شىمكەنتتە كوروناۆيرۋس جۇقتىرعان جۇكتى ايەل باسىنان وتكەن جاعدايدى بايانداپ بەردى
ەكى بالانىڭ اناسى اۋرۋدىڭ بار ەكەنىنە سەنبەيتىندەردى سالعىرتتىق تانىتپاۋعا شاقىردى، دەپ حابارلايدى قازاقپارات ءتىلشىسى.
قاۋىپتى دەرتكە شالدىققان جۇكتى ايەل وتباسىمەن بىرگە وقشاۋلانىپ، اۋرۋحانادا ەكى اپتادان اسا ەم قابىلداعان. كەيىن تاعى 15 كۇندەي ءۇي كارانتينىنە جاتقىزىلعان. ءۇشىنشى پەرزەنتىنە جۇكتى كەلىنشەك ءبىر اي بويى قاۋىپتى ىندەتپەن الىسقانىن ايتادى. 36 جاستاعى يرينا بۇگىندە اي كۇنى جاقىنداپ قالعان. وعان ينفەكتسيا كۇيەۋىنەن جۇققان. سونىمەن قاتار ەكى بالاسىنان دا ۆيرۋس انىقتالىپ، بۇكىل وتباسى مۇشەسى وقشاۋلانعان. ەمدىك شارالارىن جۇرگىزۋ ءۇشىن دارىگەرلەر ءبىر جانۇياداعى ناۋقاستاردى پروۆيزور ستانتسيونارىنا جاتقىزعان.
«اۋرۋحاناعا تۇسكەندە كىشكەنتاي بالالارىمىز ارنايى كاستيۋمدەگى دارىگەرلەردى كورگەندە قورقىپ كەتتى. وسى كەزدە ءبىز بالارىمىزعا قاراپ، اكەسى ەكەۋىمىز مىقتى بولۋعا تىرىستىق. ۋاقىت وتە كەلە قاۋىپتى دەرتتى جەڭىپ شىقتىق. مەن جۇكتى بولعاندىقتان، دارىگەرلەر مەنىڭ جانە ىشتەگى شارانامنىڭ جاعدايىن ەرەكشە باقىلاپ وتىردى. ەڭ باستىسى، ينفەكتسيا ىشىمدەگى بالاعا اسەر ەتپەپتى»، - دەيدى يرينا.
COVID-19-دان جازىلىپ شىققان كەلىنشەك قازىر بالالارىنا بارىنشا كوڭىل ءبولىپ ءجۇر. ءبىر ءسات بولسىن، بالا- شاعاسىن قاراۋسىز قالدىرعىسى كەلمەيدى. وتباسى قاۋىپتى ىندەتتەن تولىعىمەن ايىعىپ شىققانىمەن، كەلىنشەكتىڭ ۇرەيى ءالى باسىلماعان.
«ءبىز كوروناۆيرۋستان جازىلىپ شىقتىق. ءبىراق اۋرۋحاناداعى كارانتيندىك جاعدايدى ويلاسام، ۇرەيلەنگەن كەزىم بىردەن ەسىمە تۇسەدى. كىشكەنتاي بالالارمەن جان جاعى جابىق ءتورت قابىرعانىڭ ىشىندە جاتۋ قيىن بولدى. بۇل جاعدايدى باستان وتكىزبەي، ەشكىم تۇسىنە المايدى. اۋرۋدىڭ بار ەكەنىنە سەنبەي جۇرگەن ازاماتتارعا ايتارىم، سالعىرتتىق تانىتپاڭىزدار. ءوزىڭىزدى ويلاماساڭىز دا، باسقالارعا زيانىڭىز تيمەسىن»، - دەيدى يرينا.
قالا بويىنشا ول سياقتى جۇكتى ايەلدەردىڭ اراسىندا ىندەت راستالعان 15 جاعداي تىركەلگەن. ەلىمىزدە توتەنشە جاعداي رەجيمى الىنعانىمەن، شىمكەنتتە ينفەكتسياعا شالدىققانداردىڭ سانى كۇن ساناپ ارتىپ بارادى. ماماندار مۇنىڭ سەبەبىن جوسپارلى تەسكەرۋمەن بايلانىستىرادى. ايتا كەتەيىك، بۇگىنگە دەيىن شىمكەنتتە ۆيرۋستى ينفەكتسيانى جۇقتىرۋدىڭ 730 جاعدايى تىركەلگەن. دەرتكە شالدىققانداردىڭ باسىم بولىگى 50 جاسقا دەيىنگى ازاماتتار. ال COVID-19 دياگنوزىن جەڭىپ شىققاندار سانى 241 ادامعا جەتتى.