+7 (701) 759 90 19
28 °С : نۇر-سۇلتان
32 °С : الماتى
USD 409.98 EUR 462.21
RUB 5.75 CNY 58.43
جاڭالىقتار

الاكولگە جولدامالار ساتۋ باستالدى

4 ماۋسىم 17:47
:ءبولىسۋ
الاكولگە جولدامالار ساتۋ باستالدى

الماتى. قازاقپارات - الاكولگە جولدامالاردى برونداۋ مەن ساتۋ باستالدى. تۋراگەنتتىكتەر مەن الماتى وبلىستىق تۋريزم باسقارماسىنىڭ بولجاۋىنشا، بيىل كولگە كەلەتىندەردىڭ سانى ارتپاق. ءتىپتى رەكوردتىق كورسەتكىشكە جەتۋى مۇمكىن.

قازىرگى تاڭدا الماتى جانە شىعىس قازاقستان وبلىسى الاكول جاعالاۋىنىڭ ينفراقۇرىلىمىن جەتىلدىرۋدە، دەپ حابارلايدى قازاقپارات ءتىلشىسى.

الماتى وبلىستىق تۋريزم باسقارماسىنىڭ مالىمەتىنە سايكەس، الاكول كولىنىڭ جاعالاۋىندا قازىرگى كەزدە 250 ورنالاستىرۋ وبەكتىلەرى بار. 2020 -جىلى 14 جاڭا نىسان سالۋ جاسپاردا.

«قازىرگى تاڭدا اقشي اۋىلىندا دەمالىس ساياباعىنىڭ قۇرىلىسى جۇرگىزىلۋدە. اعىمداعى جىلدىڭ 6 - شىلدەسىنە دەيىن قۇرىلىستى اياقتاۋ جوسپارلانۋدا. پارك اۋماعىندا اۆتوكولىك تۇراعى، اركاسى بار ەكى كىرۋ توبى، كۇركەلەر، ويىن الاڭدارى، ورتالىق قالقا، جازعى كافە، 336 ادامعا ارنالعان امفيتەاتر، جازعى ساحنا، فۋتبول الاڭى، ۆولەيبول الاڭى، ۆەلوسيپەد الاڭى، روليكتەرمەن سىرعاناۋعا ارنالعان الاڭ، ەكى دارەتحانا جانە ترەناجەرلەرگە ارنالعان الاڭ ورنالاسادى»، - دەيدى الماتى وبلىستىق تۋريزم باسقارماسىنىڭ تۋريستىك جوبالاردى جوسپارلاۋ جانە جۇزەگە اسىرۋ ءبولىمىنىڭ باسشىسى باقىتجان ورازبايەۆ.

سونىمەن قاتار، ول 2020 -جىلدىڭ 1- ماۋسىمىنان باستاپ كۇن سايىن «نۇر- سۇلتان- ءۇشارال- نۇر- سۇلتان» جانە «الماتى- ءۇشارال- الماتى» باعىتتارى بويىنشا رەيستەر اشىلعانىن ايتتى. 8 - ماۋسىمنان 24 - قازانعا دەيىن «الماتى- ءۇشارال- الماتى» باعىتى بويىنشا قوسىمشا رەيس بولادى (دۇيسەنبى، سارسەنبى، بەيسەنبى، جۇما، جەكسەنبى).

اعىمداعى جىلدىڭ 3 - اقپانىنان باستاپ «جەتىسۋ» اۆياكومپانياسى ا ق «تالدىقورعان- ءۇشارال- تالدىقورعان» باعىتى بويىنشا رەيستى اپتاسىنا 7 رەت جۇزەگە اسىرادى. سونداي- اق، «جەتىگەن- دوستىق- جەتىگەن» باعىتى بويىنشا الەۋمەتتىك ماڭىزى بار اۋدانارالىق تەمىر جول باعىتى سۋبسيديالانادى، وسى ماقساتقا وبلىس بيۋدجەتىنەن 2017 - 2021 -جىلدارعا 85 ميلليون تەڭگە قاراستىرىلعان.

«پويىز 2020 -جىلدىڭ ماۋسىم ايىنان تامىز ايىنا دەيىن اپتاسىنا 3 رەت جۇرەدى. 7 ۆاگون ىسكە قوسىلعان. ءبىر بيلەت باعاسى پلاتسكارت 2686 ت گ، كۋپەلىك 4500 تگ. جالپى ورىن سانى - 324. تاسىمالداۋشى كومپانيا قوسىمشا 10 كوممەرتسيالىق ۆاگون ۇسىنۋعا دايىن»، - دەيدى ول.

ال، شىعىس قازاقستان اۋماعىنداعى جاعالاۋدا 11552 جاتىن ورنى بار دەمالۋشىلارعا ارنالعان 176 ورىن ىسكە قوسىلعان. ولاردىڭ بارلىعى ونلاين برونداۋعا دايىن. ءبىر ادامعا تۇرۋ باعاسى شامامەن 2600 - 10500 ت گ.

ش ق و تۋريزم جانە ىشكى بايلانىس باسقارماسىنىڭ باسشىسى مارات قاباقوۆتىڭ ايتۋىنشا، الاكولدە جاعالاۋدى دامىتۋ بويىنشا ۇلكەن جۇمىستار اتقارىلدى.

«ءبىز العاش رەت رەسپۋبليكا، سونىمەن قاتار وبلىس كولەمىندە سانيتار دارىگەردىڭ قاۋلىسىمەن تۋريستەردى ورنالاستىرۋ نىساندارىنىڭ جۇمىستارى رەتتەلگەن پاندەميا جاعدايىندا جۇمىس ىستەيمىز. تۋريستىك بيزنەستىڭ بارلىق سۋبەكتىلەرى بۇل جاعدايدىڭ تەك قازاقستاندا عانا ەمەس، بۇكىل الەمدە ورىن العانىن تۇسىنەدى، سوندىقتان كارانتيندىك شارالاردان شارشاعان قازاقستاندىقتاردىڭ دەمالىسى جوعارى دەڭگەيدە بولۋى ءۇشىن بار مۇمكىندىكتى جاسايدى»، - دەدى مارات قاباقوۆ.

