سالقىن سۋعا ۇزاق ۋاقىت شومىلۋ پايداسىز ءارى دەنساۋلىققا قاۋىپتى

نۇر- سۇلتان. قازاقپارات - سالقىن نە بولماسا سۋىق سۋعا ۇزاق ۋاقىت شومىلۋ پايداسىز ءارى دەنساۋلىققا قاۋىپتى. بۇل تۋرالى ق ر ءى ءى م توتەنشە جاعدايلار كوميتەتىنىڭ ءتوراعاسى ۆلاديمير بەككەر ايتتى، دەپ حابارلايدى قازاقپارات ءتىلشىسى.

«شومىلۋعا قاتىستى ءبىرقاتار كەڭەس بەرگىم كەلەدى. سالقىن نە بولماسا سۋىق سۋعا ۇزاق ۋاقىت شومىلۋدىڭ ەش پايداسى جوقتىعىمەن قاتار دەنساۋلىققا قاۋىپ توندىرەدى. ءبىز سۋدىڭ تەمپەراتۋراسىنا بايلانىستى سۋعا شومىلۋ رەجيمىن ۇستانۋعا كەڭەس بەرەمىز. سۋ تەمپەراتۋراسى +18 گرادۋس بولعاندا - 6-8 مينۋت، +20 گرادۋستا - 10-12 مينۋت، +20 گرادۋستان جوعارى بولعاندا - 15 مينۋتقا دەيىن عانا شومىلۋ كەرەك»، - دەدى كوميتەت باسشىسى.

جىل باسىنان بەرى ورىن العان قايعىلى جايتتارعا توقتالعان ۆلاديمير بەككەردىڭ دەرەگىنشە، وسى ۋاقىتقا دەيىن 62 ادامنىڭ، ونىڭ ىشىندە 22 بالانىڭ اجالى سۋدان بولىپ وتىر. ونىڭ ىشىندە 24 ادام - بالىق اۋلاۋ كەزىندە، 13 ادام - قاتتى اعىسقا، يىرىلمگە تاپ بولىپ نەمەسە اياعى تارتىلىپ باتىپ كەتكەن. 10 بالا سۋعا قۇلاپ ءجانتاسىلىم ەتسە، ىشىمدىك ىشكەن 9 ادامنىڭ اجالى سۋدان بولدى.

«وكىنىشكە قاراي، ەلىمىزدە سۋعا كەتۋ دەرەگى جوعارى بولىپ تۇر. ەرەسەكتەردىڭ كىشكەنتاي بالالاردى قاراۋسىز قالدىراتىنى الاڭداتادى. سونىڭ كەسىرىنەن بالالار ارىققا، ارناعا، سۋ قويمالارىنا قۇلاپ كەتىپ مەرت بولادى. وتكەن تاۋلىكتىڭ وزىنە 14 ادام سۋعا كەتسە، سونىڭ التاۋى - بالالار» ، - دەدى ۆ. بەككەر.