اقتوبەنىڭ اكىمى قالانى مۇگەدەكتەر ارباسىمەن ارالاپ شىقتى

اقتوبە. قازاقپارات - اقتوبە قالاسىنىڭ اكىمى مۇمكىندىگى شەكتەۋلى جاندارمەن كەزدەسىپ، قالانى قولاربامەن ارالاپ شىقتى، دەپ حابارلايدى قازاقپارات ءتىلشىسى.

اقتوبە قالاسىندا جول جوندەۋ، جۇرگىنشىلەر جولىن سالۋ قارقىن الدى. بۇل جوبالاردىڭ باسىم بولىگىندە قولاربامەن قوزعالاتىن ادامداردىڭ سۇرانىسى ەسكەرۋسىز قالعان. ولقىلىقتى «پاندۋس وك» ج ش س باسشىسى، قالالىق قوعامدىق كەڭەس مۇشەسى شاحان جولداسبايەۆ قالا اكىمىنە ايتتى.

«ءوزىم قولاربامەن جۇرەمىن. جينالىستاردا اكىمگە ەسكەرتۋ بەرىپ، ايتقان ەدىم. ول ءوزى كورىپ، قاراپ، سىناقتان وتكىزۋگە ۋادە بەردى. مەن بار ءومىرىمدى مۇمكىندىگى شەكتەۋلى ادامداردىڭ قوزعالىسىن جەڭىلدەتۋگە ارنادىم. ەۋروپا ەلدەرى سەكىلدى كەدەرگىسىز ءجۇرىپ، كەز كەلگەن الەۋمەتتىك نىسانعا كىرۋدى قالايمىز. ءارقايسىسىنىڭ ءوز تالابى، ەرەجەسى بار. سول ەسكەرىلسە، ادامدارمەن ارالاسۋ بىزدەرگە جەڭىلدەيدى»، - دەدى ش. جولداسبايەۆ.

ايتا كەتەيىك، اقتوبە قالاسىندا 12 مىڭنان استام مۇمكىندىگى شەكتەۋلى جان بار. ولاردىڭ 2 مىڭنان استامى بالادى. بيىل قالاداعى «ينۆاتاكسي» قىزمەتىنە جەرگىلىكتى بيۋدجەتتەن 39 ميلليون تەڭگەدەن استام قارجى بولىنگەن. بارلىعى 12 كولىك تاسىمالداۋمەن اينالىسادى.

«قالاداعى الەۋمەتتىك نىسانداردىڭ دا تالاپقا ساي بولماعانى انىقتالدى. ءتىپتى مەملەكەتتىك مەكەمەلەردە دە مۇمكىندىگى شەكتەۋلى جاندارعا قولجەتىمسىز ەكەن. ءوزىم ارباعا وتىرىپ، ءبىراز جەردى ارالادىم. ءار كەدەرگىنى انىق كورىپ، سەزىنىپ، قينالىپ وتىرمىن. بارلىق كوپقاباتتى ۇيگە پاندۋس سالىپ، جيەكتاستاردىڭ كەدەرگىلەرىن جويۋ قاجەت ەكەن. الداعى ۋاقىتتا كارتا جاسالادى. ارنايى مونيتورينگ توپ شەشىم شىعارادى. ادامي ىسكە كوپ اقشا دا قاجەت ەمەس. بۇل ءبىزدىڭ قاتەلىگىمىز»،- دەدى قالا اكىمى اسحات شاحاروۆ. الدىمەن ەسكەرتۋ بەرىلىپ، كەيىن ايىپپۇل سالىنادى.