پارلامەنت سەناتى پارلامەنتتىك وپپوزيتسياعا قاتىستى زاڭدى قابىلدادى
زاڭ جوباسى قازاقستان رەسپۋبليكاسى پرەزيدەنتى قاسىم- جومارت توقايەۆتىڭ بىلتىر 20 - جەلتوقساندا ۇلتتىق قوعامدىق سەنىم كەڭەسىنىڭ وتىرىسىندا پارلامەنتتىك وپپوزيتسيا ينستيتۋتىن زاڭنامالىق بەكىتۋ تۋرالى تاپسىرماسىن ورىنداۋ ماقساتىندا دايىندالدى. «ول ءۇشىن «اق جول» دەموكراتيالىق پارتياسى الدىن الا (2013 -جىلى) ازىرلەگەن «پارلامەنتتىك وپپوزيتسيا تۋرالى» زاڭ جوباسىن مەملەكەت باسشىسىنىڭ تاپسىرماسىنا جانە دە قولدانىستاعى زاڭنامالىق تالاپتارعا سايكەس جاڭارتتىق. جۇمىس بارىسىندا ءبىز دامىعان مەملەكەتتەردىڭ، ارينە - ەۋروپا تاجىريبەسىن پايدالاندىق. ەڭ الدىمەن - «قۇقىق ارقىلى دەموكراتياعا دامۋ» اتتى ەۋروپا كوميسسياسىنىڭ («ۆەنەتسيا كوميسسياسى» دەپ اتالاتىن) ، «دەموكراتيالىق پارلامەنتتەردەگى وپپوزيتسيانىڭ ءرولى تۋرالى» بايانداماسىن قولداندىق» ، - دەپ توقتالدى ءماجىلىس دەپۋتاتى ازات پەرۋاشيەۆ.
ونىڭ سوزىنە قاراعاندا، زاڭ جوباسىنىڭ ەڭ العاشقى نوۆەللاسى - بۇعان دەيىن وتاندىق قۇقىقتىق كەڭىستىكتە بولماعان «وپپوزيتسيا» ۇعىمىن ەنگىزۋى مەن زاڭداستىرۋى.
«ۆەنەتسيا كوميسسياسى بايانداماسىنىڭ 11- تارماعىندا «پارلامەنتتىك وپپوزيتسيا دەگەن - پارلامەنتكە ەنگەن، ءبىراق ۇكىمەتتىڭ مۇشەلەرى جوق ساياسي پارتيالاردان تۇرادى» دەگەن انىقتاما بەرىلگەن. الايدا بىزدەر ونى قازاقستاننىڭ تىرشىلىگىنە جەتكىلىكتى ەمەس دەپ تاپتىق. سول ءۇشىن، پارلامەنتتەگى وپپوزيتسيانى بيلىككە شىنىمەن سىنشىل بولىپ، بالاما كوزقاراس ۇسىنىپ، قوعام تالقىلايتىن، قوعامدى الانداتاتىن ماسەلەلەردى كوتەرۋگە مىندەتتى بولۋى كەرەك دەگەن تالابىمەن تولىقتىرۋدى ءجون كوردىك. سوندىقتان، ززڭ جوباسىندا «پارلامەنت وپپوزيتسياسىنىڭ» انىقتاماسىندا، بۇل پارتيالار، ادەتتە، بيلىك پارتياسىنان بولەك، وزگەشە ساياسات جۇرگىزۋگە مىندەتتى دەگەن تەزيس ەنگىزىلگەن. ياعني، ءبىز «وپپوزيتسيامىن» دەۋشىلەردى پارلامەنتتە ءۇنسىز جۇرمەي، بەلسەندى جۇمىس جۇرگىزۋگە، قوعام ءۇشىن شىن اتسالىسىپ، ماڭىزدى پروبلەمالاردى كوتەرۋگە، بيلىكتىڭ ساياساتىنا جاڭا كوزقاراسى بولىپ، بولەك ۇسىنىستاردى بەرۋگە ارنايى يتەرمەلەپ وتىرمىز. وسىنداي پارتيالارعا، «پارلامەنتتىك وپپوزيتسيا» اتاعىمەن شەكتەلمەي، ءبىز سول ۇعىمىن مارتەبەسى مەن قۇقىقتىق كەپىلدىكتەرىمەن تولىقتىرۋدى ۇسىنىپ وتىرمىز»، - دەدى پەرۋاشيەۆ.
