پوليتسەيلەردەن قاشقان اسسەنيزاتور جۇرگىزۋشىسى ارىققا ءتۇسىپ كەتتى
30-مامىردا رەسپۋبليكالىق ماڭىزى بار «سامارا - شىمكەنت» تاسجولىنىڭ 1907 - 1957 شاقىرىمى ارالىعىندا ساعات 07:00 شاماسىندا گاز 53 ماركالى اۆتوكولىگى (اسسەنيزاتور كولىگى) جولدىڭ قارسى بەتىنە شىعىپ، پوليتسيا قىزمەتكەرلەرىنىڭ توقتاتۋ زاڭدى تالابىنا باعىنبادى. پوليتسەيلەردەن قاشقان كولىك جۇرگىزۋشىسى جولدىڭ ءجۇرىس بولىگىنەن شىعىپ كەتىپ، جول جيەگىندەگى ارىققا ءتۇسىپ، توقتادى.
پوليتسيا قىزمەتكەرلەرى دەرەۋ كولىكتىڭ ارتىنان ءجۇرىپ، جۇرگىزۋشىنىڭ ماس كۇيدە ەكەنىن بايقادى. ىشىمدىك ءىشىپ، كولىك ايداعان جۇرگىزۋشىنى پوليتسەيلەر ساراپتامادان وتكىزۋ ءۇشىن شيەلى اۋداندىق اۋرۋحانانىڭ ناركولوگيا بولىمىنە اپاردى.
ساراپتاما قورىتىندىسىنا سايكەس، كولىك جۇرگىزۋشىسى ورتا دارەجەلى ماس كۇيدە بولعانى انىقتالدى.
سول جەردە پوليتسەيلەر 26 جاستاعى كولىك جۇرگىزۋشىسى قاراۋىلتوبە اۋىلىنىڭ تۇرعىنىنا قاتىستى ق ر ا ق ب ت ك-نىڭ 608-بابىنىڭ 1-بولىگىمەن (جۇرگىزۋشىنىڭ كولىك قۇرالىن الكوگولدىك ماساڭ كۇيدە باسقارعانى ءۇشىن) جانە 596-بابىنىڭ 1-بولىگىمەن (كولىك قۇرالىنىڭ جولدىڭ ءجۇرىس بولىگىنە قاراما-قارسى باعىتتا شىعۋى) اكىمشىلىك حاتتامالار تولتىرىلدى.
اسسەنيزاتور كولىگى ايىپ تۇراعىنا قويىلدى. جيناقتالعان قۇجاتتار ءتيستى شەشىم قابىلداۋ ءۇشىن سوتقا جولداندى.