پويىز قوزعالىسى قالپىنا كەلتىرىلەدى: جولاۋشىلار نەنى ءبىلۋى كەرەك
قازاقپارات اگەنتتىگى ۆوكزالدار مەن پويىزداردىڭ قاۋىپسىزدىك شارالارىنا شولۋ ۇسىنادى.
ءار ۆاگوندا انتيسەپتيك پەن ماسكالار بولادى
«جولاۋشىلار تاسىمالى» ا ق جىلجىمالى قۇرامىن ازىرلەدى. ۆاگون ىشىندەگى تەمپەراتۋرالىق رەجيم دۇرىس بولۋى ءۇشىن بارلىق جەلدەتكىش پەن اۋا باپتاۋ جۇيەلەرى تەكسەرىلگەن. سونداي- اق، ۆاگوندار كۇندەلىكتى دەزينفەكسيادان وتەدى. جولسەرىكتەرگە جولاۋشىلاردىڭ قاۋىپسىز ءجۇرىپ- تۇرۋىن قامتاماسىز ەتۋ ءۇشىن ەرەجەلەر مەن نۇسقاۋلىقتار جاسالدى»، - «جولاۋشىلار تاسىمالى» ا ق «سولتۇستىك» تاسىمالى بويىنشا وڭىرلىك فيليال ديرەكتورى گۇلنار قونىسبايەۆا.
1 - ماۋسىمنان باستاپ، جۇمىسقا كەلگەن قىزمەتكەرلەر كۇن سايىن مەديتسينالىق تەكسەرۋدەن وتەدى. سودان كەيىن سانيتارلىق نورمالاردى ساقتاۋ جونىندە جەكە جانە ۇجىمدىق نۇسقاۋلىق وتەدى. بۇل بارلىق سانيتارلىق نورمالارعا سايكەس كەلۋگە جانە ۆاگونداردى دايىنداۋعا ارنالعان. بۇگىندە بارلىق قىزمەتكەرلەر جەكە قورعانىس قۇرالدارىمەن قامتاماسىز ەتىلگەن. ءار ۆاگونعا انتيسەپتيك قۇرىلعىلارى قويىلىپ، جولسەرىكتە ماسكالار، قولعاپتار، انتيسەپتيكالىق زاتتار بولادى.
جولاۋشىلارعا جادىناما «كارانتين شارالارى جەڭىلدەگەنشە جولاۋشىلارعا دا ءبىرقاتار تالاپ قويىلادى. ساپارعا شىعاردا جولاۋشى دەنە قىزۋىن تەكسەرىپ الۋى كەرەك. ۆوكزال اۋماعىنا تەك ماسكامەن كىرگىزىلەدى. ءار جولاۋشى جەكە قورعانىس قۇرالدارىمەن، انتيسەپتيكپەن ءجۇرۋى ءتيىس. جولاۋشىنىڭ ماسكانى قانشالىقتى ءجيى اۋىستىراتىنى تەكسەرىلمەيدى، بارلىعى - جولاۋشىنىڭ ءوز جاۋاپكەرشىلىگىندە بولادى. جولاۋشىلارعا ءتۇسىندىرۋ جۇمىستارى جۇرگىزىلەدى، ەشكىم ۆاگوننان تۇسىرىلمەيدى»، - دەيدى گ. قونىسبايەۆا.
ۆاگوننان- ۆاگونعا ءوتۋ شەكتەۋلى بولادى. پويىزداعى مەيرامحانا دا ۋاقىتشا جۇمىس ىستەمەيدى. ۆاگون ىشىندەگى ىدىس- اياق بۇرىنعىداي بەرىلەدى. جولسەرىكتەر بارلىق جۋعىش جانە زارارسىزداندىرعىش زاتتارمەن قامتاماسىز ەتىلگەن.
«ەڭ باستىسى، ءبىز ۆاگونداعى جولاۋشىلارعا جاعداي جاساۋىمىز كەرەك. ۋاقىتىندا دەزينفەكسيالاپ، ءبىر اۋىسىمدا ۆاگوندى ەكى رەت، ىشكى بولمە مەن دارەتحانانى كەمىندە ءتورت رەت جۋۋ كەرەك. پويىز كەستەسىنە سايكەس، ايالداما قاراستىرىلعان جەرلەردە جولاۋشىلار پويىزدان ءتۇسىپ، ازىق- تۇلىك ساتىپ الا الادى. ءبارى قالىپتى رەجيمدە بولادى»، - دەدى كومپانيا وكىلى.