مىسالى، وپپوزيتسيا ءۇشىن ءبىرقاتار قۇقىقتىق ارتىقشىلىق قاراستىرىلعان: ءاربىر سەسسيا كەزىندە پارلامەنتتىك تىڭداۋ مەن ۇكىمەت ساعاتتارىن (مينيسترلەردىڭ ەسەبىن تىڭداۋ) بەكىتۋ قۇقى، ۇكىمەتتىڭ زاڭ جوباسىمەن (وپپوزيتسيا كەلىسپەيتىن) قاتار بالاما (التەرناتيۆتى) زاڭ جوباسىن ۇسىنۋ؛ پارلامەنتتىڭ كەز- كەلگەن ءىس- شاراسىندا، ءماجىلىس پەن سەناتتىڭ بىرلەسكەن وتىرىسىندا ءسوز سويلەۋگە كەپىلدىك بەرىلەدى.
«باياندامامنىڭ باسىندا ايتقانىمداي، قۇجاتتى جاڭارتقانىمىزدان كەيىن، ول تاعى دا جەرگىلىكتى، ۇلتتىق جانە دە حالىقارالىق دەڭگەيدە تالقىلاۋدان وتكەن. مىسالى، بيىلعى قاڭتار ايىنىڭ باسىندا دەپۋتاتتىق ساپارلار بارىسىندا ايماقتارداعى سايلاۋشىلاردىڭ، عالىمداردىڭ جانە ساياسي قوعام وكىلدەرىنىڭ قاتىسۋىمەن تالقىلاندى. زاڭ جوباسى جاڭا پارلامەنتتىك داستۇرلەردى، بيلىك پەن وركەنيەتتى وپپوزيتسيا ءوزارا جاڭا دەڭگەيىن جانە جاڭا ساياسي مادەنيەتتى قالىپتاستىرۋعا قىزمەت ەتەتىنىنە سەنىمدىمىن. سىزدەر، سەنات دەپۋتاتتارى زاڭ جوباسىن قولداساڭىزدار، زاڭ 2021 -جىلدان باستاپ كۇشىنە ەنەدى»، - دەدى ازات پەرۋاشيەۆ.
بۇدان بۇرىن حابارلانعانداي، اتالعان زاڭ جوبالارى بيىل ناۋرىز ايىندا پارلامەنت ماجىلىسىندە ماقۇلداندى. ىلەسپە زاڭ جوباسىنا سايكەس، پارلامەنتتىك وپپوزيتسياعا ءوز دەپۋتاتتارىنىڭ اراسىنان ق ر پارلامەنتى ءماجىلىسى تۇراقتى كوميتەتتەرىنىڭ ءتوراعالارى لاۋازىمىنا كانديداتۋرا ۇسىنۋ قۇقىعى بەرىلەدى. دەپۋتات ازات پەرۋاشيەۆتىڭ ايتۋىنشا، تۇراقتى كوميتەتتەردىڭ ءبىرىنىڭ ءتوراعاسى پارلامەنتتىك وپپوزيتسيا دەپۋتاتتارىنىڭ اراسىنان سايلاناتىنى تۋرالى ەرەجە ەسكەرىلگەن. بۇل تۇزەتۋلەرگە سايكەس، پارلامەنتتىك وپپوزيتسيا پارلامەنت ءماجىلىسى تۇراقتى كوميتەتتەرىنىڭ حاتشىلارى لاۋازىمىنا كانديداتۋرا ۇسىنۋعا دا قۇقىلى بولادى. بۇل رەتتە، ەكى تۇراقتى كوميتەتتىڭ حاتشىلارى پارلامەنتتىك وپپوزيتسيا ۇسىنعان دەپۋتاتتار اراسىنان سايلانادى.