اتىراۋدا كوروناۆيرۋستەن كوز جۇمعان ناۋقاستار تۋرالى ايتىلدى

اتىراۋ. قازاقپارات - اتىراۋ وبلىسىندا كوروناۆيرۋستەن ەكى ادام قايتىس بولدى، دەپ حابارلايدى قازاقپارات.

قازاقستاندا كوروناۆيرۋستەن تاعى 4 ادام كوز جۇمعانىن بۇعان دەيىن جازعان بولاتىنبىز. ونىڭ ىشىندە 2 جاعداي اتىراۋ وبلىسىندا تىركەلدى. COVID-19 ينفەكسياسىنىڭ تارالۋىنا جول بەرمەۋ جونىندەگى ۆەدومستۆوارالىق كوميسسيانىڭ مالىمەتىنشە، قايتىس بولعان ەكى ناۋقاس تا - اتىراۋ وبلىسىنىڭ تۇرعىندارى.

«ونىڭ ءبىرى - تەڭىز كەنىشىنىڭ 56 جاستاعى جۇمىسشىسى، ال ەكىنشىسى - 69 جاستاعى زەينەتكەر. قازىر COVID-19 ينفەكسياسى سالدارىنان قايتىس بولعان ناۋقاستاردىڭ ءولىم جاعدايىن تالداۋ ماقساتىندا قۇرىلعان كوميسسيا كلينيكالىق تەكسەرىس جۇرگىزۋدە.

ونىڭ قورىتىندىسى قوسىمشا حابارلانادى»، - دەپ ءمالىم ەتتى ۆەدومستۆوارالىق كوميسسيادان.

ايتا كەتەيىك، بۇل، اتىراۋ وڭىرىندە كوروناۆيرۋستەن تىركەلگەن العاشقى ءولىم جاعدايلارى. وبلىستا ينفەكسيانى جۇقتىرۋدىڭ جالپى 1140 جاعدايى تىركەلدى. جازىلدى 532 ادام. ال ەل بويىنشا انىقتالعان وقيعالاردىڭ جالپى سانى - 11 796. جازىلىپ شىقتى - 6240، قايتىس بولدى - 48 ناۋقاس.

اۆتور: بەك مۇستافا