جەردەگى تىرشىلىكتىڭ پايدا بولۋىنىڭ جاڭا سەبەبى اتالدى

نۇر-سۇلتان. قازاقپارات - حالىقارالىق عالىمدار توبى ءىرى استەرويدتىڭ قۇلاۋىن ءومىردىڭ پايدا بولۋىنىڭ ىقتيمال سەبەبى دەپ اتادى..

مۇنداي قورىتىندىعا زەرتتەۋشىلەر كراتەردە چيكشۋلۋب (چيكسۋلۋب) باكتەريالاردىڭ ومىرىنە ساي كەلەتىن گيدروتەرمالدىق جۇيەنىڭ ىزدەرىن تاپقان سوڭ كەلدى. زەرتتەۋشىلەر ماقالاسى Science Advances جۋرنالىندا جاريالانعان.

ەكسپەديتسيا 66 ميلليون جىل بۇرىن پايدا بولعان چيكشۋلۋب كراتەرى ساقيناسىنىڭ اۋدانىنداعى تەڭىز تۇبىنەن 1335 مەتر تەرەڭدىكتە جاڭا ۇڭعىمالاردى بۇرعىلاپ، الىنعان جىنىستاردىڭ حيميالىق جانە مورفولوگيالىق قۇرامىن زەرتتەدى. كراتەردە جۇزدەگەن تەكشە شاقىرىمنان استام جەر قىرتىسىنىڭ حيميالىق تۇرلەنۋىنە ىقپال ەتكەن كەڭ گيدروتەرمالدىق جۇيە بولعاندىعى بەلگىلى بولدى. بۇل يەللوۋستون كالدەرلەرىنىڭ كولەمىنەن توعىز ەسە ارتىق.

گيدروتەرمالدىق كوزدەردىڭ تەمپەراتۋراسى 300-400 سەلسي گرادۋسقا جەتتى، ال جۇيەنىڭ ءوزى ميلليون جىلعا جۋىق ۋاقىت ءومىر سۇرگەن.

عالىمداردىڭ پىكىرىنشە، ميللياردتاعان جىل بۇرىن وسىعان ۇقساس اپات العاشقى ميكروورگانيزمدەردىڭ پايدا بولۋىنا اكەلۋى مۇمكىن. سوققى ناتيجەسىندە پايدا بولعان گيدروتەرميالىق جۇيەلەر ءتىرى جاسۋشالاردى قۇرايتىن حيميالىق زاتتار مەن بەلوكتاردىڭ سينتەزدەلۋىنە جاعداي جاسادى.