اكادەميك كەڭەسباي مۇسايەۆ دۇنيەدەن ءوتتى
كەڭەسباي مۇسايەۆ تۇركىستان وبلىسىنا قاراستى سوزاق اۋدانىندا تۋعان. ماسكەۋدە جارتى عاسىرعا جۋىق جەمىستى ەڭبەك ەتىپ، 320-دان استام عىلىمي ەڭبەك جاريالادى.
ونىڭ ىشىندە تۇركولوگيا ماسەلەلەرىنە ارنالعان 14 كىتاپتىڭ اۆتورى، «پاراسات» وردەنىنىڭ يەگەرى. 2004 -جىلى رەسەي فەدەراتسياسىنىڭ عىلىمعا ەڭبەگى سىڭگەن قايراتكەرى اتاعى بەرىلگەن. سونىمەن قاتار ول «تۇرىك ءتىلى» قوعامىنىڭ قۇرمەتتى مۇشەسى جانە ماسكەۋدەگى «قازاق ءتىلى» قوعامىنىڭ قۇرمەتتى ءتوراعاسى. عالىم بيىل 24 - ناۋرىزدا 89 جاسقا كەلگەن ەدى. ول نەگىزىنەن قىپشاق توبىنداعى تىلدەردىڭ لەكسيكاسىن سالىستىرمالى- تاريحي تۇرعىدا زەرتتەدى.
«قارايىم ءتىلىنىڭ گرامماتيكاسى» (1964)، «لەكسيكا تيۋركسكيح يازىكوۆ» (1975)، «لەكسيكولوگيا تيۋركسكيح يازىكوۆ» (1984)، «رازۆيتيە تەرمينولوگيي نا يازىكاح سويۋزنىح رەسپۋبليك س س س ر» (1986-1987) اتتى ەكى تومدىق ەڭبەكتىڭ جاۋاپتى رەداكتورى بولدى ءارى قازاق تەرمينولوگياسى ءبولىمىن جازدى. ماسكەۋدەگى «قازاق ءتىلى» قوعامىنىڭ ءتوراعاسى رەتىندە دە تىلگە قىزمەت ەتتى. تۇركى تانۋشىلار، ءتىلشى عالىمدار ونىڭ ەڭبەكتەرىمەن جاقسى تانىس. كەڭەسباي مۇسايەۆ مىقتى لەكسيكولوگ، بەلگىلى تۇركىتانۋشى عالىم، قازاق لينگۆيستەرىنىڭ رەسەيدەگى بەلگىلى وكىلى ەدى.