الماتىدا موتوبايكەرلەر ءانۇراندى شىرقادى

الماتى. قازاقپارات - الماتىدا ق ر مەملەكەتتىك رامىزدەر كۇنىنە وراي موتوشەرۋ ءوتتى، دەپ حابارلايدى قازاقپارات ءتىلشىسى.

شەرۋ رىسقۇلوۆ پەن ءاشىموۆ كوشەلەرىنىڭ قيىلىسىنان باستالىپ، رىسقۇلوۆ- مومىش ۇلى- موڭكە بي- ساين قيىلىسىنا دەيىن جالعاستى. قاتىسۋشىلار مامانداندىرىلعان ح ق ك و دەيىن بارىپ، سول جەردەن قايتا اينالىپ كەلىپ، «الماتى ارەنا» كەشەنىنىڭ الدىنا توقتادى.

موتوشەرۋدى ءماسليحات دەپۋتاتى، جەر شارىن اينالىپ ساياحات جاساعان دميتريي پەترۋحين باستادى. كوك بايراقتى كوتەرگەن بايكەرلەردىڭ بارلىعى ءانۇراندى ورىندادى. بۇعان دەيىن مەرەكەگە وراي الماتىدا قانداي شارالار وتەتىنىن جاريالاعان بولاتىنبىز. الماتى اكىمى باقىتجان ساعىنتايەۆ قالا تۇرعىندارى مەن قوناقتارىن مەملەكەتتىك رامىزدەر كۇنىمەن قۇتتىقتادى. «مەملەكەتتىك رامىزدەر كۇنىمەن قۇتتىقتايمىن! بارلىق قيىندىقتى بىرگە ەڭسەرىپ، قۋانىشقا سەبەپ كوپ بولسىن. تۋعان قالامىز بەن وتانعا دەگەن ماحابباتىمىزدى ونەگەلى ىستەرىمىز جانە قول جەتكىزگەن بيىك جەتىستىكتەرىمىز ارقىلى كورسەتەيىك»، - دەدى اكىم.

ايتا كەتۋ كەرەك، بۇگىن تاۋەلسىز قازاقستاننىڭ مەملەكەتتىك رامىزدەرى - مەملەكەتتىك تۋ، مەملەكەتتىك ەلتاڭبا جانە مەملەكەتتىك گيمن كۇنى. وسىدان تۋرا 28 جىل بۇرىن، ناقتى ايتقاندا 1992 -جىلدىڭ 4-ماۋسىمىندا ق ر تۇڭعىش پرەزيدەنتى - ەلباسى نۇرسۇلتان نازاربايەۆ «قازاقستان رەسپۋبليكاسىنىڭ مەملەكەتتىك تۋى تۋرالى»، «قازاقستان رەسپۋبليكاسىنىڭ مەملەكەتتىك ەلتاڭباسى تۋرالى» جانە «قازاقستان رەسپۋبليكاسى مەملەكەتتىك ءانۇرانىنىڭ مۋزىكالىق رەداكتسياسى تۋرالى» زاڭدارعا قول قويعان ەدى.

ال «قازاقستان رەسپۋبليكاسىنىڭ مەملەكەتتىك رامىزدەرى تۋرالى» كونستيتۋتسيالىق زاڭ 2007 -جىلى 4-ماۋسىمدا قابىلداندى. وسى زاڭعا سايكەس جىل سايىن 4-ماۋسىم قازاقستان رەسپۋبليكاسىندا مەملەكەتتىك رامىزدەر كۇنى رەتىندە مەرەكەلەنەدى.