تولقۋلارعا بايلانىستى ترامپ جەراستى بۋنكەرگە تىعىلدى

None
None
نۇر-سۇلتان. قازاقپارات - ا ق ش پرەزيدەنتى دونالد ترامپ جۇمادان سەنبىگە قاراعان ءتۇنى اق ءۇي ماڭىندا بولعان تارتىپسىزدىكتەرگە بايلانىستى جەراستى بۋنكەرىنە ەۆاكۋاتسيالاندى. بۇل تۋرالى The New York Times گازەتى جازدى.

ال CCN- ءنىڭ حابارلاۋىنشا، ترامپ بۋنكەردە ءبىر ساعاتتاي بولعان. قاسىندا ءبىرىنشى حانىم مەلانيا ترامپ پەن بەررون ەسىمدى ۇلى بولعان كورىنەدى. دەسە دە، بۇل اقپاراتتى پرەزيدەنت اكىمشىلىگى ازىرگە راستاماي وتىر.

The New York Times گازەتىنىڭ حابارلاۋىنشا، امەريكا پرەزيدەنتى بۋنكەرگە اق ۇيگە قاۋىپ تونگەن جاعدايدا عانا تىعىلادى. سوڭعى رەت ا ق ش باسشىسى مۇنداي قادامعا 2001 -جىلعى تەررورلىق شابۋىل كەزىندە بارعان. سول كەزدە بۋنكەرگە قۇراما شتاتتاردىڭ 43 - پرەزيدەنتى دجوردج بۋش پەن ۆيتسە- پرەزيدەنت ديك چەيني ءتۇسىپتى.

وتكەن اپتادا ميننەاپوليس قالاسىندا پوليتسەي دجوردج فلويد ەسىمدى افروامەريكالىقتى تۇتقىندايمىن دەپ كۇش قولدانىپ، ءولتىرىپ العان ەدى.

قازىر سول ءتارتىپ ساقشىسى قاماۋدا وتىر. تۇتقىنداۋعا بىرگە بارعان قالعان ءۇش پوليتسەي جۇمىستان قۋىلدى. قازىر تەرگەلىپ جاتىر. وسى دجوردج فلويدتىڭ ءولىمى قوعامنىڭ نارازىلىعىن تۋعىزىپ، ەل جاپپاي كوشەگە شىقتى. ءتىپتى پوليتسەيلەردىڭ باسسىزدىعىنا قارسى ەرەۋىلدەر ا ق ش- تان اسىپ، ەۋروپادا جالعاسىن تابۋدا.

اشىنعان جۇرت دۇكەندەردى توناپ، ءتۇرلى عيماراتتارعا وت قويىپ، جولداردى جاۋىپ تاستاپ جاتىر. جاعدايدىڭ ۋشىعۋىنا بايلانىستى ا ق ش- تىڭ 40 ءىرى قالاسىندا كومەندانتتىق ساعات جاريالاندى. الايدا جۇرتتىڭ ونى ەلەپ جاتقانى شامالى. ادىلدىكتى تالاپ ەتكەن تۇرعىندار جولداعىنىڭ ءبارىن جايپاپ، قيراتىپ جاتىر. ساۋدا ورتالىقتارى مەن كەڭسەلەر ورتەنگەن. كەيبىرەۋلەر تىپتەن دۇكەندەردى قيراتىپ، قولىنا تۇسكەننىڭ ءبارىن وزىمەن بىرگە اكەتىپ جاتىر.

ميننەاپوليستە جۇك كولىگىن تىزگىندەگەن ەر ادام ەرەۋىلشىلەردى تاپتاپ كەتە جازدادى. سول ماڭايدا جۇرگەن جۇرت جابىلىپ، جۇرگىزۋشىنى سوققىعا جىققان. فەرگيۋسون قالاسىندا تۇرعىندار پوليتسيا بولىمشەسىن تاسپەن اتقىلادى. ءتىپتى جانعىش قوسپاسى بار شولمەك لاقتىرعاندار بار. نەشۆيللدە سوت جانە مۋنيتسيپالدىق كەڭەس عيماراتى ورتەندى. اشىنعان جۇرتتى تاراتۋ ءۇشىن پوليتسەيلەر كوز جاساۋراتاتىن گاز قولدانۋدا. جالپى تارتىپسىزدىكتەرگە بايلانىستى سوڭعى بىرنەشە كۇندە 4 مىڭنان اسا ادام قاماۋعا الىنعان.

