرىسىن وتكىزدى

نۇر-سۇلتان. قازاقپارات – ق ر پرەمەر-ءمينيسترى اسقار مامين ەكونوميكانى جاڭعىرتۋ جونىندەگى مەملەكەتتىك كوميسسيانىڭ وتىرىسىن وتكىزدى، دەپ حابارلايدى ۇكىمەتتىڭ رەسمي سايتى.

قاراعاندى وبلىسى ساران قالاسىنداعى بۇرىنعى رەزينا تەحنيكا بۇيىمدارىنىڭ زاۋىتى بازاسىندا ءىرى ونەركاسىپ جوبالارىن ىسكە اسىرۋ ماسەلەلەرى قارالدى.

اتاپ ايتقاندا، «Yutong» ماركالى اۆتوبۋستار مەن ارنايى تەحنيكانى قۇراستىرۋدى ۇيىمداستىرۋ جوسپارلانعان. جوباعا سالىناتىن ينۆەستيتسيا كولەمى 22 ميلليارد تەڭگەنى قۇرايدى. كاسىپورىننىڭ جوبالىق قۋاتى - جىلىنا 1200 اۆتوبۋس جانە 500 ارنايى تەحنيكا مەن ارنايى كولىك قۇراستىرۋعا مۇمكىندىك بەرەدى.

سونىمەن قوسا «Doublestar» ماركالى اۆتوموبيل دوڭگەلەگىن ءوندىرۋ جولعا قويىلادى. جوباعا 56 ميلليارد تەڭگە ينۆەستيتسيا سالىپ، جىل سايىن جەڭىل كولىك ءۇشىن 3 ميلليون دوڭگەلەك جانە كوممەرتسيالىق تەحنيكا ءۇشىن 500 مىڭ دوڭگەلەك شىعارۋ كوزدەلگەن. سونىمەن قاتار رەزينا تەحنيكاسى زاۋىتى الاڭىندا دايىن وندىرىستىك عيماراتتار كەشەنى (Ready Built Factory) قۇرىلادى.

وندا شاعىن كاسىپكەرلەر يندۋستريالىق جوبالاردى، ونىڭ ىشىندە قۇراۋشى بولشەكتەر مەن كومپونەنتتەردى وتكىزەتىن بولادى. وتىرىسقا قاتىسۋشىلار سونىمەن قاتار سولتۇستىك قازاقستان جانە قوستاناي وبلىستارىنىڭ اگروحولدينگتەرىنىڭ ينۆەستورلارىنا مەملەكەتتىك قولداۋ كورسەتۋ، 2016-2020 -جىلدارعا ارنالعان جەكەشەلەندىرۋدىڭ كەشەندى جوسپارىن ىسكە اسىرۋ، وڭدەۋ ونەركاسىبى كاسىپورىندارىنىڭ قىزمەتى جانە ت. ب. ماسەلەلەردى قاراستىردى.