سپورت كوميتەتى ءتوراعاسىنىڭ ورىنباسارلارى ۇستالدى

نۇر-سۇلتان. قازاقپارات - سپورت جانە دەنە شىنىقتىرۋ ىستەرى كوميتەتى ءتوراعاسىنىڭ ورىنباسارلارى ۇستالدى.

بۇل تۋرالى ق ر سىبايلاس جەمقورلىققا قارسى ءىس-قيمىل اگەنتتىگى 1-دەپارتامەنتىنىڭ اسا ماڭىزدى ىستەر جونىندەگى تەرگەۋشىسى دانيار بيعايداروۆ ايتتى، دەپ حابارلايدى قازاقپارات ءتىلشىسى.

«شىعىس قازاقستان وبلىستىق سىبايلاس جەمقورلىققا قارسى قىزمەتى سوتقا دەيىنگى تەرگەۋ بارىسىندا اسا ءىرى كولەمدە بيۋدجەت قاراجاتىن جىمقىرۋ فاكتىلەرى بويىنشا ق ر قىلمىستىق-پروتسەسسۋالدىق ءىس جۇرگىزۋ كودەكسىنىڭ 128-بابىنا سايكەس، قازاقستان رەسپۋبليكاسى مادەنيەت جانە سپورت مينيسترلىگىنىڭ سپورت جانە دەنە شىنىقتىرۋ كوميتەتى ءتوراعاسىنىڭ بۇرىنعى جانە قازىرگى ورىنباسارلارىن ۇستاپ، وسكەمەن قالاسىنداعى ۋاقىتشا ۇستاۋ يزولياتورىنا قامادى»، - دەدى ول اگەنتتىك الاڭىندا وتكەن ونلاين بريفينگ بارىسىندا.

ونىڭ اتاپ وتۋىنشە، ۇستالعانداردىڭ بىرەۋىنە قاتىستى سوت 2 اي مەرزىمگە «قاماۋعا الۋ» تۇرىندەگى بۇلتارتپاۋ شاراسىن سانكسيالادى.

«ولار ريددەر قالاسىنداعى «رەسپۋبليكالىق مامانداندىرىلعان وليمپيادالىق رەزەرۆتىك مەكتەپ- ينتەرناتى» ر م م-نىڭ 300 ورىنعا ارنالاعان وقۋ كورپۋسى» قۇرىلىس نىسانىن سالۋ كەزىندە ءىس جۇزىندە ورىندالماعان جۇمىس ءۇشىن مەردىگەردىڭ شوتىنا 380,8 ميلليون تەڭگە سوماسىندا بيۋدجەت قاراجاتىن اۋدارۋ ارقىلى جىمقىردى دەگەن كۇدىككە ءىلىندى»، - دەدى دانيار بيعايداروۆ.

قازىرگى ۋاقىتتا اتالعان فاكتىلەر بويىنشا سوتقا دەيىنگى تەرگەۋ جۇرگىزىلۋدە، تەرگەۋ مۇددەلەرى ءۇشىن باسقا اقپارات جاريا ەتىلمەيدى. كۇدىكتىلەرگە قاتىستى تۇپكىلىكتى شەشىمدى ولاردىڭ كىناسىنىڭ دارەجەسىن انىقتاي وتىرىپ، سوت شەشەدى.

اۆتور: مارلان جيەمباي