بەينەجازبادان تۇلەكتىڭ تىيىم سالعان زاتتى پايدالانعانى انىقتالسا، ۇ ب ت ناتيجەسى جويىلادى
بۇل تۋرالى ۇكىمەت وتىرىسىندا ق ر ءبىلىم جانە عىلىم ءمينيسترى اسحات ايماعامبەتوۆ ايتتى، دەپ حابارلايدى قازاقپارات ءتىلشىسى.
«بەينەجازبانى قاراۋ كەزىندە تالاپكەرلەردىڭ تىيىم سالىنعان زاتتاردى پايدالانعانى انىقتالسا، وندا ۇ ب ت ناتيجەسى، سونىمەن قاتار ءبىلىم بەرۋ گرانتى جويىلادى. بۇعان قوسا، تاعى دا جاڭاشىلدىقتار بار. تەست تاپسىرۋشىلارعا قاراپايىم كالكۋلياتور بەرىلەتىن بولادى جانە تەستىلەۋ ۋاقىتى 3 ساعات 50 مينۋتتان 4 ساعاتقا دەيىن ۇزارتىلدى. تالاپكەرلەر ۇ ب ت- عا جاقسى دايىندالۋى ءۇشىن ءبىز ولارعا اقىسىز ورتالىقتىڭ سايتىندا 70 نۇسقا تەستتەرىن الدىن الا بەرگەن بولاتىنبىز. تۇلەكتەر ەمىن- ەركىن وسى سىناما تەستىلەردى تاپسىرۋ مۇمكىندىگىنە يە بولدى جانە تاپسىردى دەپ ايتا الامىز»، - دەدى مينيستر.
ونىڭ اتاپ وتۋىنشە، بۇعان قوسا بيىلعى تىلەكتەر مەكتەپتە تاپسىراتىن قورىتىندى ەمتيحانداردان مامىر ايىنىڭ سوڭىندا بوساتىلدى.
«وسى شارالاردىڭ بارلىعى تۇلەكتەر ءۇشىن ۇلكەن قولداۋ ەكەنى ءسوزسىز»، - دەدى ول.