رەسەي مەن بەلارۋس سياقتى وداقتاس مەملەكەتتىڭ قۇرامىنا قوسىلۋ جوسپارىمىزدا جوق - قاسىم- جومارت توقايەۆ
«قازاقستان رەسەيمەن جانە بەلارۋسپەن ەكىجاقتى فورماتتا دا، ينتەگراتسيالىق بىرلەستىكتەر (ە ا ە و، ۇ ق ش ۇ، ت م د) اياسىندا دا تىعىز جۇمىس جۇرگىزىپ كەلەدى. رەسەي مەن بەلارۋس سياقتى وداقتاس مەملەكەتتىڭ قۇرامىنا قوسىلۋ ءبىزدىڭ جوسپارىمىزدا جوق. جوعارىدا اتالعان ۇيىمدار اياسىندا ينتەگراتسيانى ودان ءارى دامىتۋ باسىم باعىتىمىز بولىپ قالا بەرەدى»، - دەدى سۇحباتتا مەملەكەت باسشىسى.
بۇدان بولەك، پرەزيدەنت ەۋرازيالىق ەكونوميكالىق وداق الەۋەتىن ەكونوميكالىق وداق رەتىندە كۇشەيتۋگە مۇددەلى ەكەنىن اتاپ وتەدى.
«ەۋرازيالىق ەكونوميكالىق وداقتىڭ الەۋەتىن تەك ەكونوميكالىق وداق رەتىندە كۇشەيتۋگە مۇددەلىمىز. كووپەراتسيالىق بايلانىستاردى دامىتۋ، تاۋارلاردىڭ، كورسەتىلەتىن قىزمەتتەردىڭ جانە جۇمىس كۇشىنىڭ ورتاق نارىعىن قۇرۋ، اتالعان وداققا مۇشە مەملەكەتتەردىڭ ينۆەستيتسيالىق تارتىمدىلىعىن ارتتىرۋ ارقىلى ەاەو- نى جاھاندىق اۋقىمداعى ءتيىمدى قۇرىلىمعا اينالدىرا الار ەدىك. بۇل باعىتتاعى جۇمىستار جۇيەلى تۇردە ىلگەرىلەۋدە. 2025 -جىلعا قاراي ورتاق ەنەرگەتيكالىق جانە قارجىلىق نارىق قالىپتاسادى. اسىرەسە، سيفرلىق ىقپالداستىق پەرسپەكتيۆالى باعىت بولماق. كەيدە ەاەو- دا، ءتىپتى ەڭ جوعارى دەڭگەيدە، قىزۋ پىكىرتالاستار بولادى، ءبىراق بۇل تالقىلاۋلار وداقتى نەعۇرلىم تابىستى، بەدەلدى، تارتىمدى ەتۋگە دەگەن ورتاق تالپىنىستى بىلدىرەدى. ال وعان نەمقۇرايدى قاراۋ - انىق دەگراداتسيانىڭ بەلگىسى»، - دەدى مەملەكەت باسشىسى.
اۆتور: ايجان سەرىكجان قىزى