زۇلمات جىلداردىڭ ءالى دە اشىلماعان اقتاڭداقتارى كوپ - تاريحشى ساعىنعالي ابۋباكىروۆ

شىمكەنت. قازاقپارات - شىمكەنتتىك تاريحشى ساعىنعالي ابۋباكىروۆ زۇلمات جىلدارعا قاتىستى ارنايى مەملەكەتتىك كوميسسيا قۇرىلاتىنى دەر كەزىندە قابىلدانعان شەشىم ەكەنىن ايتادى.

ونىڭ پىكىرىنشە، تاريحي ادىلدىكتى قالپىنا كەلتىرۋ جۇمىستارىن اياقتاۋ مەن ساياسي قۋعىن-سۇرگىن قۇرباندارىن اقتاۋ بويىنشا كوپ زەرتتەۋ جۇمىستارىن جۇرگىزۋ قاجەت، دەپ حابارلايدى قازاقپارات ءتىلشىسى.

تاريحشى-عالىم ءوز كەزەگىندە رەپرەسسياعا ۇشىراعان ۇلت ارداقتىلارىن بۇگىنگى ۇرپاق ەستەن شىعارماس ءۇشىن ءار وڭىردە ارىستاي ازاماتتار جايىندا جيناق كىتاپتار شىعارسا دەپ وتىر.

«ءار ايماقتاعى ەلدى مەكەندەرگە، كوشەلەرگە نەمەسە سول جەردەگى مەكتەپتەرگە دە ەڭبەگى سىڭگەن ازاماتتاردىڭ اتىن بەرسە، اتىن بەرىپ قانا قويماي جاستارعا ەرلىگىن، ورلىگىن ناسيحاتتاۋ جاعىن دا قالىس قالدىرماسا دەگەن ويىمدى جەتكىزگىم كەلەدى. سونداي-اق، ەلىمىزدەگى مۇراعاتتاردا جاتقان ماتەريالداردى قولجەتىمدى ەتۋگە قولعابىس ەتسە دەيمىن. سەبەبى، وعان تاريحشىلاردىڭ قولى جەتە بەرمەيدى. مىنە، مەملەكەتتىك دەڭگەيدە وسىعان رۇقسات بەرەتىن كەز كەلدى. مەملەكەتتىك كوميسسيا وسىعان نازار اۋدارسا دەيمىن. ويتكەنى، زۇلمات جىلدارعا قاتىستى ءالى دە اشىلماعان اقتاڭداقتار كوپ»، - دەيدى تاريح عىلىمدارىنىڭ كانديداتى، پروفەسسور.