اتىراۋدا كوروناۆيرۋستان كوز جۇمعان ناۋقاس ۇيىندە ءبىر اپتا جاتىپ قالعان
بۇل تۋرالى بۇگىن اتىراۋ وبلىستىق دەنساۋلىق ساقتاۋ باسقارماسى باسشىسىنىڭ مىندەتىن اتقارۋشى نۇرلىبەك قابدىقاپاروۆ ءمالىم ەتتى.
«كوروناۆيرۋس ىندەتىنەن قايتىس بولعان ناۋقاستىڭ ءبىرى رەسپيراتورلى بەلگىلەرىمەن اۋىرعاننان كەيىن وبلىستىق اۋرۋحانانىڭ پروۆيزورلىق بولىمشەسىنە مەديتسينالىق جەدەل- جاردەم كومەگىمەن جەتكىزىلدى. اۋىر جاعدايدا «ەكى جاقتى پنيەۆمونيا، جەدەل تىنىس الۋ جەتىسپەۋشىلىگى» دياگنوزىمەن جاتقىزىلعان سىرقاتتى دارىگەرلەر امان الىپ قالا المادى. ال، كوز جۇمعان ەكىنشى ادام ءبىر اپتا بويى ۇيىندە اۋىرعان. العاشقى ءۇش كۇندە ديارەيا بەلگىلەرى، ارتىنان جوتەل، دەنە قىزۋىنىڭ جوعارىلاۋى، ەنتىگۋ، جالپى السىزدىك، تابەتىنىڭ تومەندەۋى بەلگىلەرى پايدا بولعان. كەۋدە كلەتكاسىنىڭ ك ت زەرتتەۋى جاسالدى. وكپە ءتىنىنىڭ زاقىمدالۋ كولەمى % 50 قۇرادى. اۋرۋحاناعا تۇسكەن كەزدەن باستاپ ناۋقاس ۆرار رەجيمىندە مۇرىن ارقىلى وكپەنى جاساندى جەلدەتۋ اپپاراتىنا قوسىلدى»، - دەدى نۇرلىبەك قابدىقاپاروۆ.
بۇعان دەيىن اتىراۋدا كوروناۆيرۋستان ەكى قايتىس بولعانىن حابارلاپ ەدىك.
اۆتور: بەك مۇستافا