سامۇرىق- قازىنا «قازپوشتانى» ساتىپ جاتىر

None
None
نۇر- سۇلتان. قازاقپارات - «قازپوشتا» اكسيونەرلىك قوعامى ساتىلادى. بۇل تۋرالى «سامۇرىق- قازىنا» ۇلتتىق ءال- اۋقات قورىنىڭ باسقارما ءتوراعاسى احمەتجان ەسىموۆ ايتتى، دەپ حابارلايدى قازاقپارات ءتىلشىسى.

«كەلەسى كومپانيا - «قازپوشتا». وسى جىلداردىڭ ىشىندە قور كومپانياعا 28 ميلليارد تەڭگە ينۆەستيتسيا باعىتتادى. شالعاي اۋداندارداعى جەلىلەرىندە 8 ميلليارد تەڭگە شىعىنى بار. جىل سايىن رەسپۋبليكالىق بيۋدجەتتەن بولىنەتىن سۋبسيديا 4,2 ميلليارد تەڭگەنى قۇرايدى. سوندىقتان كەڭەسشىلەر تىكەلەي اتاۋلى ساتۋدى ۇسىنادى»، - دەدى احمەتجان ەسىموۆ ەلباسى نۇرسۇلتان نازاربايەۆتىڭ توراعالىعىمەن وتكەن قوردى باسقارۋ جونىندەگى كەڭەستە.

ونىڭ اتاپ وتۋىنشە، ينۆەستورلار تاراپىنان قىزىعۋشىلىق بار.

«ارينە، بۇل جۇمىستار دا وڭاي ەمەس. دەگەنمەن، ماقۇلدانعان جاعدايدا ءبىز ونى بارىنشا تابىستى جۇزەگە اسىرا الامىز دەپ ويلايمىن»، - دەدى احمەتجان ەسىموۆ.

ەلباسى نۇرسۇلتان نازاربايەۆ «سامۇرىق- قازىنا» ۇلتتىق ءال- اۋقات قورىنىڭ كومپانيالارىن جەكەشەلەندىرۋ جونىندە پىكىر ءبىلدىردى.

«الەمدىك داعدارىس كەزىندە ەنەرگيا رەسۋرستارىنىڭ باعاسى قۇبىلمالى بولعاندىقتان جەكەشەلەندىرۋ بويىنشا بۇعان دەيىن قابىلدانعان جوسپارلاردى قايتا بەيىمدەپ، تۇزەتۋ قاجەت. ءبىز «قازاتوم پروم» اكسيالارىنىڭ %25 جەكەشەلەندىرىپ، ينۆەستورلاردىڭ سەنىمىنە يە بولدىق»، - دەپ اتاپ ءوتتى ن. نازاربايەۆ «سامۇرىق- قازىنا» ۇلتتىق ءال- اۋقات قورىن باسقارۋ جونىندەگى كەڭەستىڭ وتىرىسىندا.

تۇڭعىش پرەزيدەنت كەي كومپانيالاردى جەكەشەلەندىرۋ ماسەلەلەرىنە ەرەكشە توقتالدى. «قازپوشتا» قىزمەتىنىڭ ەرەكشەلىگىنە بايلانىستى كومپانيانى ستراتەگيالىق ينۆەستورعا تىكەلەي اتاۋلى ساتقان ابزال. مۇنى دا ۇكىمەتپەن بىرگە انىقتاپ، بۇل ماسەلەگە بايىپپەن قاراۋ كەرەك. «سامۇرىق- ەنەرگونى» جەكەشەلەندىرۋ ماسەلەسىن مەملەكەتكە ءتيىمدى بولاتىن جاعدايدا قاراستىرۋ كەرەك. جانە بۇل انىق ءارى تۇسىنىكتى بولۋى ءتيىس»، - دەدى ن. نازاربايەۆ.

ال «قازاق تەلەكومدى» جەكەشەلەندىرۋ بويىنشا ەلباسى ونىڭ 10 پايىزىن «ءبىرىڭعاي جيناقتاۋشى زەينەتاقى قورىنا» ساتۋدى قولدادى. بۇل - ازاماتتارىمىزدىڭ كومپانيا اكسيونەرى بولۋعا، ال قوردىڭ باستى اكسيونەر رەتىندە قالۋىنا مۇمكىندىك بەرەدى.

«ال قالعان كومپانيالار بويىنشا الەمدەگى جاعدايدى ەسكەرىپ، ولاردى قايتا قاراپ، جەكەشەلەندىرۋ بويىنشا جوسپاردى، ستراتەگيالىق اكتيۆتەردى قورعا قولايلى كەزەڭگە دەيىن كەيىنگە قالدىرۋ قاجەت. وسىعان بايلانىستى قورعا ۇكىمەتپەن بىرلەسىپ، جەكەشەلەندىرۋدىڭ كەشەندى جوسپارىن، «سامۇرىق- قازىنانى» ءارتاراپتاندىرۋ باعدارلاماسىن قايتا قاراۋدى تاپسىرامىن»، - دەدى نۇرسۇلتان نازاربايەۆ.

ەسكە سالايىق، بۇعان دەيىن «ءبىرىڭعاي جيناقتاۋشى زەينەتاقى قورى» ا ق «قازاق تەلەكوم» ا ق- نىڭ 10 پايىز اكسياسىن ساتىپ الاتىنىن، «سامۇرىق- قازىنا» ۇ ءا ق- عا قاراستى «قازپوشتا» ا ق ساتىلاتىنىن، نۇرسۇلتان نازاربايەۆ «قازمۇنايگاز» كومپانياسىن قايتا قۇرۋدى تاپسىرعانىن جازدىق.

اۆتور: مارلان جيەمباي

سوڭعى جاڭالىقتار