سالىنباي قالعان «كوكجايلاۋ» كەشەنى: تۇرعىزىلىپ قويعان ەلەكتروپودستانسيا بۇزىلا ما
«كوكجايلاۋعا ەرەكشە قورعالاتىن تابيعي اۋماق مارتەبەسى قايتارىلعاننان كەيىن ول جەردە تۇرعىزىلعان نىسان نە بولادى»، - دەپ سۇرادى ءماجىلىستىڭ جالپى وتىرىسىندا دەپۋتات يۆان كليمەنكو.
بۇل ماسەلەگە قاتىستى ءماجىلىس ءتوراعاسى نۇرلان نىعماتۋلين دە پىكىرىن ءبىلدىردى.
«جەر اۋماعىنا ەرەكشە قورعالاتىن تابيعي اۋماق مارتەبەسى قايتارىلعاننان كەيىن ول جەردەگى قۇرىلىس نە بولاتىنى تۋرالى ماسەلە كوتەرىلىپ جاتىر. زاڭ جوباسى ەرەكشە قورعالاتىن تابيعي اۋماق مارتەبەسىن ناقتى ايقىندايتىنى بەلگىلى - ياعني ول جەردە ازاماتتىق تا، ونەركاسىپتىك تە ماقساتتا قۇرىلىس جۇرگىزىلمەۋى كەرەك»، - دەدى ول.
قويىلعان سۇراققا ەكولوگيا، گەولوگيا جانە تابيعي رەسۋرستار ۆيتسە- ءمينيسترى ەرلان نىسانبايەۆ جاۋاپ بەردى.
«جەر اۋماعىن قايتارماس بۇرىن سالىنعان قۇرىلىس بويىنشا كوميسسيا ۇيىمداستىرىلعان ەدى. ول پودستانتسيا بويىنشا شەشىم قابىلداندى. ول پودستانتسياعا دەمونتاجداۋ جۇمىسى جۇرگىزىلىپ، قالا قاراۋىنا بەرىلەدى. پودستانتسيا كوكجايلاۋ تاۋ- شاڭعىلى كەشەنى اياسىندا پايداعا جاراۋى كەرەك بولاتىن. سول سەبەپتى جوبا ىسكە اسپايتىن بولعاندىقتان ونىڭ ەندىگى كەزەكتە قاجەتتىگى جوق»، - دەدى ەرلان نىسانبايەۆ پارلامەنت ماجىلىسىندە قارالىپ جاتقان ەرەكشە قورعالاتىن تابيعي اۋماقتار ماسەلەلەرىنە قاتىستى زاڭ جوباسىن تالقىلاۋ بارىسىندا.
ايتسە دە ۆيتسە- ءمينيستردىڭ بۇل جاۋابى ءماجىلىس ءتوراعاسىن قاناعاتتاندىرماعان سەكىلدى.
«مىنە، بەلگىلى ءبىر قىسقا ۋاقىتقا بەردىڭىزدەر دە، ەندى بىلاي دەپ وتىرسىزدار. ءبىرىنشى كەزەكتە پودستانتسيانى تۇرعىزدىڭىزدار. اقشا دالاعا كەتتى. قاراجاتتىڭ ءبارى بيۋدجەتتەن شىعىپ جاتىر»، - دەدى نۇرلان نىعماتۋلين.
اۆتور: ايان بەكەن ۇلى