تۇركى تىلدەس مەملەكەتتەردىڭ جوعارى وقۋ ورىندارى ونلاين كونسەرت وتكىزدى
ونلاين فورماتتاعى شاراعا قازاق ۇلتتىق قىزدار پەداگوگيكالىق ۋنيۆەرسيتەتى، تۇركيانىڭ نيگدە ومەر حاليسدەمير ۋنيۆەرسيتەتى جانە ءجۇسىپ بالاساعۇن اتىنداعى قىرعىز ۇلتتىق ۋنيۆەرسيتەتىنىڭ قىزمەتكەرلەرى مەن ونەرپازدارى قاتىستى.
ءبىرىنشى بولىپ ءسوز العان قىزدار ۋنيۆەرسيتەتىنىڭ اكادەميالىق ماسەلەلەر جونىندەگى دەپارتامەنت ديرەكتورى قىمبات بالاجانوۆا ەلىمىزدە جاريالاعان كارانتين جاعدايىندا قاشىقتان وقىتۋ بارىسى تۋرالى اقپارات بەرىپ، وسى ورايدا اتقارىلعان جۇمىستار جايىندا كەڭىنەن اڭگىمەلەدى. سونىمەن قاتار ول اكادەميالىق ۇتقىرلىق باعدارلاماسى شەڭبەرىندە تۇركى تىلدەس مەملەكەتتەردە ءبىلىم الۋ مۇمكىندىكتەرىن ايتتى.
سونداي-اق ونلاين جيىندا ج. بالاساعۇن اتىنداعى قىرعىز ۇلتتىق ۋنيۆەرسيتەتىنىڭ پەداگوگيكا فاكۋلتەتىنىڭ دەكانى، «مۇعالىم» عىلىمي- پەداگوگيكالىق جۋرنالىنىڭ باس رەداكتورى راحات سۋلايمانوۆا مەن نيگدە ومەر حاليسدەمير ۋنيۆەرسيتەتىنىڭ ەۋرازيا زەرتتەۋلەرى ءبولىمىنىڭ باسشىسى تۋرگاي دۇيەن ءوز وقۋ ورىندارى تۋرالى تولىققاندى مالىمەت بەردى.
تىكەلەي ەفير بارىسىندا شەتەلدىك عالىمدار تۇركى بىرلىگىن دامىتۋ ورايىندا قولعا الىنىپ جاتقان باستامالار مەن ءبىلىم جانە عىلىم سالاسىندا ءتۇبى ءبىر تۋىستاس مەملەكەتتەر اراسىنداعى بايلانىستاردى ارتتىرۋ باعىتىندا قولعا الىنعان شارالار جايىندا دا ايتتى.
سونداي- اق ولار «ءبىلىم جانە عىلىم سالاسىندا ءتۇبى ءبىر تۋىستاس مەملەكەتتەر اراسىنداعى بايلانىستاردى ارتتىرۋ ءۇشىن نە ىستەۋ كەرەك دەپ ويلايسىز؟ بۇل تاراپتا نە نارسەگە ماڭىز بەرگەن ابزال؟» دەگەن ساۋالدارعا دا جاۋاپ بەردى.
ءۇش ساعاتقا سوزىلعان شارا بارىسىندا اتالعان جوعارى وقۋ ورىندارىنىڭ ونەر ۇجىمدارى ۇلتتىق مۋزىكالىق تۋىندىلاردى ورىنداپ، ءتول مادەنيەتىمىزدى دارىپتەدى.
ايتا كەتەيىك، قىزدار ۋنيۆەرسيتەتىنىڭ YouTube جەلىسىندەگى رەسمي ارناسىندا وتكەن شارانىڭ كوزدەگەنى - ءتۇبى ءبىر تۋىسقان مەملەكەتتەردىڭ ءبىلىم، عىلىم جانە مادەني ىنتىماقتاستىعىنىڭ دامۋىن ارتتىرۋ، تالانتتى جاستارعا قولداۋ كورسەتۋ.
اتالعان ءبىلىم وردالارىنىڭ قاتىسۋىمەن جىل سايىن تۇركى الەمى زەرتتەۋلەرى سيمپوزيۋمى ءوتىپ كەلەدى.
2014 -جىلدان باستاۋ العان ءداستۇرلى جيىننىڭ باستى ماقساتى - الەمدەگى عىلىم، ءبىلىم سالاسىندا تۇركى الەمىنە قاتىستى زەرتتەۋ جاساپ جۇرگەن عالىمداردىڭ باسىن قوسىپ، عىلىمي باعىتتا پىكىر الماسۋدى قامتاماسىز ەتۋ، جاڭا عىلىمي زەرتتەۋلەرگە جول اشىپ، تۇركى الەمى ادەبيەتى مەن مادەنيەتىنىڭ كەڭەيۋىنە ىقپال جاساۋ.
