نيۋ- يورك باسشىسى قالاعا ۇلتتىق گۆارديانى كىرگىزۋگە قارسى شىقتى
قالا باسشىسىنىڭ ايتۋىنشا، بۇل ءتيىمسىز. ويتكەنى اسكەريلەر الىپ مەگاپوليستە ارەكەت ەتۋ ءتارتىبىن بىلمەيدى. سوندىقتان ونىڭ سالدارى اۋىر بولۋى مۇمكىن دەپ وتىر.
ال نيۋ- يوركتە سوڭعى ءبىر كۇندە تارتىپسىزدىك ۇيىمداستىرىپ، دۇكەندەردى توناعان 700 ادام قاماۋعا الىنعان. اسىرەسە مانحەتتەن مەن برونكستاعى ءبىرقاتار اۋدان قاتتى زارداپ شەككەن.
بيلل دە بلازيو، نيۋ- يورك قالاسىنىڭ مەرى:
- قازىر ءبىزدىڭ قاراۋىمىزدا 36 مىڭ پوليتسەي بار. ولار كەز كەلگەن تارتىپسىزدىكتى توقتاتۋعا قاۋقارلى. ءيا، قازىر شاھارداعى جاعداي ۋشىعىپ تۇر. ماسەلە ءبىر كۇندە شەشىلە قويماس. ءبىراق اسكەريلەردى كىرگىزۋ قاۋىپتى.
جاپپاي شەرۋلەر باستالعالى 11 ادام قازا تاۋىپ، 100 دەن استام كىسى جاراقات العان. بۇل تۋرالى جەرگىلىكتى تەلەارنانىڭ ءبىرى حابارلادى. مارقۇمداردىڭ كوبى - افروامەريكالىقتار. ساراپشىلار بۇل ەلدەگى تولقۋلاردى ودان ءارى ۋشىقتىرا ما دەپ الاڭداپ وتىر.
ەسكە سالا كەتيىك، قۇراما شتاتتاردا جاپپاي نارازىلىق شەرۋلەرىنىڭ ءجۇرىپ جاتقانىنا سەگىزىنشى كۇن. تارتىپسىزدىكتەرگە بايلانىستى ەلدىڭ 40 قالاسىندا كومەندانتتىق ساعات ەنگىزىلگەن. ولاردىڭ ىشىندە ۆاشينگتون، نيۋ- يورك جانە لوس- اندجەلەس شاھارى بار. ءبىراق وسىعان قاراماستان، قالادا توناۋ- ويرانداۋ توقتاماي تۇر.
www.24.kz