حالىقارالىق باعىتتارعا بيلەت الۋ رەيستىڭ ۇشۋىنا كەپىلدىك بەرمەيدى - ازاماتتىق اۆياتسيا كوميتەتى
«اۋە كومپانيالارى مەن دەلدالداردىڭ سايتتارىندا حالىقارالىق باعىتتارعا بيلەت ساتىلىپ جاتقانىنا بايلانىستى، بيلەتتەر بىرنەشە اي بۇرىن ساتىلاتىن الەمدىك تاجىريبەنى ەسكەرە وتىرىپ، حالىقارالىق رەيستەرگە بيلەت ساتۋدىڭ رەتتەلمەيتىنىن جانە شەكتەلمەيتىنىن حابارلايمىز. وسىعان بايلانىستى حالىقارالىق باعىتتار بويىنشا قازاقستاننان ۇشاتىن نەمەسە ەلگە كەلەتىن اۋە بيلەتتەرىن ساتۋ جانە ساتىپ الۋ حالىقارالىق رەيستەردىڭ قايتا باستالعانىن بىلدىرمەيدى جانە جولاۋشىعا تاڭداپ الىنعان باعىت پەن رەيس كۇنى ۇشۋعا كەپىلدىك بەرمەيدى»، - دەلىنگەن مالىمدەمەدە.
كوميتەتتىڭ حابارلاۋىنشا، حالىقارالىق باعىتتار بويىنشا تۇراقتى جولاۋشىلار رەيستەرىن قايتا باستاۋ ەپيدەميولوگيالىق جاعدايعا، قازاقستان مەن شەت ەلدەردىڭ مەملەكەتتىك شەكاراسىنان ءوتۋ شەكتەۋلەرىنە جانە مەملەكەتتەردىڭ ۆيزالىق تالاپتارىنا تىكەلەي بايلانىستى. حالىقارالىق اۋە قاتىناستارىن قايتا باستاۋ تۋرالى شەشىمدى ق ر اۋماعىندا كوروناۆيرۋستىق ينفەكسيانىڭ پايدا بولۋى مەن تارالۋىنا جول بەرمەۋ جونىندەگى ۆەدومستۆوارالىق كوميسسيا ق ر دەنساۋلىق ساقتاۋ مينيسترلىگىنىڭ ۇسىنىمدارىن ەسكەرە وتىرىپ قابىلدايدى.
اۆتور: ايجان سەرىكجان قىزى