وڭۇستىك كورەيادا كوروناۆيرۋس ىندەتى قايتا ءورشىدى
بۇل - سوڭعى ەكى ايداعى رەكوردتتىق كورسەتكىش. جەرگىلىكتى بيلىك بۇگىن ۆيرۋس جۇقتىرعان ناۋقاستاردىڭ سانى تاعى 58 ادامعا ارتقانىن حابارلادى. وسىلايشا ەل اۋماعى بويىنشا كوروناۆيرۋس دەرتىنە شالدىققان تۇرعىنداردىڭ قاتارى 11 مىڭ 402 گە جەتتى. 269 ادام كوز جۇمدى.
ۆلاديسلاۆ تسوي، ءتىلشى:
- ۆيرۋستىڭ ەندىگى وشاعى سەۋلدەن 20 شاقىرىم جەردە ورنالاسقان پۋچون قالاسىنداعى كۋپانگ لوگيستيكالىق كومپانياسى. مۇندا 80 نەن استام قىزمەتكەرگە COVID-19 دياگنوزى قويىلدى. كومپانيادا بارلىعى 1600 ادام جۇمىس ىستەيدى.
ايتا كەتەيىك، كۋپانگ تۇرعىندارىنىڭ باسىم كوپشىلىگى تۇرمىسقا قاجەتتى تاۋاردى ونلاين تاپسىرىس ارقىلى ساتىپ الادى. ەپيدەميولوگيالىق جاعدايدى تەرگەۋ كەزىندە ءمالىم بولدى، ايماقتا ۆيرۋس جۇقتىرعان ءبىرىنشى ناۋقاس تۋعان كۇن كەشىنە بارعان. ال سول وتىرىسقا ىندەت تاسىمالداۋشى ياعني، ۆيرۋس جۇقتىرعان كىسىمەن قارىم- قاتىناس ۇستاعان ءمۇعالىم دە كەلگەن ەكەن. دارىگەرلەر لوگيستيكالىق ورتالىقتا سانيتارلىق تالاپتاردىڭ ساقتالماعانىن ايتادى. مىسالى، اسحانادا كومپانيا قىزمەتكەرلەرىنىڭ اراقاشىقتىعى جايىندا اڭگىمە ايتۋعا كەلمەيدى. ۆيرۋس ءتاسىمالداۋى مۇمكىن دەگەن 4 مىڭداي ادام تەستىدەن ءوتتى. ونىڭ ناتيجەسى بويىنشا 3 مىڭعا جۋىق قىزمەتكەردىڭ ۆيرۋس جۇقتىرماعانى انىقتالدى. قالعاندارىنىڭ ناتيجەسى ءالى شىققان جوق.
كيم گان ريپ، وڭتۇستىك كورەيانىڭ دەنساۋلىق ساقتاۋ مەن الەۋمەتتىك قامسىزداندىرۋ ءمينيسترىنىڭ ورىنباسارى:
- كۋرەر قىزمەتىنىڭ جۇمىسى مەن قويمالاردى ءجىتى تەكسەرەتىن بولامىز. بارلىق قىزمەتكەرلەردىڭ ءتىزىمىن جاساپ جاتىرمىز. ولاردىڭ ىشىندە جارتى كۇن ىستەيتىندەر دە بار. قازىر اۋرۋ بەلگىلەرى بايقالعان قىزمەتكەرلەردىڭ جۇمىسقا شىقپاۋلارىن سۇرادىق. جاقىندا لوگيستيكالىق كومپانياعا قاتىستى كارانتين تالاپتارىن كۇشەيتەتىن بولامىز. ۆيرۋستىڭ تاعى ءبىر وشاعى - سەۋلدەگى كولل ورتالىعى. وندا 7 ادام كوروناۆيرۋس جۇقتىرعان. قازىر بۇل كومپانيا جۇمىسىن ۋاقىتشا توقتاتتى. ەستەرىڭىزگە سالايىن، وڭتۇستىك كورەيادا مامىردىڭ 6 سى كۇنى كارانتين شەكتەۋلەرى جەڭىلدەتىلگەن ەدى. وعان سايكەس ايماقتاعى كوپتەگەن كومپانيا جۇمىسىن جانداندىرىپ، قوعامدىق ءىس- شارالار قايتا وتكىزىلە باستادى. جۋىردا كورەيادا مەكتەپتەر دە اشىلدى. الايدا پۋچون مەن ينچون قالالارىندا ساباقتار باستالمايتىن بولدى. سونىمەن قاتار سەۋل مەن ك نەگيدو پروۆينتسياسىندا كارانتيننىڭ شەكتەۋ شارالارى قاتاڭداتىلدى. كوپتەگەن جۇمىس ورنى قىزمەتكەرلەرىن قايتا قاشىقتان جۇمىس ىستەۋگە جىبەرىپ جاتىر. ال ۆيرۋستىڭ قايتا ورشۋىنە وراي ماماندار دەرتتەن ەمدەلىپ شىققانداردان كومەك سۇراپ وتىر.
كۆون چجۋن ۋك، اۋرۋدى باقىلاۋ جانە الدىن الۋ ورتالىعى باسشىسىنىڭ ورىنباسارى:
- ناۋقاستاردى ەمدەۋ ءۇشىن بۇرىن وسى اۋرۋمەن اۋىرىپ ەمدەلىپ شىققانداردىڭ قان پلازماسىن قولدانامىز. ياعني، ەمدەلگەن ادامداردىڭ انتيدەنەلەرى مەن يممۋنوگلابۋليندەرىن پايدالانامىز. سوندىقتان بىزگە كومەكتەسۋلەرىڭىزدى سۇرايمىز. قانىن تاپسىرامىن دەگەندەر كول ورتالىعىنا حابارلاسىڭىزدار. قازىردىڭ وزىندە 9 تۇرعىن قان تاپسىرۋعا كەلىسىمىن بەرىپ وتىر. دارىگەرلەر تۇرعىنداردى اراقاشىقتىقتى ساقتاپ، ماسكا تاعىپ جانە سانيتايزەرلەردى قولدانۋعا شاقىرادى. ءتىپتى، كيىمدى دە زارارسىزداندىرۋ كەرەك دەپ وتىر. ويتكەنى ىندەت وشاعىنا اينالعان لوگيستيكالىق ورتالىقتا جۇمىس ىستەيىندەردىڭ كيىمدەرى مەن اياقكيىمدەرىندە دە ۆيرۋس تابىلدى. ال وقشاۋلانۋ ءتارتىبىن بۇزعانداردىڭ قولىنا ارنايى بىلەزىك تاعىلادى. سول ارقىلى ادامنىڭ ءار قوزعالىسى باقىلانىپ وتىرادى. بۇگىندە وڭتۇستىك كورەيادا 74 تۇرعىنعا وسىنداي بىلەزىك تاعىلدى.
www.24.kz