قازاقستاندا جىل سايىن مىڭعا جۋىق اتا-انا بالا تاربيەلەۋ قۇقىعىنان ايىرىلادى
بۇل تۋرالى ق ر ءى ءى م يۋۆەنالدىق پوليتسيا جانە ايەلدەردى زورلىق- زومبىلىقتان قورعاۋ باسقارماسىنىڭ باسشىسى اسەت وسپانوۆ ءمالىم ەتتى، دەپ حابارلايدى قازاقپارات ءتىلشىسى.
اتا-انا قۇقىعىنان ايىرۋ ۇزاق پروتسەسس ەكەنىن توقتالعان ول، «ونىڭ باستى سەبەبىنە توقتالساق، بالانىڭ اتا- اناسى ىشىمدىككە سالىنىپ، بالا تاربيەسىمەن اينالىسپايدى. اتا- انا قۇقىعىنان ايىرۋ تۋرالى ماسەلەنى كوتەرمەس بۇرىن بۇل وتباسىلار ءتيىستى مەرزىمدە پوليتسيا ورگاندارىندا ەسەپتە تۇرادى. وسى ورايدا پروفيلاكتيكالىق شارالار جۇرگىزىلەدى»، - دەدى.
ەڭ الدىمەن، ءوز مىندەتىن دۇرىس اتقارماي جۇرگەن اتا-انالار ەسەپكە قويىلادى. سول وتباسىمەن پروفيلاكتيكالىق جۇمىس ىستەپ، تۇرعىلىقتى ءۇي-جايى تەكسەرىلەدى. ءتيىستى جۇمىستاردان سوڭ ولارمەن جەكە اڭگىمە جۇرگىزىلىپ، اتا- انالارعا نۇسقاۋلىق بەرىلەدى.
«وكىنىشكە قاراي، جىل سايىن وسى سەبەپتەردىڭ سالدارىنان ەلىمىزدە مىڭعا جۋىق وتباسى اتا- قۇقىعىنان ايىرىلادى»، - دەپ ناقتىلادى ءا. وسپانوۆ.
ءوز كەزەگىندە ق ر ب ع م بالالاردىڭ قۇقىقتارىن قورعاۋ كوميتەتى ءتوراعاسىنىڭ مىندەتىن اتقارۋشى دۋلات جەكەبايەۆ اتا-انالاردى جۇمىسپەن قامتۋ، ەم- دوم قابىلداۋعا جىبەرۋ مۇمكىندىكتەرى ەسكەرىلەتىنىن اتاپ ءوتتى.
«الايدا بالانىڭ قاۋىپسىزدىگىنە قاتەر تۋسا، سوت ارقىلى اتا- انالىق قۇقىعىنان ايىرۋ ءماجبۇرلى قادامىنا بارامىز. كەيىننەن بۇل اتا-انالار جاعدايدى تۇزەتۋ مۇمكىندىگىنە يە. ەمدەلىپ، جۇمىسقا تۇرسا ءارى تۇرعىلىقتى باسپاناسىن جاقسارتسا، وندا مەملەكەت كوميسسيالىق تارتىپتە اتا-انا قۇقىعىن قايتارۋدى قاراستىرۋعا دايىن ەكەنىن اتاپ وتكەن ءجون»، - دەدى د. جەكەبايەۆ.
اۆتور: رۋسلان عابباسوۆ