الاكولدىڭ شىعىس جاعالاۋىنداعى بارلىق دەمالىس بازاسىندا جەكە قورعانىس زاتتارى بار (مەديتسينالىق ماسكالار، قولعاپتار)، زارارسىزداندىرۋ زاتتارى، ونىڭ ىشىندە قولدى جۋۋعا ارنالعان انتيسەپتيكتەر، سونداي- اق تەمپەراتۋرانى ولشەۋگە ارنالعان بايلانىسسىز تەرمومەترلەر. تۋريزم سالاسىنداعى كاسىپكەرلىك سۋبەكتىلەرىنىڭ جۇمىسى شىعىس قازاقستان وبلىسى مەملەكەتتىك باس سانيتار دارىگەرىنىڭ 21 مامىر 2020 -جىلعى №10 قاۋلىسىمەن رەتتەلگەن.

«سەمەي مەن وسكەمەن قالالارىنىڭ اۋەجايىنا كەلگەن بارلىق جولاۋشىلار COVID-19 ەكسپرەسس- سىناقتاماسىن تاپسىراتىن بولادى. اۋەجايلاردا، تەمىرجول مەن اۆتوۆوكزالداردا مىندەتتى تۇردە مەديتسينالىق بەتپەردەنى كيىپ، اراقاشىقتىقتى ساقتاپ، سانيتايزەرلەردى قولدانۋ كەرەك. بۇدان باسقا، كەلەتىن جانە كەتەتىن جولاۋشىلار ءۇشىن جەكە دالىزدەر جۇمىس ىستەيدى، اۋەجاي مەن ۆوكزال عيماراتتارىندا جولاۋشىلاردى شىعارىپ سالۋعا تىيىم سالىنادى»، - دەيدى ول.

«ءىنجۋ» دەمالىس كەشەنىنىڭ يەسى ەلەنا اسىلبەكوۆانىڭ ايتۋىنشا، الاكولدىڭ شىعىس جاعالاۋىنداعى تۋريستىك نىسانداردىڭ باسىم بولىگى سانيتار دارىگەرلەردىڭ جاڭا تالاپتارىنا بەيىمدەلگەن جانە الداعى تۋريستىك ماۋسىمنىڭ ءساتتى وتەتىنىنە سەنىمدى.

ايتا كەتەرلىگى، قازىر، وتاندىق تۋراگەنتتىكتەر جاپپاي ىشكى تۋريزمەن اينالىسا باستادى. وعان سەبەپ، الەمدىك پاندەميا.

«ءبىز ەشقاشان ىشكى تۋريزمەن اينالىسىپ كورگەن ەمەسپىز، بيىل العاش رەت قولعا الدىق. ونىڭ سەبەبى، ايتپاسا دا تۇسىنىكتى. بۇل كارانتيندىك رەجيمگە بايلانىستى. بيىلعى جىلدىڭ تۋريستىك ترەندى - الاكول. قازاقستاندىق تۋراگەنتتىكتەردىڭ بارلىعى ىشكى تۋريزمگە كوشتى. ولار تەك الاكولگە عانا ەمەس، سونىمەن قاتار قاپشاعاي، بالقاش، بۋراباي سياقتى جەرلەرگە دە ارنايى باعدارلاما ازىرلەپ جاتىر. وتكەن جىلدارى الاكولگە سۇرانىستىڭ قانداي بولعانىن بىلمەيمىن، بيىل ايتارلىقتاي وسەتىن سياقتى. قازىردىڭ وزىندە تاپسىرىس بەرۋشىلەردىڭ قاتارى كوبەيدى. رەكوردتتىق كورسەتكىشكە جەتۋى دە ابدەن مۇمكىن»، - دەيدى ماكسيم بانين.

الاكولدە دەمالۋدى داستۇرگە اينالدىرعان الماتىلىق جانىسبەكوۆتار وتباسى بيىلعى دەمالىستارىنا ەرتەرەك قامدانا باستادى.

«ءبىز الاكولگە جىلدا شىلدە ايىندا بارامىز. اقشيدە دەمالعاندى جاقسى كورەمىز. جىلدان- جىلعا قىزمەت كورسەتۋ سالاسى دامىپ كەلەدى. ارينە، سايكەسىنشە باعاسى دا ارتىپ وتىرادى. مىسالعا، وسىدان ءۇش جىل بۇرىن ءتورت ادام (ەكى ەرەسەك، ەكى بالا) ءبىر اپتاعا 100 مىڭ تەڭگە جۇمساساق، وتكەن جىلى 140 مىڭ تەڭگەگە كوبەيدى. بيىل الاكولدە دەمالۋشىلاردىڭ سانى ارتادى. سوندىقتان ەرتەرەك قامدانۋعا كىرىستىك. كەشە عانا بارىپ ورىن برونداپ كەلدىك»، - دەيدى الماتىلىق ەرلات جانىسبەكوۆ.

اۆتور: الما مۇقانوۆا


:ءبولىسۋ
پئكئر قالدئرؤ
+7
جئبةرؤ
ونلاين قىزمەتكەرلەر
رەداكتور
باقىتجول كاكەش
باقىتجول كاكەش
954-049
رەداكتور
ريزابەك نۇسىپبەك
ريزابەك نۇسىپبەك
954-049
رەداكتور
بەيسەن سۇلتان
بەيسەن سۇلتان
954-049

مۇراعات