ورالدا كوروناۆيرۋستان كوز جۇمعان ەر ادام تەڭىز كەن ورنىندا جۇمىس ىستەگەن

ورال. قازاقپارات - ورالدا كوروناۆيرۋستان قايتىس بولعان ەر ادام تەڭىز كەن ورنىندا ۆاحتالىق ادىسپەن جۇمىس ىستەگەن، دەپ حابارلايدى قازاقپارات ءتىلشىسى.

ب ق و دەنساۋلىق ساقتاۋ باسقارماسى ءمالىم ەتكەنىندەي، 1967 -جىلعى ەر ادام - ورال قالاسىنىڭ تۇرعىنى.

ول 3-مامىر كۇنى ورالعا اۆتوبۋسپەن كەلگەن. بلوكپوستان كارانتيندىك ستاتسيونارعا جاتقىزىلىپ، Covid-19-عا الىنعان سىناما تەرىس ناتيجە كورسەتكەن.

ەپيدەميولوگيالىق احۋالدى ەسكەرە وتىرىپ، قارىم-قاتىناستا بولعان ادام رەتىندە پروۆيزورلىق ستاتسيونارعا اۋىستىرىلعان. 9-مامىر كۇنى الىنعان سىناما دا تەرىس ناتيجە كورسەتكەننەن كەيىن ءۇي كارانتينىنە جىبەرىلگەن. 10-مامىردان باستاپ مەديتسينا قىزمەتكەرلەرىنىڭ باقىلاۋىندا بولعان. 10-مامىردان باستاپ تاماعى جىبىرلاپ، السىزدىك پايدا بولىپ، تابەتى تومەندەگەن. الايدا سودان كەيىنگى توعىز كۇن بويى كومەككە جۇگىنبەگەن، مەديتسينا قىزمەتكەرلەرى كۇن سايىن قوڭىراۋ شالعان كەزدە دەنساۋلىعىنا شاعىمدانباعان.

19-مامىر كۇنى دەنساۋلىعى ناشارلاپ، جۇرگەندە دەمى جەتپەي، ءحالى السىرەگەن، توسەگىنەن تۇرا الماعان. جەدەل جاردەم بريگاداسىمەن پروۆيزورلىق ستاتسيونارعا جەتكىزىلىپ، سىناما الىنعان ۋاقىتتا كوروناۆيرۋس تابىلدى.

وبلىستىق جۇقپالى اۋرۋلار اۋرۋحاناسىندا كەزەكشى دارىگەر قاراعاننان كەيىن دەمالىسى قيىنداعاندىقتان، بىردەن جانساقتاۋ بولىمىنە جاتقىزىلعان.

جانساقتاۋ بولىمىندە اۋىر جاعدايدا بولعان ناۋقاستىڭ 30-مامىر كۇنى جۇرەگى سوعۋىن توقتاتتى.

بۇل دەرەك كوروناۆيرۋس دەرتىنىڭ قاۋىپتى ەكەندىگىن، ەگەر دەر كەزىندە دارىگەر كومەگىنە جۇگىنگەن كەزدە ءولىمنىڭ الدىن الىپ، ناۋقاستىڭ جازىلىپ كەتۋىنە مۇمكىندىگى بولعاندىعىن كورسەتەدى.

ەسكە سالا كەتەيىك، بۇدان بۇرىن باتىس قازاقستاندا 1200 دەن استام ادامنىڭ ءۇي كارانتينىندە جاتقانىن جازعان بولاتىنبىز.