قازاقستان تەمىرجولداعى كونتەينەر جۇگى بويىنشا قىتاي مەن ەۋروپانى جالعايتىن ەلگە اينالدى

نۇر- سۇلتان. قازاقپارات - «قازاقستان تەمىر جولى» ۇ ك» ا ق باسقارما ءتوراعاسى ساۋات مىڭبايەۆ ەلىمىزدىڭ تەمىرجولداعى كونتەينەر جۇگى بويىنشا قىتاي مەن ەۋروپانى جالعايتىن نەگىزگى مەملەكەتكە اينالعانىن ءمالىم ەتتى، دەپ حابارلايدى قازاقپارات ءتىلشىسى.

«قازاقستان تەمىر جول» كومپانياسى دا شەكتەۋ شارالارىنىڭ سالماقتى ىقپالىن باستان وتكەردى. جولاۋشىلار پويىزدارىن توقتاتۋعا ءماجبۇر بولدىق. مۇنداي شەكتەۋ شارالارى تاريحىمىزدا وسى كۇنگە دەيىن بولعان ەمەس. وتكەن جىلى قاۋىپسىزدىك كەڭەسىنىڭ وتىرىسىندا كومپانيانىڭ دامۋ كەلەشەگىن تالقىلاعان ەدىك. ناقتى ناتيجە دە بولدى» ، - دەدى ەلباسى نۇرسۇلتان نازاربايەۆ «سامۇرىق- قازىنا» كەڭەسىنىڭ وتىرىسىندا.

«قازاقستان تەمىر جولى» ۇ ك» ا ق باسقارما ءتوراعاسى ساۋات مىڭبايەۆ كومپانيانىڭ وتكەن جىلعى كورسەتكىشى تۋرالى ايتىپ بەردى.

«نەگىزگى كونتەينەرلىك باعدارلارعا توقتالا كەتەيىن. سەبەبى بۇل - تاريفتەن تىس نەگىزگى كىرىستى اكەپ وتىرعان سالا. نەگىزگى تابىس بۇرىنعىشا قىتاي - ەۋروپا باعىتىنان كەلەدى. نەگىزگى ءۇش باعىت بار. ءبىرىنشىسى موڭعوليا ارقىلى، ەكىنشىسى تازا رەسەي ارقىلى، ءۇشىنشىسى قازاقستان ارقىلى وتەدى. ءبىز ءترانزيتتىڭ اۋقىمىن كەڭەيتىپ، 4-ايدىڭ ىشىندە وسى ءۇش باعداردىڭ ىشىندە ۇلەسىمىزدى 91 پايىزعا جەتكىزدىك. بىزدە بۇل باعىتتاعى ءوسىم 50 پايىزدى كورسەتتى» ، - دەدى ول.

ساۋات مىڭبايەۆ سونىمەن قاتار قىتايدان ورتا ازياعا كەلەتىن ترانزيت تە ەداۋىر ارتقانىن ايتىپ ءوتتى.

«وڭتۇستىك كاۆكاز باعىتىنداعى ترانزيت وسكەن جوق. ازەربايجان مەن گرۋزيا ەلدەرىنە شەكتەۋ شارالارىنا بايلانىستى ترانزيت ازايدى» ، - دەدى ول. وسى تۇسقا كەلگەندە ەلباسى الداعى ۋاقىتتا وسى ازەربايجان مەن گرۋزيا ەلدەرى باعىتى الەۋەتكە يە بولۋى كەرەكتىگىن ەسكەرتتى.

«ءبىز وسى ماقساتتا تۇركيا، گرۋزيا، ازەربايجان ەلدەرىمەن اۋقىمدى جۇمىستاردى جۇرگىزدىك» ، - دەدى ەلباسى.