ءماجىلىس ءتوراعاسى: كەز كەلگەن ازامات اۋىلىنا ينتەرنەتتىڭ قاشان كەلەتىنىن ءبىلىپ وتىرۋى كەرەك

نۇر- سۇلتان. قازاقپارات - ءماجىلىس ءتوراعاسى نۇرلان نىعماتۋلين كەز كەلگەن ازامات ءوز اۋىلىنا ينتەرنەتتىڭ قاشان كەلەتىنىن ءبىلىپ وتىرۋى كەرەكتىگىن ءمالىم ەتتى، دەپ حابارلايدى قازاقپارات ءتىلشىسى.

ايتا كەتسەك، ماجىلىستە بۇگىن ق ر- نىڭ كەيبىر زاڭنامالىق اكتىلەرىنە اۋىلدىق ەلدى مەكەندەردە ينتەرنەتتىڭ قولجەتىمدىلىگىن قامتاماسىز ەتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى زاڭ جوباسى قارالعان بولاتىن.

«اسقار قۋانىش ۇلى (سيفرلىق دامۋ، يننوۆاتسيالار جانە ايەروعارىش ونەركاسىبى ءمينيسترى جۇماعاليەۆقا) اۋىلدارعا ينتەرنەت تارتۋ تۋرالى اقپارات مەملەكەتتىك قۇپياعا جاتا ما؟ جوق دەسەڭىز ءسىزدىڭ مينيسترلىگىڭىز يندۋستريا جانە ينفراقۇرىلىمدىق دامۋ مينيسترلىگى سەكىلدى جۇمىس جۇرگىزە الا ما؟ ماسەلەن ول مينيسترلىك جۇمىستى رەتتەدى. ياعني قازىر كەز كەلگەن ازامات ولاردىڭ اقپارات كوزىنە كىرىپ، قاي جىلى قانداي جولدىڭ جوندەلەتىنىن بىلە الادى. قازاقستاننىڭ تەلەكوممۋنيكاتسيالىق كارتاسىنىڭ جۇمىسى دا وسىنداي بولۋى كەرەك. حالىق سانى 250-دەن اساتىن نەمەسە اسپايتىن اۋىلدار تۋرالى ايتىپ جاتىرسىزدار. الايدا ونداي ەلدى مەكەندەگى ادامدار ءوز اۋىلىنا ينتەرنەت قاشان كەلەتىنىن ءبىلۋى ءتيىس. تۇسىنىكتى عوي؟ بۇل اقپارات قۇپيا ەمەس پە؟» - دەپ سۇراق قويدى اسقار جۇماعاليەۆقا نۇرلان نىعماتۋلين.

بۇل سۇراققا «قۇپيا ەمەس» دەپ جاۋاپ بەرگەن مينيستر ماۋسىم ايىنىڭ سوڭىنا دەيىن «سيفرلىق كارتانى» ازىرلەۋ جۇمىسى اياقتالاتىنىن جەتكىزدى. نۇرلان نىعماتۋلين ءوز كەزەگىندە ارىپتەستەرىن ءمينيستردىڭ ۋادەسىن ۇمىتپاۋعا شاقىردى.

«ول ءبىزدىڭ الدىمىزدا كارتانىڭ جۇمىس ىستەپ تۇرعانىن جاريالاۋى كەرەك. كەز كەلگەن اۋىلداعى حالىق، كەز كەلگەن ازامات ءوز اۋىلىنا ينتەرنەت قاشان كەلەتىنىن ءبىلىپ وتىرۋى ءتيىس»، - دەدى نۇرلان نىعماتۋلين.

اۆتور: ايان بەكەن ۇلى