ق ر پرەزيدەنتى باس پروكۋرورعا داعدارىسقا قارسى شارالاردىڭ ورىندالۋىن قاتاڭ باقىلاۋدى تاپسىردى

نۇر-سۇلتان. قازاقپارات - قازاقستان پرەزيدەنتى قاسىم-جومارت توقايەۆ باس پروكۋرور عيزات نۇرداۋلەتوۆتى قابىلدادى، دەپ حابارلايدى قازاقپارات اقوردانىڭ باسپا ءسوز قىزمەتىنە سىلتەمە جاساپ.

قاسىم-جومارت توقايەۆقا ەلىمىزدەگى زاڭدىلىق پەن قۇقىقتىق ءتارتىپ جايى باياندالدى. باس پروكۋرور توتەنشە جاعداي رەجيمى كەزىندە قىلمىس دەڭگەيىنىڭ تومەندەگەنىن اتاپ ءوتتى.

قازاقستان پرەزيدەنتىنە ءىرى قىلمىستىق ىستەردىڭ تەرگەلۋ بارىسى جانە قوعامدىق مۇددەنى قورعاۋعا قاتىستى جۇمىستار تۋرالى مالىمەت بەرىلدى.

قاسىم-جومارت توقايەۆ داعدارىسقا قارسى شارالاردىڭ ورىندالۋىن قاتاڭ باقىلاي وتىرىپ، زاڭدىلىقتى ساقتاۋ، مەملەكەت پەن قوعام مۇددەسىن قورعاۋ باعىتىنداعى جۇمىستاردى جالعاستىرا بەرۋ قاجەتتىگىن ايتتى.

كەزدەسۋ سوڭىندا مەملەكەت باسشىسى ءبىرقاتار ناقتى تاپسىرما بەردى.