21:19, 05 - ماۋسىم 2020 | GMT +6
الماتىدا جاندىكتەرگە ارنالعان قوناقۇي پايدا بولدى
نۇر-سۇلتان. قازاقپارات – ەستىگەن قۇلاققا ەرسىلەۋ بولعانىمەن، بۇل جوبانىڭ دا وزىندىك ەرەكشەلىگى بار، دەپ حابارلايدى «حابار 24».
قالاداعى بوتانيكا باعىندا ورنالاسقان ەكى مەترلىك نىساندا كوبەلەكتەر مەن ارالار جانە ءارتۇرلى جاندىكتەر مەكەندەيدى. ولاردىڭ باقتا وسەتىن ءتۇرلى وسىمدىكتەردى توزاڭداندىرۋدا پايداسى زور دەيدى ماماندار. ءار جاندىكتىڭ جەكە- جەكە بولمەلەرى بار. كۇن كۇرت سۋىتقاندا، ولار وسى قوناقۇيدى پانالايتىن كورىنەدى. جوبا اۆتورلارى الداعى ۋاقىتتا جاندىكتەرگە ارنالعان قوناقۇيلەردى تاعى اشۋدى جوسپارلاپ وتىر.
مارات ايتماعامبەتوۆ، جوبا اۆتورى:
- بۇل عيمارات تولىقتاي ورگانيكالىق ماتەريالداردان جاسالعان. جاندىكتەرگە ارنالعان قوناقۇي تەك اعاشتاردى جەلىمدەۋ ارقىلى جاسالعان. نەگىزىنەن ۇشاتىن جاندىكتەر وسىندا ورنالاسادى. ولار بوتانيكالىق باقتىڭ ءسانىن كەلتىرەدى دەگەن ويدامىن.