+7 (701) 759 90 19
26 °С : نۇر-سۇلتان
28 °С : الماتى
USD 412.55 EUR 468.66
RUB 5.79 CNY 58.80
جاڭالىقتار

افروامەريكالىقتىڭ ءولىمى: ترامپ ميننەاپوليسكە ۇلتتىق گۆارديا اسكەرىن جىبەرۋگە ءماجبۇر بولدى

29 مامىر 21:03
:ءبولىسۋ
افروامەريكالىقتىڭ ءولىمى: ترامپ ميننەاپوليسكە ۇلتتىق گۆارديا اسكەرىن جىبەرۋگە ءماجبۇر بولدى

نۇر-سۇلتان. قازاقپارات - ميننەسوتا شتاتىنداعى ەرەۋىلدەر باسىلار ەمەس، دەپ حابارلايدى «حابار 24». ءتىپتى ميننەاپوليس قالاسىنىڭ مەرى ايماقتا توتەنشە جاعداي جاريالادى.

سەبەبى ەرەۋىلگە شىققان نارازى جۇرت ءتارتىپ ساقشىلارىمەن قاقتىعىسىپ، پوليتسيا ۋچاسكەسىن ورتەپ جىبەردى. دۇكەندەر مەن كاسىپورىنداردى قيراتا باستاعان.

اشىنعان جۇرت جولىنداعىنىڭ ءبارىن قيراتىپ جاتىر. كەشە كەشكىسىن پوليتسيا ۋچاسكەسىن قورشاۋعا الدى. ءتارتىپ ساقشىلارى عيماراتتىڭ شاتىرىنا شىعىپ، ەرەۋىلشىلەردى كوز جاساۋراتاتىن گازبەن تارقاتپاق بولدى. ءبىراق نارازى جۇرت قايتار ەمەس. ىزىنشە، پوليتسيا قىزمەتكەرلەرى تىكۇشاقپەن ەۆاكۋاتسيالاندى. ەرەۋىلشىلەر عيماراتتى باسىپ الىپ، تۇگىن قالدىرماي ورتەپ جىبەردى.

دجەيكوب فرەي، ميننەاپوليس قالاسىنىڭ مەرى:

- تۇندە بولعان وقيعا - ەموتسيونالدىق سوققى. اشۋ مەن ىزاعا بۋلىققان جۇرت شىداي الماي ەرەۋىلگە شىقتى. بۇل وقيعا سونىڭ ايقىن دالەلى. حالىقتى سابىرعا شاقىرامىن. ءبىزدىڭ قالامىز ءبىر جاعادان باس، ءبىر جەڭنەن قول شىعارىپ بىرىگۋى كەرەك. ادىلدىكتى قاقتىعىسپەن ورناتا المايمىز. دۇكەندەر ازىق- تۇلىك الۋ ءۇشىن، بانكتەر اقشا اينالىمى ءۇشىن، ءدارىحانا ناۋقاستاردى ەمدەۋ ءۇشىن قاجەت. اشۋعا بەرىلىپ، الەۋمەتتىك نىسانعا زالال كەلتىرمەيىك.


ىزىنشە، قالا مەرى ايماقتا 72 ساعاتقا توتەنشە جاعداي جاريالادى. قاۋلى مەريا سايتىندا پايدا بولدى. حالىق قالاۋلىسى نارازى جۇرتتى سابىرعا شاقىرعانىمەن، جاعداي وڭالمادى. بۇعان كوڭىلى تولماعان اق ءۇي باسشىسى تۆيتتەردە مالىمدەمە جاساپ، ميننەاپوليسكە ۇلتتىق گۆارديا اسكەرىن جىبەردى.

جاپپاي ەرەۋىلگە 25 - مامىرداعى وقيعا سەبەپ بولدى. حالىقتىڭ شىدامى وسى ولىمننەن كەيىن تاۋسىلدى. بۇل كۇنى ءتارتىپ ساقشىلارى جالعان چەكپەن ەسەپ ايىرىسقان كۇدىكتى دجوردج فلويدتى تۇتقىنداۋعا كەلەدى. افروامەريكالىق ەر ازاماتتىڭ قولىنا كىسەن سالۋ ءۇشىن پوليتسيا ونى اسفالتقا قۇلاتىپ، موينىن تىزەسىمەن 8 مينۋت تۇنشىقتىرعان. بۇل پروتسەسس كۋاگەرلەردىڭ ۆيدەوسىنا ءتۇسىپ قالىپتى. وندا فلويد پوليتسيا قىزمەتكەرىنە تۇنشىققانىن ايتىپ، كومەك سۇرايدى. ولتىرمەۋىن وتىنەدى. ىزىنشە، ونىڭ جاعدايى ناشارلاعان. افروامەريكالىق كۇدىكتى اۋرۋحاناعا جەتپەي، كوز جۇمدى.

