اقتاۋدا بويجەتكەن جول تالعامايتىن كولىكتى ۇرلاپ، جول اپاتىنا ۇشىرادى

اقتاۋ. قازاقپارات - وقيعا كۋاگەرلەرىنىڭ ايتۋىنشا، بويجەتكەن قالاداعى كولىك جۋۋ ورىندارىنىڭ بىرىندە وندا كەلۋشىلەرمەن بىرگە دەمالىپ جۇرگەن.

ءبىر كەزدە ول بىرەۋدىڭ كولىگىنە ءمىنىپ الىپ، ونى ايداپ اكەتتى. ودان كەيىن جول- كولىك اپاتىنا ءتۇسىپ قالعان، دەپ حابارلايدى قازاقپارات لادا- عا سىلتەمە جاساپ.

ۆەدومستۆودان حابارلاعانداي، ساعات 06:00-دە كەزەكشىنىڭ پۋلتىنە قالانىڭ 33-شاعىناۋدانىندا جول تالعامايتىن كولىكتىڭ اپاتقا ۇشىراعانى تۋرالى حابارلاما كەلىپ تۇسكەن.

«وقيعا ورنىنا شۇعىل تۇردە اقتاۋ پوليتسيا باسقارماسىنىڭ پاترۋلدىك پوليتسيا باتالونىنىڭ قىزمەتكەرلەرى شىقتى. كولىكتى باسقارعان بويجەتكەننىڭ ماس بولعانى انىقتالدى. ول جولدىڭ جيەگىنە شىعىپ كەتىپ، اۋدارىلدى. كولىك ايىپپۇل تۇراعىنا قويىلدى»، - دەپ اتاپ ءوتتى ماڭعىستاۋ وبلىستىق پوليتسيا دەپارتامەنتىنەن.

بۇزاقىعا قاتىستى ق ر اكىمشىلىك قۇقىق بۇزۋشىلىق تۋرالى كودەكستىڭ 608-بابى (كولىك قۇرالىن الكوگولدىك، ەسىرتكىلىك نەمەسە ۋىتقۇمارلىق ماساڭ كۇيدە باسقارۋ) جانە 610-بابى (كولىك قۇرالدارى جۇرگىزۋشىلەرىنىڭ جول ءجۇرىسى قاعيدالارىن ادامداردىڭ دەنساۋلىعىنا زيان كەلتىرۋگە، كولىك قۇرالدارىنىڭ نەمەسە وزگە دە مۇلىكتىڭ بۇلىنۋىنە الىپ كەلگەن بۇزۋشىلىعى) بويىنشا حاتتاما تولتىرىلدى. وقيعانىڭ ءمان-جايى انىقتالۋ ۇستىندە.