بالقاش كولىنىڭ اۋماعى ءتۋريزمدى دامىتۋ باعدارلاماسىنا ەندى

نۇر- سۇلتان. قازاقپارات - بالقاش كولىنىڭ اۋماعى قازاقستاندا ءتۋريزمدى دامىتۋ باعدارلاماسىنا ەندى، دەپ حابارلايدى قازاقپارات.

بۇل تاياۋ جىلدارى كۋرورتتىق ايماقتى بارلىق ىقتيمال تاسىلدەرمەن جاقسارتا تۇسەدى دەگەندى بىلدىرەدى. جاعالاۋدا 20 دان استام دەمالىس ايماعىن سالۋ، ينجەنەرلىك جەلىلەر جۇرگىزۋ، قاراعاندى- بالقاش تراسساسىن جوندەۋ جۇمىستارىن اياقتاۋ جانە ەلىمىزدىڭ باسقا وڭىرلەرىنەن ۇلكەن ۇشاقتار قابىلداۋ ءۇشىن قالا اۋەجايىن قايتا جاڭارتۋ جوسپاردا بار. جاعالاۋدى اباتتاندىرۋ قالاي ءجۇرىپ جاتقانى تۋرالى بالقاش قالاسىنىڭ اكىمى وراز تاۋىربەكوۆ اڭگىمەلەپ بەردى.

«قازىر ءبىز ءۇشىن ەكونوميكالىق ءوسىمنىڭ نەگىزگى نۇكتەسى - شۇبار- تۇبەك جانە توراڭعىلىق كەنتتەرى. دەمالىس ۇيلەرىن سالۋعا بولاتىن 20,5 شاقىرىم بوس جاعالاۋ بار. ءبىز ءۇشىن نەگىزگى مىندەت - كەنتتەردى سۋمەن جابدىقتاۋ، سۋ بۇرۋ، ەلەكتر ەنەرگياسىن بەرۋ سەكىلدى ينجەنەرلىك جەلىلەردى جۇرگىزۋ بولىپ تابىلادى. جوبا دايىن، مەملەكەتتىك ساراپتاما شەشىمىن كۇتەمىز. ول دايىن بولعاندا عانا مەردىگەردى انىقتاپ، جۇمىسقا كىرىسە الامىز، - دەيدى بالقاش اكىمى.

ونىڭ ايتۋىنشا، بۇل شارالار ايماقتىڭ ينۆەستيتسيالىق تارتىمدىلىعىن ارتتىرادى جانە بىردەن بىرنەشە ماسەلەنى شەشەدى. ولاردىڭ ءبىرى - كۋرورتتىق ايماقتاردا دەمالۋدىڭ جوعارى باعاسى جانە سەرۆيس دەڭگەيىنىڭ تومەندىگى.

«بۇل كەنتتەردە كارىز دە، ورتالىقتاندىرىلعان سۋ قۇبىرى دا بولعان جوق. ارينە، ول جەردە دەمالىس ايماعىن اشۋ ءۇشىن كاسىپكەر ءبارىن ءوزى قامتاماسىز ەتۋى ءتيىس ەدى. بۇل ونىڭ قىزمەتتەرىنىڭ قىمباتتاۋىنا الىپ كەلدى. سونداي- اق، ەلەكتر ەنەرگياسىنىڭ باعاسىنا اۋىلدىق تاريف اسەر ەتتى، ول قالاداعىعا قاراعاندا جوعارى. سونداي- اق قوقىس شىعارۋ قۇنى دا بار، سەبەبى كەنتتەردىڭ جانىندا پوليگوندار جوق. قازىر ءبىز بۇل ماسەلەنى شەشەمىز. شۇبار- تۇبەك جانە توراڭعىلىق كەنتتەرىن بالقاش قالاسىنا قوسۋ پروتسەسى باستالدى. تەك ۇكىمەتتىڭ ماقۇلداۋىن كۇتەمىز، - دەدى وراز تاۋىربەكوۆ.