ۆاگون ىشىندەگى ورىنداردىڭ بارلىعىنا بيلەت ساتىلادى. جول ءجۇرۋ بيلەتتەرى ۆاگونداعى ورىن سانىنا سايكەس بولادى. ءبىرىنشى كەزەڭدە پلاسكارت جانە كۋپە ۆاگوندارى ىسكە قوسىلادى. پويىزدا سىرقات ادام تابىلسا، نە ىستەۋ كەرەك پويىز ىشىندەگى جولاۋشىدان اۋرۋ بەلگىلەرى بايقالسا، جولسەرىك ارنايى الگوريتممەن ارەكەت ەتەدى. جولسەرىك شاعىمدانعان جولاۋشىنىڭ دەنە قىزۋىن ولشەۋى كەرەك. ەگەر تەمپەراتۋرا 37 گرادۋستان جوعارى بولسا، جولسەرىك جولاۋشىنى وقشاۋلايدى.
«جولاۋشى ءوز كۋپەسىندە وقشاۋلانادى، كورشىلەس جولاۋشىلار باسقا بوس نەمەسە قىزمەتتىك كۋپەگە اۋىستىرىلادى. سونىمەن بىرگە، ناۋقاس جولاۋشى كىرەتىن دارەتحاناعا وزگەلەر كىرگىزىلمەيدى. جولسەرىك تۇتاس ۆاگون جولاۋشىلارىنىڭ ماسكالارىن اۋىستىرادى. ول ءۇشىن ۆاگونداردا رەزەرۆ بار. سودان كەيىن جولاۋشى وقيعانى پويىز باسشىسىنا باياندايدى. پويىز باسشىسى ماشينيست ارقىلى ەڭ جاقىن ستانسياعا حابار بەرىپ، سىرقاتتانعان جولاۋشىنى ءتۇسىرىپ كەتەدى. بۇل الگوريتم بارلىق قىزمەتكەرگە ءتۇسىندىرىلدى»، - دەدى گ. قونىسبايەۆا.
ۆوكزال عيماراتتارى قالاي جۇمىس ىستەيدى
سونىمەن بىرگە، «نۇر- سۇلتان-1» ۆوكزالىنىڭ باسشىسى عالىم ءابدىحانوۆ تىلشىلەرگە ۆوكزال ىشىندەگى ءتارتىپتى ءتۇسىندىردى. «باس سانيتارلىق دارىگەردىڭ 14 - مامىرداعى قاۋلىسىنا سايكەس، ۆوكزالداعى بارلىق نۇكتەلەر، وتپە جولدار قايتا پىسىقتالدى، جەلدەتكىشتەر اۋىستىرىلدى. 1 - ماۋسىمنان باستاپ جولاۋشىلاردى قابىلداۋعا دايىنبىز. ۆوكزالدا ارنايى مەديتسينالىق قىزمەتكەرلەر تاۋلىك بويى جۇمىس ىستەيدى. كاسسالار دا تاۋلىك بويى اشىق. ازىرگە، «جولاۋشىلار تاسىمالى» ا ق 6 كاسساسى جانە جەكە كومپانيالاردىڭ 6 كاسساسى جۇمىس ىستەپ تۇر. ماسكاسى جوق جولاۋشى ۆوكزال اۋماعىنا كىرگىزىلمەيدى. ول ءۇشىن ءدارىحانا جۇمىس ىستەيتىن بولادى. ال كافە- ءدامحانالار كارانتين شارالارى جەڭىلدەگەن سوڭ اشىلادى»، - دەدى ول.
جۇك تاسۋشىلار قاي ساناتقا تەگىن قىزمەت كورسەتەدى
«ۆوكزالعا تەك بيلەتى بار جولاۋشىلار عانا جىبەرىلەدى. شىعارىپ سالۋشىلار كىرگىزىلمەيدى. جولاۋشىلاردىڭ اۋىر جۇگىن ۆاگونعا دەيىن تاسىمالداۋعا ارنايى كومپانيا كومەكتەسەدى. ولار جۇكتىڭ سالماعىنا قاراي ءتۇرلى تاريفپەن قىزمەت كورسەتەدى. الايدا، بۇل جەردە زەينەتكەرلەردىڭ، قارتتاردىڭ، مۇگەدەكتىگى بار ادامدار مەن اياعى اۋىر ايەلدەردىڭ جۇگى تەگىن تاسىمالدانادى. كارانتين كەزەڭىندە ولارعا تەگىن قىزمەت كورسەتىلەدى»، - دەدى ع. ءابدىحانوۆ.
