ق ر ۇكىمەتى سمارتفونعا قانداي قۇجاتتاردى ەنگىزىپ جاتىر

None
None
نۇر- سۇلتان. قازاقپارات – ق ر سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى اسقار جۇماعاليەۆ سمارتفوندا بولاتىن قۇجاتتار ءتىزىمىن جاريا ەتتى، دەپ حابارلايدى قازاقپارات ءتىلشىسى.

«وتكەن اپتادا eGov mobile قوسىمشاسىندا بولاتىن جانە ءتيىستى زاڭ قابىلدانعان سوڭ قاعاز قۇجاتتاردىڭ زاڭدى بالاماسى رەتىندە قولدانىلاتىن سيفرلىق قۇجاتتار تۋرالى جازبا جاريالاعان ەدىم. «قوسىمشاعا ەنگىزىلگەن قۇجاتتاردان باسقا تاعى قانداي قۇجاتتاردىڭ سمارتفونىڭىزدا بولعانىن قالايسىز؟» دەگەن سۇراعىما سىزدەردەن كوپتەگەن ۇسىنىس كەلىپ ءتۇستى. سول بويىنشا ءتىزىم جاسادىق»، - دەپ جازدى مينيستر Facebook-پاراقشاسىندا.

اسقار جۇماعاليەۆ ۇسىنىپ وتىرعان تىزىمگە مىنا قۇجاتتار كىرىپ وتىر:

1. ءتولقۇجات

2. جۇرگىزۋشى كۋالىگى

3. ستۋدەنتتىك بيلەت

4. كولىكتىڭ تەحپاسپورتى

5. اسكەري بيلەت

6. ديپلوم

7. قارۋدى پايدالانۋعا بەرىلگەن رۇقسات

8. زەينەتكەر كۋالىگى

9. اڭشىلىق بيلەت

10. مۇگەدەكتىگى تۋرالى كۋالىك

11. جىلجىمايتىن مۇلىكتىڭ تەحپاسپورتى

«وسى قۇجاتتاردىڭ ءبىرقاتارىن ءموبيلدى قوسىمشاعا ەنگىزۋ ءۇشىن ءتيىستى مەملەكەتتىك ورگاندارعا حات جولداپ، قاجەتتى ينتەگراتسيانى جۇرگىزۋ مۇمكىندىگىن قاراستىرۋدى ۇسىندىق. ۆەدومستۆوارالىق كوميسسيانىڭ جاقىن ۋاقىتتا وتەتىن وتىرىسىندا بۇل پروتسەستى جەدەلدەتۋ ءۇشىن اتالعان ماسەلەنى تالقىلاۋدى جوسپارلاپ وتىرمىز» ، - دەدى ول.

سوڭعى جاڭالىقتار