برازيليا كوروناۆيرۋستى جۇقتىرعاندار بويىنشا الەمدە الدىڭعى ورىنعا شىقتى
قالالاردىڭ كەدەي- كەپشىكتەر تۇراتىن اۋداندارىندا ۆيرۋستىڭ كەڭىنەن تارالۋىنان ەلدەگى ىندەتپەن كۇرەس قيىنداي تۇسكەن. برازيليا كوروناۆيرۋستى جۇقتىرعاندار سانى بويىنشا الدىڭعى قاتارعا شىعاتىنى اقپاننىڭ اياعىندا- اق بەلگىلى بولعان. ويتكەنى ەسكەرتۋلەرگە قاراماستان، جەرگىلىكتى بيلىك جىل سايىنعى كارناۆالدان باس تارتقان جوق. سالدارىنان ۆيرۋستى جۇقتىرۋ دەرەكتەرى ارتتى. قازىر ەل الەم ەلدەرىنىڭ رەيتينگىسىندە ەكىنشى ورىندا تۇر. مۇندا تاۋلىك سايىن 800 ادام كوز جۇمادى.
انجەليكا يۆانوۆا، حيرۋرگ:
- ناۋقاستاردىڭ دەنى - ەلدىڭ سولتۇستىك- شىعىس وڭىرلەرىنىڭ تۇرعىندارى. ويتكەنى مەديتسينالىق قىزمەتكەرلەر تاپشى. سونداي- اق ەلدىڭ وڭتۇستىك- شىعىسىندا دا ىندەتتى جۇقتىرۋ دەرەگى كوپ تىركەلۋدە. ويتكەنى، ريو- دە- جانەيرو جانە سان- پاۋلۋدا حالىق تىعىز ورنالاسقان. بيلىك كارانتين ەنگىزۋ قاجەتتىگى جايلى باس قاتىرىپ جاتقاندا، شتات گۋبەرناتورلارى ءوز بەتتەرىنشە ساقتىق قامىنا كىرىسىپ كەتكەن. پرەزيدەنتتىڭ رەسمي مالىمدەمەسىن كۇتپەي- اق، كوپتەگەن وڭىردە ماسكا تاعۋ ءتارتىبى جاريالاندى. ال بولسونارۋ بەرتىنگە دەيىن كارانتين ەنگىزۋدىڭ قاجەتى جوق دەپ دۇربەلەڭگە جول بەرمەۋگە شاقىرىپ كەلدى. ايتۋىنشا، بۇل ەكونوميكانى قۇردىمعا كەتىرۋى مۇمكىن. الايدا جاعداي كۇن ساناپ وزگەرە باستاعاسىن، مەملەكەت باسشىسى ۇستانعان باعىتىن وزگەرتۋگە ءماجبۇر بولدى.
اللا يساۋلدو، دارىگەر:
- وكىنىشكە قاراي بىزدە ساياسي كۇرەس كۇشەيىپ وتىر. اسىرە وڭشىل پرەزيدەنت سولشىلداردىڭ سىنىنا ءجيى ۇشىراۋدا. سەبەبى ول ەلدە كورونايۆرۋسپەن كۇرەستە شۆەتسيانىڭ ۇلگىسىن پايدالانباق بولدى، ياعني قارتتار ۇيدە وتىرىپ، جاستاردىڭ جۇمىس ىستەگەنىن قالادى. ءبىراق سولشىلاردار بولسونارۋدىڭ بۇل ۇستانىمىن تۇرلەندىرىپ كورسەتىپ جاتىر.
رەناتا ۆالارينو، ەكونوميست:
- ۇكىمەت ىندەتپەن كۇرەس شارالارىن بەي- بەرەكەت ەنگىزدى دەپ ويلايمىن. ناتيجەسىندە كەي شتاتتاردا ەشكىم ساپارلاردى قاداعالاپ، الەۋمەتتىك اراقاشىقتىقتى ساقتاعان جوق. سونىمەن قاتار كەدەي- كەپشىكتەر تۇراتىن فاۆەلالارداعى جاعداي دا قاداعالانبادى. بۇگىندە تەك مەملەكەتتىك قانا ەمەس، جەكەمەنشىك اۋرۋحانالاردا دا ادام كوپ. ءدارى- دارمەك ازىرگە جەتەدى. ءبىراق دارىگەرلەر جاعداي وسىلاي جالعاساتىن بولسا، الداعى ەكى اپتادا پرەپاراتتار تاپشىلىعى تۋىنداۋى مۇمكىن دەيدى. سەبەبى ەلدە ءالى كۇنگە دەيىن ءىرى ساۋدا ورتالىقتارى، جاعاجايلار مەن دۇكەندەر جۇمىس ىستەپ تۇر. ال پرەزيدەنت پاندەميا ۇجىمدىق يممۋنيتەت پايدا بولعاندا عانا جويىلادى دەگەندى ايتادى.