امەريكالىقتار اسىراپ العان تاعى ءبىر جىگىت قازاقستانداعى تۋىستارىن تاۋىپ الدى

نۇر-سۇلتان. قازاقپارات - امەريكالىقتار اسىراپ العان ارمان اتتى جاس جىگىت قازاقستانداعى تۋىستارىن تاۋىپ الدى.

بۇل تۋرالى Facebook پاراقشاسىندا جۋرناليست جەڭىس قۇسپان جازدى، دەپ حابارلايدى قازاقپارات ءتىلشىسى.

بىرنەشە كۇن بۇرىن Kazakh American Association اتتى Facebook پاراقشادا ارماننىڭ قازاقستانداعى تانىسى ايدا كوشەكبايەۆا اتتى قولدانۋشى ا ق ش-تاعى قانداسىمىزدىڭ تۋىستارىن ىزدەپ جۇرگەنى تۋرالى جازعان ەدى. كوپ ۋاقىت وتپەي امەريكاداعى جىگىت وعان تۋعان-تۋىستارىن تاپقانى تۋرالى حابارلاپتى.

«بارىڭىزگە راحمەت، مەن تۋىستارىمدى تاپتىم!» دەپ جازدى امەريكالىقتار اسىراپ العان ارمان»، - دەپ جازادى جەڭىس قۇسپان Facebook پاراقشاسىندا.

كوپ ۋاقىت وتپەي جۋرناليست وقىرمانعا ارماننىڭ اپكەسىمەن بايلانىسقا شىعىپ، ەكەۋى ىم تىلىمەن سويلەسىپ جاتقانىن جاريا ەتتى. «مەن ارماننىڭ اپكەسىمىن. ول مەنىڭ باۋىرىم. ونىڭ دا، مەنىڭ دە قۇلاعىمىز ەستىمەيدى. ىممەن تىلدەسەمىز. قازاقستان مەن امەريكاداعى ىم ءتىلى ەكى ءتۇرلى بولسا دا، ءبىر-ءبىرىمىزدى تۇسىنەمىز. مەن ونى بۇرىننان ىزدەيتىن ەدىم. ەندى عانا تاپتىم»، - دەپ جازعان ارماننىڭ اپكەسى.

اۆتور: ايان بەكەن ۇلى