اقتوبە- اقتاۋ پويىزىندا جولاۋشى ايەل بوسانىپ قالدى
ونى تەمىرجول قۇرامىنىڭ باستىعى مەن اكۋشەر بوساندىرعان، دەپ حابارلايدى قازاقپارات لادا- عا سىلتەمە جاساپ. جۇكتىلىكتىڭ سەگىزىنشى ايىندا بولعان اقتوبە وبلىسىنىڭ تۋماسى اقتاۋعا، ءوز ۇيىنە كەلە جاتقان. اقتوبەدە اناسىنىڭ ۇيىندە قوناقتا بولعان.
«4-ماۋسىم كۇنى تاڭعى ساعات 5 تە ماعان جولسەرىكتەر كەلىپ، جەتىنشى ۆاگونداعى ايەلدىڭ تولعاعى باستالعانىن ايتتى. ارىپتەستەرىممەن بىرگە باسقا جولاۋشىلاردان پويىزدا دارىگەر بار ما دەپ سۇراستىرا باستادىق. بەسىنشى ۆاگوننان اقتوبەلىك اكۋشەر دارىگەر سۆەتلانا نۇرپەيىسوۆا تابىلدى. بوسانىپ جاتقان ايەل قىزمەتتىك كۋپەگە اۋىستىرىلىپ، وعان كومەك كورسەتىلە باستادى. ساعات 11:10-دا ول دۇنيەگە ۇل بالا اكەلدى. بارلىق ستانسالاردا جاس اناعا جەدەل جاردەم دارىگەرلەرى مەديتسينالىق كومەك كورسەتتى. بويجەتكەن ستانسالاردىڭ بىرىندە قالعىسى كەلمەدى»، - دەپ باياندادى اقتوبە-اقتاۋ پويىزىنىڭ باستىعى بوتاگوز قيدانوۆا.
بۇل بوتاگوز قيدانوۆانىڭ پويىزدا ايەل بوساندىرۋدىڭ ءبىرىنشى وقيعاسى ەمەس ەكەنى انىقتالدى. بۇل وقيعاعا دەيىن ول ءۇش قىز بالانىڭ دۇنيەگە كەلۋىنە كومەكتەسكەن.
«نارەستەنىڭ ەسىمىن دىنمۇحامەد دەپ قويعان. اناسى ەكەۋىنىڭ جاعدايى جاقسى»، - دەپ اتاپ ءوتتى ب. قيدانوۆا.