وسىنداي بىرىكتىرۋ شارالارىنان كەيىن وسى ەلدى مەكەندەردە كوممۋنالدىق قىزمەتتەرگە تاريفتەر تومەندەۋى ءتيىس. جەر ساتۋ بويىنشا اۋكتسيوندارىن وتكىزۋ دە وڭاي بولادى. ولاردىڭ ءبىرىنشىسى وسى ايدا وتەدى. بالقاش قالاسىندا جول قۇرىلىسى بەلسەندى جۇرەدى. تۋريستەردىڭ نەگىزگى اعىنى كۋرورتتىق ايماققا جەرۇستى كولىكتەرىمەن كەلەدى، سوندىقتان مۇندا جاقسى جول ينفراقۇرىلىمىن قۇرۋ باسىمدىققا يە.

«جول جوندەۋ جۇمىستارى ەكى كەزەڭ بويىنشا ءجۇرىپ جاتىر. قازىر شۇبار- تۇبەك اۋىلىنىڭ جول جەلىسى جوندەلۋدە. مۇندا ىشكى كەنتتىك جولدى ورتاشا جوندەۋ جۇرگىزىلەدى. وندا نەگىزگى جۇمىستار اياقتالدى.

« دەمالىس ايماعىنا 300 مەتر اسفالت سالۋ، جاياۋ جۇرگىنشىلەر وتكەلدەرى مەن جاساندى تەگىس ەمەس جولدار سالۋ قالدى. سودان كەيىن توراڭعالىقتا جولداردى جوندەۋگە كىرىسەمىز. وندا رەسپۋبليكالىق تراسسادان باستاپ كەنتىشىلىك جولعا دەيىن 8 شاقىرىم جولدى جوندەيمىز. ماۋسىم ايىنىڭ سوڭىنا دەيىن اياقتاۋدى جوسپارلاپ وتىرمىز» ، - دەيدى بالقاش اكىمى.

ەلىمىزدىڭ باسقا وڭىرلەرىنەن تۋريستەر اعىنىن تارتۋ ءۇشىن اۋە قاتىناسىن دا دامىتۋ جوسپارلانىپ وتىر. قازىر بالقاش اۋەجايى ياك-40 سياقتى شاعىن ۇشاقتاردى قابىلداي الادى. كۋرورت قالاسىندا بوينگتەر قونۋى ءۇشىن اۋە ايلاعى كۇردەلى جوندەۋدەن ءوتۋى قاجەت. الدىن الا ەسەپتەۋ بويىنشا، بۇعان 2,5 ميلليارد تەڭگە شىعىندالادى. قايتا قۇرۋ جوباسىن ق ر پرەمەر- ءمينيسترى اسقار مامينگە ۇسىندى. ءقزىر اەروۆوكزال «قازاقمىس» كورپوراتسياسىنا تيەسىلى. جوندەۋدى بيۋدجەتتەن قارجىلاندىرۋ ءۇشىن ونى قالانىڭ كوممۋنالدىق مەنشىگىنە بەرۋ قاجەت. كورپوراتسيا باسشىلىعى وعان ءوز كەلىسىمىن بەردى. جاعالاۋداعى اۋماقتى اباتتاندىرۋ، ينجەنەرلىك جەلىلەر قۇرىلىسى، جولداردى جوندەۋ جانە اۋەجايدى قايتا جاڭارتۋ جۇمىستارى 2023 -جىلى اياقتالادى.

الدىن الا بولجام بويىنشا، بۇل بالقاشتاعى تۋريستەر اعىنىن 5 ەسەگە ارتتىرۋعا مۇمكىندىك بەرەدى. قازىر كۋرورت جىلىنا 80 مىڭ ادامدى قابىلدايدى. قايتا جاڭعىرتۋدان كەيىن دەمالۋشىلار سانى 400-500 مىڭعا دەيىن ءوسۋى مۇمكىن.