فلويد، ەرەۋلشى:

- بۇل ءبىر ەمەس، ەكى ەمەس، قانشا مارتە قايتالانىپ وتىرعان جاعداي. پوليتسەيلەردىڭ باسسىزدىعىندا شەك جوق. سوندىقتان ءبىز ۇندەمەي وتىرا المايمىز.

ەرەۋىلدەر ەل استاناسى ۆاشينگتوندا دا ءوتتى. جۇرت اق ۇيگە قاراي بەت العان. الايدا جولدارىن پوليتسەيلەر بوگەپ، مۇنىڭ سوڭى بۇلىككە ۇلاستى. وسى رەتتە اق ءۇي قىزمەتكەرلەرىنە ۋاقىتشا جۇمىسقا شىقپاۋ تۋرالى ەلەكتروندىق حات جىبەرىلگەن. جاعدايدىڭ ۋشىققانى سونشالىق، دونالد ترامپ وتباسىمەن بىرگە شامالى ۋاقىتقا بۋنكەرگە جاسىرىنعان. بۇل جايىندا «نيۋ- يورك تايمس» باسىلىمى حابارالايدى.

دونالد ترامپ، ا ق ش پرەزيدەنتى:

- مەنىڭ اكىمشىلىگىم زورلىق- زومبىلىقتى توقتاتادى. امەريكاعا قۇلدىراۋ ەمەس، ورلەۋ قاجەت. قاستىق ەمەس، دوستىق كەرەك. بۇلىكتىڭ ورنىنا ءتارتىپ ورناۋى كەرەك.

ساراپشىلار الداعى ۋاقىتتا جاعداي بۇدان دا بەتەر ۋشىعىپ كەتە مە دەپ الاڭداۋلى. ويتكەنى ەرەۋىلشىلەر كارانتيننەن كەيىن ەندى عانا اشىلا باستاعان دۇكەندەر مەن مەيرامحانالاردى قيراتىپ جاتىر. سوندىقتان شاعىن جانە ورتا بيزنەس يەلەرى ءوز كاسىبىن قورعاپ قالۋ ءۇشىن پوليتسەيلەردى قولدايدى. كەيبىرەۋلەر تىپتەن كوشەگە قولىنا قارۋ الىپ شىقپاق نيەتتە.

ميۋريەل باۋزەر، ۆاشينگتون مەرى:

- العاشىندا ەرەۋىلدەر بەيبىت تۇردە وتكەن. الايدا ارتىنشا تارتىپسىزدىكتەر بەلەڭ الدى. كوبى بۇعان الدىن الا دايىندالىپ كەلگەنگە ۇقسايدى. ماسەلەن، دۇكەندەردىڭ تەرەزە- ەسىگىن سىندىرۋ ءۇشىن ارنايى قۇرالدار الىپ كەلگەن. سوندىقتان بۇلىككە ۇيىمداسقان توپتاردىڭ قاتىسى بار ما دەگەن وي كەلەدى.

ساراپشىلاردىڭ الاڭداتىپ وتىرعان تاعى ءبىر ماسەلە - كوروناۆيرۋس. ەلدە ىندەت قايتا ءورشىپ كەتە مە دەگەن قاۋىپ باسىم. ويتكەنى بىرەۋى بەتپەردە تاقسا، بىرەۋى تاقپايدى. ال اراقاشىقتىق ساقتاۋ دەگەن اتىمەن جوق. سوندىقتان تارتىپسىزدىكتەرگە بايلانىستى توتەنشە جاعداي جاريالانعان اتلانتا قالاسىنىنىڭ مەرى ەرەۋىلشىلەردىڭ بارلىعىن تەست تاپسىرۋعا شاقىردى. جالپى وسى جاپپاي تولقۋدىڭ كەسىرىنەن لوس- اندجەلەستەگى كوروناۆيرۋسقا تەست جۇرگىزەتىن دەنساۋلىق ساقتاۋ مەكەمەلەرىنە دە نۇقسان كەلگەن.

www.24.kz



سوڭعى جاڭالىقتار