10:03, 29 - مامىر 2020 | GMT +6
الەمدەگى ەڭ قارت ەر ادام كوز جۇمدى
نۇر- سۇلتان. قازاقپارات - بريتانيادا الەمدەگى ەڭ قارت ەر ادام روبەرت ۋەيتون قايتىس بولدى. ول ناۋرىز ايىندا ءوزىنىڭ 112-تۋعان كۇنىن تويلاعان ەدى، دەپ حابارلايدى قازاقپارات BBC اقپارات اگەنتتىگىنە سىلتەمە جاساپ.
اقپان ايىندا ۋەيتون 112 جاستاعى جاپون ازاماتى تيتەتسۋ ۆاتانابە قايتىس بولعاننان كەيىن الەمدە ەڭ ۇزاق ءومىر ءسۇرۋشى ەر ادام دەپ تانىلعان ەدى. روبەرت ۋەيتون 1908 - جىلى 29 ناۋرىزدا شىعىس يوركشيردەگى حالل قالاسىندا دۇنيەگە كەلگەن. بريتاندىق ءومىر بويى ينجەنەر بولىپ جۇمىس ىستەگەن جانە ۇزاق جىلدار تايۆان، جاپونيا جانە كانادادا ءىس ساپارلاردا بولعان. ول بي- بي- سيگە بەرگەن سۇحباتىندا ۇزاق ءومىر ءسۇرۋدىڭ قۇپياسى - «ولمەۋگە تىرىسۋ» دەپ ايتقان.
روبەرت ۋەيتون بريتانيانىڭ ەڭ قارت ايەلى پۋلالىق دجوان حوككاردپەن ءبىر كۇندە تۋعان. ونىڭ ارتىندا ەكى بالاسى، 10 نەمەرەسى جانە 25 شوبەرەسى قالدى. ايتا كەتسەك، الەمدەگى ەڭ قارت ايەل جاپوندىق كەين تاناكا، ول 117 جاستا.