قازاقستاندا بالالاردىڭ جازعى لاگەرلەرى قاشان اشىلاتىنى بەلگىلى بولدى

نۇر-سۇلتان. قازاقپارات – ق ر ب ع م بالالار قۇقىقتارىن قورعاۋ كوميتەتى ءتوراعاسىنىڭ ورىنباسارى يۋليا وۆەچكينا جاز مەزگىلىندە بالالار لاگەرلەرى قالاي جۇمىس ىستەيتىنىن ءتۇسىندىردى، دەپ حابارلايدى قازاقپارات ءتىلشىسى.

«بيىلعى جاز مەزگىلى 3 ميلليون 57 مىڭ وقۋشى ءۇشىن بىلتىرعا قاراعاندا وزگەشە بولادى. سوندىقتان جازعى دەمالىستى ۇيىمداستىرۋدا وزىندىك ەرەكشەلىكتەر ەنگىزىلەدى. كوميتەت تاراپىنان بۇل تۇرعىدا ءۇش باعىت ايقىندالدى. بىرىنشىدەن، لاگەرلەر ۇيىمدارىنىڭ جۇمىسى. ەكىنشىدەن، بالالالاردى جازعى شارالارمەن قامتۋ، ونىڭ ىشىندە جەكەلەي ساناتتاعى بالالارعا جاعداي جاساۋ. ۇشىنشىدەن، قاۋىپسىزدىك شارالارىن قامتاماسىز ەتۋگە ەكپىن قويىلادى. بالالارعا ارنالعان ساۋىقتىرۋ لاگەرلەرى، ورتالىقتار، كەشەندەر، قالا ماڭىنداعى لاگەرلەر قىزمەتىن جانداندىرۋ شەشىمى سانيتارلىق نورمالاردى ساقتاۋ شارتىمەن جەرگىلىكتى اتقارۋ ورگاندارى تاراپىنان قابىلدانادى»، - دەپ ءتۇسىندىردى ي. وۆەچكينا ونلاين باسپا ءسوز ءماسليحاتىندا.

ونىڭ سوزىنە قاراعاندا، بۇگىندە بالالار لاگەرلەرى 8-ماۋسىمنان ەكى وڭىردە، 15-ماۋسىمنان 12 وڭىردە، ال 20-ماۋسىمنان تاعى ەكى وڭىردە اشىلاتىنىن بەلگىلى بولدى. شىمكەنت قالاسىندا لاگەرلەر 8-ماۋسىمدا، ەلوردادا 20-ماۋسىمدا اشىلادى.

«الماتىدا مەكتەپ جانىنداعى جانە قالا سىرتىنداعى بالالار لاگەرلەرى ۇيىمداستىرىلمايتىنى تۋرالى شەشىم قابىلداندى. الدىن الا مالىمەتتەر بويىنشا 12154 لاگەرلەردىڭ ىشىندە تەك 65 پايىزى جۇمىس ىستەيدى. لاگەرلەرگە بارا المايتىن قالعان وقۋشىلار نە ىستەيدى؟ وسى ماقساتتا ءبىز مەكتەپ جانىنداعى ۇيىمداردىڭ قىزمەتىن كۇشەيتتىك. ولاردىڭ بارلىعى بالالاردى تولىقتاي قامتۋعا دايىن، ونىڭ ىشىندە ونلاين فورما دا بار»، - دەدى كوميتەت وكىلى.