ەلوردادا مەملەكەتتىك رامىزدەر مەرەكەسىنە وراي سالتاناتتى اۆتوشەرۋ وتەدى
«كەز كەلگەن مەملەكەتتىڭ شەكاراسى، رامىزدەرى بولاتىندىعىن ءبارىمىز دە بىلەمىز. ەل مەملەكەتتىك تۋىمەن تۇعىرلى، ەلتاڭباسىمەن ايشىقتى بولاتىندىقتان جاستار اراسىندا ءبىرقاتار ءىس- شارا وتكىزۋدى جوسپارلاپ وتىرمىز. ونىڭ ءبىرىنشىسى بالكونداعى تۋ دەپ اتالسا، ەكىنشىسى - اۆتوۆولونتەرلەرمەن، جاستار ۇيىمدارىمەن بىرگە ۇيىمداستىرىلىپ جاتقان اۆتوشەرۋ. جاستار كولىكتەرمەن، موتوتسيكلدەرمەن 28 شاقىرىم جولدى كوك تۋىمىزدى جەلبىرەتىپ ءجۇرىپ وتەدى»، - دەدى نۇر-سۇلتان قالالىق جاستار ساياساتى ماسەلەلەرى باسقارماسىنىڭ باسشىسى داۋلەت كارىبەك شەرۋ الدىندا ب ا ق وكىلدەرىنە بەرگەن سۇحباتى بارىسىندا.
ونىڭ اتاپ وتۋىنشە، 9-مامىر كەزىندە ەلوردا جاستارى قالامىزدا كارانتيندىك رەجيم بولعاندىقتان ەكىنشى دۇنيەجۇزىلىك سوعىس مايدانگەرلەرىنە قۇرمەت كورسەتىپ، «وتان قورعاۋشى» مونۋمەنتىنە گۇل شوقتارىن قويۋ ارقىلى تاعزىم ەتە المادى. سوندىقتان بۇگىن ەلوردا جاستارى اتالعان مونۋمەنتكە گۇل شوقتارىن قويادى.
«كەز كەلگەن ازامات قولىنا ەلىمىزدىڭ كوك تۋىن السا ايبىنى ءوسىپ، رۋحى اسقاقتايدى. قازىردىڭ وزىندە وسى جەردە تۋ ۇستاعان جاستارىمىزدىڭ ارقالانىپ، مەملەكەتتىك رامىزگە دەگەن سۇيىسپەنشىلىكتەرىنىڭ ارتىپ تۇرعانىن بايقاۋعا بولادى. بۇعان قوسا بۇگىنگى اۆتوشەرۋ كارانتين كەزىندە ۇيگە قامالىپ، بۇيىعى تىرشىلىك كەشكەن ەلوردالىقتاردىڭ ەڭسەسىن تىكتەۋگە، ولاردىڭ بويىنداعى مەملەكەتتىك رامىزدەرگە دەگەن قۇرمەتىن ارتتىرۋعا سەپ بولادى دەپ ويلايمىن»، - دەدى ول.