چارلز ماكميلليان، كۋاگەر:

- ءۇش- ءتورت وفيتسەر ونى بىردەن جەرگە جاتقىزدى. بىرەۋى مويىنىنا تىزەسىن قويىپ، تۇنشىقتىردى. ول ماعان اۋا جەتپەيدى، تۇنشىقتىم دەپ ايقايلادى. ءبىز كۋاگەرلەر دە ءتارتىپ ساقشىلارىنا ەسكەرتۋ جاسادىق. اراشا بولعىمىز كەلدى. ولار تىڭدامادى. كوپ ۇزاماي، ول اناسىنىڭ اتىن ايتىپ، قايتىس بولدى.

كۋاگەرلەر تۇسىرگەن ۆيدەو الەۋمەتتىك جەلىگە تاراپ كەتتى. ىزىنشە، جۇزدەگەن ادام ەرەۋىلگە شىقتى. ءتۇس قايتا ولاردىڭ سانى مىڭنان استى. تەك، ميننەاپوليس ەمەس، نيۋ- يورك، لوس- اندجەلەس، مەمفيس، دەنۆەر قالالارىندا دا حالىق نارازىلىق اكسياسىن باستاعان. اشىنعان جۇرت افروامەريكالىقتىڭ قۇقىعى تاپتالدى دەپ ناليدى.

بليتس:

- امەريكادا افروامەريكالىقتاردىڭ قۇقىعى قورعالمايدى. شارشادىق. قاجىدىق. قانشا جىل بولدى، ادام قۇرلى كورمەيدى. وزگەرىستەر ەنگىزەتىن ۋاقىت كەلدى.

- بىزگە ادىلدىك كەرەك. وسىنداي جاۋىزدىق ارەكەتكە بارعان وفيتسەرلەر جازاعا تارتىلۋى ءتيىس. اق ءناسىلدى ءتارتىپ ساقشىلارى افروامەريكالىقتارعا قىسىم كورسەتىپ كەلەدى. قانشاما ادام جازىقسىز اجال قۇشتى، تەمىر تورعا قامالدى.

بۇل ىسكە قاتىستى ءتورت پوليتسيا قىزمەتكەرى جۇمىستان قۋىلدى. وفيتسەرلەردىڭ ارنايى كەۋدەسىندە بولعان بەينەجازبا تەرگەۋ جۇمىستارى ءۇشىن تاركىلەندى. تەرگەۋدى پرەزيدەنت پەن باس پروكۋرور ءوز باقىلاۋىنا الدى. نارازى جۇرت ءتارتىپ ساقشىلارىن جۇمىستان قۋىپ قانا قويماي، جازالاۋ كەرەك دەيدى. فلويد وتباسىنىڭ ادۆوكاتى دا وسىنداي پىكىردە.

بەندجامين كرامپ، فلويد وتباسىنىڭ قورعاۋشىسى:

- فلويد كۇدىكتى بولا تۇرا، ءتارتىپ ساقشىلارىنا قارسىلاسپاعان. كەرىسىنشە قولىنا كىسەن سالۋعا كونىپ تۇر. دەسە دە، پوليتسيا اسا قاتىگەزدىك تانىتادى. ولتىرمەۋىن وتىنگەن ادامدى توعىز مينۋت تۇنشىقتىرادى. ءبارى ۆيدەوعا جازىلعان. سوندىقتان پوليتسيا قىزمەتكەرلەرىن ادەيى ءولتىرۋ فاكتىسىمەن جازالاۋ كەرەك.

امەريكانىڭ كەيبىر شتاتتارىندا بۇل ماسەلە بۇرىننان وزەكتى. ەندى وقيعا جەلىسى قالاي ءوربيتىنى بەلگىسىز. ەرەۋىلگە شىققان جۇرتتىڭ شىدامى تاۋسىلعان. ال بيلىك وكىلدەرى ءوڭىردى تۇراقتاندىرۋ ءۇشىن اسكەرگە جۇگىنىپ وتىر. ەڭ سوراقىسى، كوتەرىلىستى بۇزاقىلار ءوز پايداسىنا جاراتىپ، دۇكەن مەن بانكتەردى توناۋعا كىرىسكەن.



#الةم  
:ءبولىسۋ
پئكئر قالدئرؤ
+7
جئبةرؤ
ونلاين قىزمەتكەرلەر
رەداكتور
باقىتجول كاكەش
باقىتجول كاكەش
954-049
رەداكتور
ريزابەك نۇسىپبەك
ريزابەك نۇسىپبەك
954-049
رەداكتور
بەيسەن سۇلتان
بەيسەن سۇلتان
954-049

مۇراعات