كارانتين بۇرىشتارى
1 - ماۋسىمنان باستاپ، قازاقستاننىڭ بارلىق ۆوكزالدارىندا «كارانتين بۇرىشتارى» اشىلادى. بۇل COVID-19 جۇقتىرۋ كۇدىگىنە ىلىنگەن جولاۋشىلاردى ۋاقىتشا وقشاۋلاۋعا ارنالعان جانە ارنايى قىزىل لەنتامەن قورشالعان.
«ۆوكزال كىرەبەرىسىندە ج ر ۆ ي بەلگىلەرى بايقالعان، دەنە قىزۋى 37 گرادۋستان اسقان جولاۋشىلار «كارانتين بۇرىشىنا» جىبەرىلەدى. وندا ماسكا، قولعاپ، انتيسەپتيك قۇرالدارى قويىلعان. مەديتسينالىق قىزمەتكەرلەر جەدەل جاردەم شاقىرىپ، جولاۋشىنى سوندا جىبەرەدى»، - دەدى عالىم ءابدىحانوۆ.
ەسكە سالا كەتسەك، 15- مامىردان باستاپ، جولاۋشىلار بيلەتتەرى ساتىلىپ جاتىر. جولاۋشىلار پويىزدارى 1- ماۋسىمنان جۇرە باستايدى. باستاپقى كەزدە 54 پويىز قاتىناي باستايدى:
- نۇر- سۇلتاننان - الماتى، ماڭعىستاۋ، وسكەمەن، سارى اعاش، سەمەي، ارقالىك، پاۆلودار، پەتروپاۆل/ قىزىل تۋ، ورال، جەزقازعان، قىزىلوردا؛
- الماتىدان - شىمكەنت، پاۆلودار، اقتوبە، ماڭعىستاۋ، سارىاعاش، وسكەمەن، جەزقازعان، ورال، پەتروپاۆل، قوستاناي؛
- قىزىلوردادان - سەمەي، كوكشەتاۋ، پەتروپاۆل؛
- قوستانايدان – قاراعاندى- ارقالىق؛
- قاراعاندىدان - جەزقازعان؛
- قىزىلوردادان - كوكشەتاۋ، پەتروپاۆل، - ماڭعىستاۋدان - اقتوبە باعىتتارى بويىنشا جانە قالاماڭى قاتىناستارى.
ەكىنشى كەزەڭ – 10- ماۋسىمنان باستاپ 39 پويىزدى جولعا شىعارۋ جوسپارلانىپ وتىر. ونىڭ ىشىندە: - نۇر- سۇلتاننان - الماتى، اتىراۋ، دوستىق، ورال، ايسارى، شىمكەنت؛
- الماتىدان - اتىراۋ، اقتوبە، ورال، وسكەمەن، تۇركىستان، پەتروپاۆل؛
- اتىراۋدان - ماڭعىستاۋ، اقتوبە، قۇلسارى، كاراباتان باعىتتارى بويىنشا جانە قالاماڭى باعىتتارى.
ءۇشىنشى كەزەڭدە ايماقتاردا سانيتارلىق- ەپيدەميولوگيالىق جاعدايدىڭ جاقسارۋىنا قاراي، سونىمەن بىرگە كورشى ەلدەرمەن كەلىسكەننەن كەيىن 15 پويىزدى جۇرگىزۋ كوزدەلگەن. ونىڭ ىشىندە:
- الماتىدان - تاشكەنت، ساراتوۆ، ءۇرىمشى، نوۆوسىبىر، قازان؛
- نۇر- سۇلتاننان - چەليابى؛
- قاراعاندىدان - ماسكەۋ، ومبى، تومسك؛
- اتىراۋدان - استراحان باعىتتارى بويىنشا.
اۆتور: ايجان سەرىكجان قىزى
